ការរស់នៅនាពេលបច្ចុប្បន្ន ការប្រាស្រ័យទាក់ទងជារឿងសំខាន់មួយដែលមនុស្សម្នាក់ៗចាំបាច់ខ្វះមិនបាន។ នៅពេលអ្នកសន្ទនាជាមួយមិត្តភក្តិ ក្រុមគ្រួសារ ក្រុមការងារ ឬមនុស្សក្នុងសហគមន៍ តើអ្នកធ្លាប់គិតថាគួរនិយាយបែបណាឲ្យសមស្របជាមួយនឹងស្ថានភាពនោះទេ? តើអ្នកមានតិចនិចបែបណាខ្លះដើម្បីអោយមនុស្សនៅជុំវិញខ្លួនចូលចិត្តយើង ហើយទុកយើងជាមនុស្សដែលសំខាន់នោះ?
អត្ថបទនេះនឹងបង្ហាញពីតិចនិចមួយចំនួនជួយអោយការសន្ទនាមានភាពល្អប្រសើរ និងមានមនុស្សចូលចិត្តយើងច្រើនជាងមុន៖
១. និយាយពីអ្វីដែលនៅជុំវិញអ្នក
នេះជាវិធីមួយដែលមានប្រយោជន៍ច្រើនក្នុងស្ថានភាពដែលយើងកំពុងជួប អ្នកអាចប្រើអារម្មណ៍សង្កេតមើលអ្វីនៅជុំវិញខ្លួនយើង ហើយចាប់ផ្តើមពីប្រធានបទសាមញ្ញៗដែលសមរម្យ។ ជាក់ស្តែងពេលអ្នកជួបជាមួយមិត្តភក្តិ អ្នកអាចមើលពីសម្លៀកបំពាក់ដែលគេពាក់ ការសិក្សារៀនសូត្រ ជីវិតរស់នៅ ឬសួរពីសុខទុក្ខគ្រួសារ ឬខ្លួនគេផ្ទាល់ ប៉ុន្តែអ្នកគួរចាប់ផ្តើមបែបណាជាមួយសំណួរអ្វីអោយមានភាពសប្បាយរីករាយរួមគ្នា។
២. ជួយធ្វើអោយនរណាម្នាក់ដែលនៅជុំវិញខ្លួនយើងមានភាពធូរស្រាលពីបញ្ហាផ្សេងៗ
បង្ហាញពីអារម្មណ៍នឹករលឹក យកចិត្តទុក្ខដាក់ ព្រួយបារម្ភ គិតដល់មនុស្សដែលកំពុងតែនៅក្បែរអ្នក ព្រមទាំងបង្ហាញអាកប្បកិរិយាបែបណាអោយគេចាត់ទុកថា អ្នកជាមិត្តភក្តិល្អម្នាក់ដែលគេអាចនិយាយជាមួយបានគ្រប់បញ្ហា។ អ្នកអាចនិយាយពីរឿងល្អៗ ដើម្បីអោយស្ថានភាពមានភាពធូរស្រាល និងមានអារម្មណ៍ល្អឡើងវិញ។
៣. ការសួរសំណួរផ្ទាល់ខ្លួនបែបយឺតៗដោយយកចិត្តទុក្ខដាក់
ប្រសិនបើមិត្តភក្តិស្និទ្ធិស្នាល ឬមនុស្សជុំវិញខ្លួនរបស់អ្នកមានបញ្ហា ហើយអ្នកពិតជាចង់ចែករំលែកនូវបញ្ហារបស់ពួកគេមែននោះ ជាដំបូងសូមអ្នកស្តាប់ពីរឿងគ្រប់យ៉ាងអោយបានច្បាស់លាស់ ហើយអ្នកអាចសួរសំណួរខ្លីៗ យឺតៗទៅកាន់ពួកគេ (ត្រូវប្រាកដចិត្តថាសំណួរទាំងនោះមិនបានផ្តល់សម្ពាធដល់ពួកគេឡើយ) ឬក៏អ្នកនិយាយពីជំហានដោះស្រាយមួយៗនូវបញ្ហាទាំងនោះដែលអ្នកបានរកឃើញទៅកាន់មិត្តភក្តិយើង។ ការធ្វើបែបនេះជួយអោយការសន្ទនារបស់យើងមានតម្លៃ ហើយមានដំណោះស្រាយល្អៗក្នុងបញ្ហាប្រចាំថ្ងៃរបស់យើង។
៤. ការយកចិត្តទុក្ខដាក់លើប្រធានបទតូចៗ
ការសន្ទនាលើកដំបូងពិតជាសំខាន់ណាស់សម្រាប់មនុស្សមិនធ្លាប់ស្គាល់គ្នាពីមុនមក ដូចនេះនៅពេលដែលដៃគូរបស់អ្នកនិយាយអ្វីចេញមក មិនថាជារឿងតូចតាចក្តី សូមអ្នកព្យាយាមចាប់យកចំនុចសំខាន់របស់គេអោយបាន។ ការមិនអើពើជាមួយនឹងសំណួរ ឬចម្លើយរបស់គេដែលគេបានលើកឡើង មិនមែនជាការឆ្លើយតបដ៏ល្អឡើយ វាអាចប៉ះពាល់ដល់ការសន្ទានយើង។ ឧទាហរណ៍ ក្នុងសង្គមបច្ចុប្បន្នទូរស័ព្ទក្លាយ ជាឧបករណ៍មួយដែលរំខានដល់ការសន្ទនាផងដែរ នៅពេលអ្នកជួបជុំជាមួយមិត្តភក្តិរបស់អ្នកម្តងៗ អ្នកគួរតែព្យាយាមកាត់បន្ថយទៅតាមលទ្ធភាពដែលអ្នកអាចធ្វើទៅបាន (សូមអ្នកពិចារណាលើការលើកឡើងនេះ)។
៥. បង្កើតអារម្មណ៍រីករាយពេលនៅជុំគ្នា
ពេលជួបជុំគ្នាជាមួយសមាជិកគ្រួសារ ក្រុមការងារ មិត្តភក្តិ និងមនុស្សសំខាន់ ចូរអ្នកបង្កើតអារម្មណ៍សប្បាយៗ ភាពរីករាយអោយបានច្រើនតាមដែរអាចធ្វើបាន។ បើសិនជាអ្នកពូកែនិយាយកំប្លែងជារឿងមួយដ៏ល្អផងដែរ អាចធ្វើអោយមនុស្សជុំវិញខ្លួនពេញចិត្ត និងជួយបំបាត់ភាពឯកោពេលអ្នកនៅជាមួយមនុស្សជុំវិញខ្លួន។
៦. បង្កភាពសប្បាយរីករាយដោយសកម្មភាពប្លែកៗ
អ្នកសាកស្រម៉ៃមើលថា ពេលអ្នកធ្វើដំណើរកំសាន្តជាមួយមិត្តភក្តិ និងបោះតង់គេងនៅមាត់សមុទ្រ ឬកន្លែងជាប់មាត់ទឹក ហើយមានអ្នកលេងហ្គីតាពេលអ្នកអង្គុយជារង្វង់នៅមុខបណ្តុំភ្លើងដែលគ្រប់គ្នាបានបង្កាត់ឡើង មានអ្នកចម្រៀងស្រែកច្រៀងហូរហែ ឬមានអ្នកបង្កើតល្បែងលេងផ្សេងៗ ហាក់ដូចជាមានក្តីសុខខ្លាំងណាស់។ ប្រសិនបើអ្នកជាអ្នកចម្រៀង អ្នកលេងហ្គីតា ... អាចជាទីចាប់អារម្មណ៍មួយរបស់មិត្តគ្រប់គ្នាផងដែរ។
៧. សួរអ្វីដែលជាភាពរីករាយ ឬអ្វីដែលយើងអាចជួយគេបាន
តិចនិចនេះសាមញ្ញ តែអាចធ្វើអោយអ្នកជុំវិញខ្លួនមានអារម្មណ៍ថាកក់ក្តៅ ហើយស្ទើរគ្រប់គ្នាតែងមើលរំលងនូវចំនុចនេះ។ អ្នកអាចសួរពីរឿងល្អៗរបស់ពួកគេ ឬពេលគេមានទឹកមុខមិនសូវល្អ អ្នកអាចបង្ហាញអារម្មណ៍បារម្ភតាមរយៈទឹកមុខគេ ព្យាយាមជួយអ្វីដែលអាចធ្វើទៅបាន។
តិចនិចដែលបានរៀបរាប់ខាងលើ អាចជាបច្ចេកទេសសាមញ្ញៗដែលល្អ ហើយគ្រប់គ្នាមិនគួរមើលរំលងឡើយ ប្រសិនបើអ្នកចង់អោយការសន្ទានរបស់អ្នកមានភាពល្អប្រសើរ និងមានការរាប់អាន ឬចូលចិត្តច្រើនពីមនុស្សជុំវិញខ្លួន។
ប្រែសម្រួលដោយ៖ លី ហួត
កែសម្រួលដោយ៖ Serpent
ប្រភព៖ brightside.me