សក់របស់លោកអ្នកអាចនិងស្អាតរលោង ប៉ុន្តែវាក៏អាចមានសក់ខូចផងដែរបើយើងមិនបានថែរក្សាវាបានត្រឹមត្រូវ។ តើអ្នកដឹងទេថាបញ្ហាសក់របស់មនុស្សភាគច្រើនកើតមានឡើងក្នុងកំឡុងពេលនៅក្មេង? កូនក្មេងដែលមានសក់រួញ គឺមានបញ្ហានេះ។
សក់មិនដុះចុះមកក្រោមតាមធម្មជាតិទេ ប៉ុន្តែដុះចាក់ទៅតាមទិសផ្សេងៗ។ បញ្ហានេះមិនតម្រូវឱ្យមានការព្យាបាលទេ វានឹងប្រសើរឡើងវិញទៅតាមពេលវេលា។ ប៉ុន្តែមានវិធីជាច្រើនសម្រាប់ជួយនិងការពារកុំឱ្យមានបញ្ហានេះកើតមានឡើង។ ដូច្នេះខាងក្រោមនេះ គឺជាបំរាមមួយចំនួនដែលអ្នកមិនត្រូវធ្វើឡើយ បើអ្នកមិនចង់ឱ្យសក់អ្នកមានបញ្ហាប្រឈម៖
១. ឥរិយាបទមិនត្រឹមត្រូវពេលងូតទឺក ៖ ប្រសិនបើអ្នកឈរមុជទឹកដូចតារាផ្សាយពាណិជ្ជកម្មផលិតផលសាប៊ូកក់សក់តាមទូរទស្សន៍ សូមឈប់ធ្វើវាបន្តទៀតទៅ។ ការឈរមុជទឹករបៀបនេះវាស្រួល ប៉ុន្តែវាមិនល្អសម្រាប់សុខភាពសក់របស់អ្នកទេ។ កាយវិការដែលល្អ គឺអ្នកត្រូវទ្រេតក្បាលចុះបន្តិចដើម្បីសម្អាតសក់បានល្អ។
ការឈរឱនក្បាលបន្តិចនេះ ទី១ វាងាយស្រួលកក់សក់ ប៉ុន្តែត្រូវចាំថាត្រូវកក់ឱ្យដល់ឬសសក់។ ទី២ វាជួយអ្នកសម្អាតសក់អ្នកបានល្អ ពីព្រោះសក់ហូរតាមបណ្តោយទឹកបានរលូន។ លើសពីនេះទៅទៀត ប្រសិនបើអ្នកប្រើក្រែមបន្ទន់សក់ ឬក៏ម៉ាសអប់សក់ ការឈរឱនក្បាលចុះក្រោមវានឹងជួយអ្នកឱ្យប្រើផលិតផលនោះទៅដល់គល់សក់តែម្តង។
២. ការងូតទឹកក្តៅដែលមានកម្តៅក្តៅពេក ៖ បើអ្នកងូតទឹកជាមួយម៉ាស៊ីនទឹកក្តៅ អ្នកត្រូវមានការប្រុងប្រយ័ត្នឱ្យមែនទែន ពីព្រោះទឹកក្តៅ គឺជាសត្រូវជាមួយនឹងសក់របស់អ្នក។ ទឹកក្តៅធ្វើឱ្យសក់របស់អ្នកបាត់បង់ជាតិសំណើម ឬក៏ធ្វើឱ្យសក់ស្ងួត។
ដើម្បីជៀសវាងបញ្ហានេះ អ្នកគួរតែពិនិត្យមើលម៉ាស៊ីនទឹកក្តៅរបស់អ្នកកុំឱ្យក្តៅពេកដោយបើកទឹក ហើយយកដៃឬកែងដៃរបស់អ្នកប៉ះទឹកដើម្បីដឹងពីកម្តៅទឹក។ ទឹកក្តៅអ៊ុនៗ ឬទឹកត្រជាក់ អាចធ្វើឱ្យសក់របស់លោកអ្នកទន់និងរលោងស្អាត។
៣. ការប្រើប្រាស់ម៉ាស៊ីនផ្លុំសក់ ៖ ស្រ្តីជាច្រើនមានកំហុសនៅត្រង់ចំណុចនេះ។ ខ្យល់ដែលក្តៅខ្លាំង នឹងធ្វើឱ្យសក់របស់អ្នកឆាប់ស្ងួត ប៉ុន្តែវាក៏ផ្តល់ផលវិបាកដល់សក់របស់អ្នកនៅថ្ងៃអនាគតដែរ។ អ្នកត្រូវចាំថាត្រូវប្រើម៉ាស៊ីនផ្លុំសក់នៅកំរិតទាប ហើយផ្លុំសក់របស់អ្នកតាមទិសដៅឱនក្បាលចុះបន្តិចដូចអ្វីដែលបានរៀបរាប់ខាងលើ។
សូមកុំប្រើក្រាសសិតសក់ នៅក្នុងដំណាក់កាលនេះ។ ប្រសិនបើអ្នកប្រើកន្សែងសម្រាប់ជូតសម្ងួតសក់ ពួកយើងណែនាំវិធីពីរយ៉ាង៖ ប្រើកន្សែងសូត្រ ឬក៏កុំមូលសក់របស់អ្នក ពីព្រោះសក់សើមអាចធ្វើឱ្យសក់ឆាប់ដាច់ខូចនិងបែកចុង។
៤. ញ៉ាំទឹកមិនបានគ្រប់គ្រាន់ ៖ «គ្មានទឹក, គ្មានជីវិត» អ្នកទាំងអស់គ្នាដឹងហើយថាការញ៉ាំទឹកគឺមានសារៈសំខាន់ណាស់សម្រាប់សុខភាពរបស់អ្នក។ មានមនុស្សមិនច្រើននាក់ទេដែលដឹងថាសក់ក៏ត្រូវការទឹកដើម្បីដុះដែរ។ សក់របស់អ្នកមានជាតិទឹក១៥%ទៅហើយ ដូច្នេះត្រូវផឹកទឹកឱ្យបានគ្រប់គ្រាន់។
៥. អាកាសធាតុត្រជាក់ពេក ៖ ប្រសិនបើអ្នកនៅក្នុងប្រទេសដែលមានអាកាសធាតុក្តៅសើម (ដូចប្រទេសយើង) វាជាសំណាងរបស់យើង។ តែប្រសិនបើអ្នករស់នៅក្នុងអាកាសធាតុដែលត្រជាក់ អ្នកត្រូវតែយកចិត្តទុកដាក់ពីបញ្ហាសក់ឱ្យមែនទែន។
ក្តៅពេកក៏មិនបាន ត្រជាក់ពេកក៏មិនបាន។ អ្នកដឹងហើយថាសក់របស់យើងមានជាតិទឹក១៥% ដូច្នេះទឹកវាកកនៅសីតុណ្ណភាពទាបនោះវាធ្វើឱ្យសក់របស់យើងកកទៅតាមនោះដែរ។ វិធីដើម្បីដោះស្រាយ គឺត្រូវពាក់មួកឬរកអ្វីមកគ្របក្បាលរបស់យើងពេលចេញទៅខាងក្រៅ។
៦. ការប្រើផលិតផលធម្មជាតិ ៖ ការប្រើប្រាស់ផលិតផលធម្មជាតិ ឥលូវនេះកំពុងតែពេញនិយមជាពិសេសទាក់ទងទៅនឹងការថែរក្សាសក់។ មនុស្សស្រីជាច្រើនចូលចិត្តប្រើប្រាស់ប្រេងសម្រាប់ថែរក្សាសក់របស់ពួកគេ ប៉ុន្តែត្រូវដឹងថាប្រេងធម្មជាតិខ្លះដូចជា ប្រេងដូង, ប្រេង Argan, និងប្រេង Jojoba ជាដើម គឺមិនត្រូវគ្នាជាមួយម៉ាស៊ីនគាបសក់នោះទេ ពីព្រោះសីតុណ្ណភាពរបស់ម៉ាស៊ីនគាបសក់ធ្វើឱ្យប្រេងដែលលាបលើសក់ស្ងួត ហើយធ្វើឱ្យសក់ជំពាក់គ្នា។
៧. ញាំអាហារប៉ះពាល់សុខភាព ឬក៏ព្យាយាមញាំអាហារតិចដើម្បីសម្រកទំងន់ ៖ សក់ដែលមានសុខភាពល្អ នឹងមិនអាចកើតមានបានឡើយប្រសិនបើអ្នកមិនបរិភោគអាហារដែលមានជាតិប្រូតេអ៊ីន, វីតាមីន, និងអាហារដែលមានជីវជាតិបានគ្រប់គ្រាន់។
សក់យើងត្រូវការជាតិដែកនិងវីតាមីន B7 ដើម្បីលូតលាស់បានល្អ។ ខាងក្រោមនេះគឺជាអាហារដែលសម្បូរទៅដោយជីវជាតិធ្វើឱ្យសក់លូតលាស់បានល្អ មានដូចជា៖ សណ្តែក Walnuts, គ្រាប់ Flaxseed, សាច់ត្រីសាម៉ុង, សារ៉ាយ Spirulina, ផ្លែប័រ, គ្រាប់ល្ពៅ, ម្ទេសប្លោក, ស្ពៃក្តោប និងផ្សៅកាកាវធម្មជាតិ។
៨. មិនបានចាប់អារម្មណ៍ក្នុងការថែរក្សាសក់ ៖ ការកាត់តំរឹមសក់ គឺជាអ្វីដែលអ្នកត្រូវធ្វើឱ្យបានទៀងទាត់ប្រសិនបើអ្នកមានសក់បែកចុង។ អ្នកប្រហែលជាគិតថាបើមិនកាត់សក់នោះសក់ វានឹងដុះវែងហើយស្អាតដូចព្រះនាងដែលអ្នកដទៃតែងតែច្រណែន ប៉ុន្តែវាមិនដូច្នោះទេ។
សក់របស់មនុស្សគ្រប់គ្នាដុះមានកំរិត ដូច្នេះវាមានន័យថាយើងត្រូវថែរក្សាសក់របស់យើងដោយកាត់សក់បែកចុងចោល និងប្រើប្រាស់សេរ៉ូមជំនួយសក់ទើបសក់លូតលាស់បានល្អ។
៩. មិនសូវដែលបានសិតសក់ ៖ ងើបពីគេងមកញាំកាហ្វេគឺមានអារម្មណ៍ថាស្រស់ស្រាយណាស់ តែបើសិតសក់មុនពេលញ៉ាំកាហ្វេរបស់អ្នកគឺកាន់តែពិសេសជាងនេះទៀត។ ត្រូវប្រើប្រាស់ក្រាសសិតសក់ដើម្បីម៉ាស្សា មុនពេលមុជទឹកដើម្បីកុំឱ្យសក់ជំពាក់ជាប់គ្នានិងធ្វើឱ្យសរសៃឈាមស្បែកក្បាលរត់បានស្រួល។
វា ធ្វើឱ្យសក់ឆាប់ដុះដោយនាំយកជីវជាតិទៅកាន់ឬសរបស់សក់។ អ្នកអាចចាប់ផ្តើមសិតសក់យឺតៗថ្នមៗទៅដល់គល់សក់ឱ្យបាន១០ទៅ១៥នាទីចាំមុជទឹក។
ប្រភព៖ Brightside