រូបភាពចៅអធិការវត្តពោធិ៍ចិនតុង និងនារីម្នាក់ ត្រូវបានរកឃើញថា រូបភាពកាត់ត ក្នុងចេតនាបង្ខូចកេរ្តិ៍ឈ្មោះព្រះអង្គ និងតម្លៃព្រះពុទ្ធសាសនា
ភ្នំពេញ៖ ករណីស៊ើបអង្កេត ទៅលើការបែកធ្លាយរូបភាពព្រះតេជគុណ វ៉ាន វន្នី ចៅអធិការវត្តពោធិ៍ចិនតុង និងនារីម្នាក់ ត្រូវបានរកឃើញថា និងបញ្ជាក់ថាជារូបភាពកាត់ត ក្នុងចេតនាបង្ខូចកេរ្តិ៍ឈ្មោះព្រះអង្គនិងតម្លៃព្រះពុទ្ធសាសនា ។
យោងតាមកំណត់ហេតុ ស្តីពី “ការប្រជុំអំពីការបង្ហោះរូបភាពមិនប្រក្រតីនៅលើបណ្តាញសង្គមហ្វេសប៊ុកពាក់ព័ន្ធនឹងព្រះចៅអធិការវត្តពោធិ៍ចិនតុង” ដែលអ្នកសារព័ត៌មាន ទើបទទួលបាននៅព្រឹកថ្ងៃទី២៨ ខែមិថុនា នេះ បញ្ជាក់ថា ព្រះតេជគុណ វ៉ាន វន្នី រៀបរាប់ថា “រូបភាពដែលបង្ហោះតាមបណ្តាញសង្គមហ្វេសប៊ុកនោះ មិនមែនជារូបពិតទេ គឺ ត្រូវបានគេកាត់ត ដើម្បីបង្ខូចកេរ្តិ៍ឈ្មោះព្រះអង្គនិងតម្លៃព្រះពុទ្ធសាសនា”។
ដោយឡែកនារីម្នាក់នៅក្នុងរូបថតក្នុងករណីនេះ កញ្ញា លីម ធីតា អះអាងថា “នាងមិនមានទំនាក់ទំនងជាមួយលោកសង្ឃអង្គនេះទេ ហើយរូបថតទាំងនោះ ក៏មិនមែនជាការពិតដែរ គឺអ្នកបង្ហោះនោះមានចេតនាបរិហាកេរ្តិ៍បង្ខូចកិត្តិយសនាងខ្ញុំនិងក្រុមគ្រួសារ ។ នាងខ្ញុំសូមបដិសេធទាំងស្រុងចំពោះរូបថតមិនពិតទាំងអស់នេះ” ។ បញ្ហានេះ ត្រូវបានលោក ប្រាក់ ពិន ប្រធានការិយាល័យធម្មការនិងសាសនាខណ្ឌពោធិ៍សែនជ័យ បានឯកភាពមតិខាងលើទាំងស្រុង ៕
រូបភាព និងអត្ថបទ៖ Theuon Vuthy CTV8
Recent News
