គូស្នេហ៍ភាគច្រើនតែងតែជ្រើសគូអនាគតវ័យស្របាលគ្នា ដោយហេតុយល់ថាជាវ័យដែលក្មេងវ័យដូចគ្នា អាចយល់ចិត្តគ្នាច្បាស់បាន តែមានគូស្នេហ៍ខ្លះ ជាពិសេសគឺនារីតែម្តង អ្នកខ្លះក៏ជ្រើសគូជីវិតដែលមានអាយុច្រើនជាងខ្លួន ដោយហេតុយល់ថា អ្នកដែលមានវ័យច្រើនចេះគិតជាង មិនពូកែប្រចណ្ឌ ហើយក៏មានសមត្ថភាពធ្វើការរកស៊ី រកលុយបានច្រើនជាងគូស្នេហ៍ក្មេងៗជាដើម។
តាមរយៈហេតុផលជាច្រើននៅក្នុងការជ្រើសគូអនាគតដែលមានវ័យចំណាស់ជាង តាមរយៈគណនី Thary Omchetchan បានសរសេររៀបរាប់ពីរឿងរ៉ាវស្នេហាផ្ទាល់ខ្លួនថា៖ « ប្រចណ្ឌ ខ្ញុំមានបំណងជ្រើសយកស្វាមីដែលមានអាយុច្រើនជាងខ្ញុំ យ៉ាងហោចណាស់ត្រូវលើសខ្ញុំចាប់ពីបីឆ្នាំឡើង។ អ្នកអាយុស្មើ ឬលើសមួយឆ្នាំពីរឆ្នាំដឹងតែនៅក្រៅបញ្ជីក្នុងការគិតរបស់ខ្ញុំ។ មូលហេតុបីលើអាយុនោះ វាតែងតែស្ថិតក្នុងការគិតរបស់ខ្ញុំមុននឹងឈានដល់ថ្ងៃដែលខ្ញុំសម្រចចិត្តរៀបការ។
មូលហេតុទីមួយ ខ្ញុំគិតថាមនុស្សស្រីឆាប់ចាស់ជាងមនុស្សប្រុស បើអាយុស្មើគ្នា នៅជាមួយគ្នាយូរទៅខ្ញុំនឹងឆាប់ចាស់ជាងគេ ហើយពេលខ្ញុំចាស់ទៅ ខ្ញុំខ្លាចគេលែងស្រលាញ់ និងបោះបង់ខ្ញុំ។
មូលហេតុទីពីរ ខ្ញុំគិតថាមនុស្សប្រុសដែលមានអាយុច្រើនជាង គេអាចចិត្តធ្ងន់ជាង មានការគិតជ្រៅជាង(គិតបែបហ្នឹង ឆ្ងល់ខ្លួនឯងដែរ)។ មូលហេតុទីបី បើអាយុកាន់តែច្រើន គេនឹងចេះកាន់តែថ្នាក់ថ្នមប្រពន្ធក្មេង(ឮគេនិយាយតែញយក៏យកវាទុកក្នុងចិត្ត)។ ទាំងនោះក្រៅពីខ្ញុំសង្កេតពីអត្តចរិក វាជាចំណុចសំខាន់បំផុត។
រហូតដល់វេលាមួយដែលខ្ញុំបានជួបមនុស្សម្នាក់។ វេលាមួយស្របគ្នា ខ្សែភ្នែកអៀនពេលគេមើលរបៀបទម្លុះបេះដូង។ គេចាប់ផ្តើមយកឈ្នះចិត្តដែលរឹងមាំឱ្យទន់ជ្រាយ គេចាប់ផ្តើមយកឈ្នះចិត្តញាតិសន្តានដោយគោរពទៅតាមប្រពៃណី។ គេអាចញែករនាំងបេះដូង ញាតិមិត្ត ប្រពៃណី ហើយក៏ចូលចាប់ដៃខ្ញុំឱ្យដើរលើផ្លូវជាមួយគេ។ ផ្លូវនោះវែងឆ្ងាយ ហើយស្មុគស្មាញ ព្រោះយើងមានភាសា ទំនៀមទម្លាប់ និងអ្វីជាច្រើនទៀតផ្សេងពីគ្នា។
ដើរលើផ្លូវនោះខ្ញុំទទួលនូវបទពិសោធន៍ផ្សេងៗ ពេលខ្លះធ្វើឱ្យខ្ញុំមានអារម្មណ៍រំភើប ស្ញើបអរ ស្អប់ ខឹង ប្រចណ្ឌ ធុញធប់ ឈ្លោះទាស់ទែង រហូតពេលខ្លះស្ទើរតែសុំចែកផ្លូវគ្នាដើរទៅហើយជាមួយនឹងសំណើច និងទឹកភ្នែក។ មានរសជាតិម្ហូប បង្អែម និងភេសជ្ជៈ ដែលយើងបានភ្លក ផ្អែម ប្រៃ ជូរ ចត់ ល្វីង ហើយក៏អាចស្រវឹងបើផឹកជាតិអាល់កុរច្រើនពេក ដែលជាពេលយើងប្រុងប្រយ័ត្ន។
អ្វីៗដែលគិតទុកមុន ដែលធ្លាប់ឮគេនិយាយពីមុន មិនប្រាកដថាវាជាការពិតទាំងអស់ឡើយ។ ដៃគូដែលខ្ញុំជ្រើសរើសទីបំផុតគាត់ពិតជាមានអាយុលើសខ្ញុំមិនតិចឡើយ វាត្រូវនឹងចិត្តខ្ញុំ តែតើសួរថាវាដូចអ្វីដែលខ្ញុំបានគិត ឱ្យគេស្រលាញ់ខ្ញុំខ្លាំង ឱ្យគេថ្នាក់ថ្នម ឱ្យគេយោគយល់ចិត្តមានចិត្តធ្ងន់ មកលើខ្ញុំ ដូចដែលគិតនោះយ៉ាងណាដែរ? បន្ទាប់ពី៨ឆ្នាំកន្លងមកនេះខ្ញុំអាចនិយាយថាមានខ្លះអត់ខ្លះ ហើយមិនមែនអាស្រ័យលើគេឡើយគឺអាស្រ័យលើរូបខ្ញុំផងដែរ។
ទង្វើដែលធ្វើទៅលើដៃគូ ដៃគូក៏នឹងប្រព្រឹត្តទង្វើនោះមកលើខ្លួនឯងវិញ អ្វីគ្រប់យ៉ាងវាអាស្រ័យលើលើភាាគីទាំងពីរ។ អ៊ីចឹងទៅធ្វើឱ្យខ្ញុំគិតថា អាយុជាចំណុចមួយតែវាមិនសំខាន់ខ្លាំងដូចដែលខ្ញុំគិតដូចពីមុនទេ ព្រោះមានហេតុផលសំខាន់ខ្លាំងជាងនេះទៀតដូចដែលគាត់ធ្លាប់ញែករនាំងគ្រប់បែបយ៉ាង ចូលមកយកខ្ញុំបាន រួចអាចចាក់សោរបន្ទប់ឱ្យយើងអាចពិភាក្សាស្នេហា និងជីវិតបន្ត។ អ្វីដែលសំខាន់គឺយើងអាចស្វែងរកមនុស្សម្នាក់ដែលខ្លួនឯងអាចទុកចិត្តបាន គេអាចធ្វើឱ្យយើងរីករាយបាន គេអាចធ្វើឱ្យយើងនឹកគេពេលមិននៅក្បែរ អាចបារម្ភពីគេបើដឹងថាគេមានសុខភាពមិនល្អ ដែលជាអារម្មណ៍មនុស្សសាងផ្លូវវែងឆ្ងាយជាមួយគ្នា ហើយដើរទៅថ្ងៃក្រោយដោយគ្មានពាក្យស្តាយក្រោយ ដោយមិនបន្ទោសអ្នកណាប្រសិនបើការជ្រើសរើសនោះជាការសម្រេចចិត្តចុងក្រោយដោយខ្លួនឯង។
ពេលមួយនោះ ខ្ញុំប្រចណ្ឌណាស់ ពេលដើរជាមួយគ្នា តែគាត់បែរជាសម្លឹងមើលទៅស្រីផ្សេងៗទៅវិញ ដោយកែវភ្នែកចម្លែក។ ចិត្តមិនសុខទេបើដូច្នេះ។ ខ្នាញ់ចង់តែទៅចាប់ខ្មេះភ្នែកចេញទេ បើមើលគេម្លឹងៗ(ចិត្តអីក៏អាក្រក់ម្ល៉េះ ចង់បំផ្លាញកែវភ្នែកគេ។ ខឹងខុស ខឹងខូច ខឹងខាត នាំអន្តរាយដល់ខ្លួន)។ ស្អប់ប្រុសភ្នែកព្រាន។ ចិត្តក៏ចាប់ហៅគេថា«ប្រុសចិត្តសាវ៉ា»។ ប្រពន្ធស្លៀកពាក់អី ចងសក់ម៉េចមិនចាប់អារម្មណ៍ទេ តែបើគេវិញមើលឡើងចង់ជ្រុះភ្នែក។ នេះវាជាអារម្មណ៍ដែលខឹងគេ ចឹងចេះតែរកហេតុផលផ្ទួនៗដាក់ហើយដាក់ទៀតឱ្យតែមានទម្ងន់ខ្លាំងឡើងៗ។
ពេលខ្លះខ្ញុំក៏ថាឱ្យប៉ាច់ៗ ពេលខ្លះខ្ញុំក៏ធ្វើជា ងង៉ក់ ហើយគាត់នោះបើដឹងថាកំពុងប្រចណ្ឌ គាត់កាន់តែសប្បាយចិត្ត រឹតតែកាន់តែឌឺ...ហើយសើចសប្បាយ គេបែជារីករាយដែលដឹងថាប្រពន្ធគេចេះប្រចណ្ឌ។ ហឺ ខ្ញុំពិតជាល្ងង់ណាស់មែនទេ ខឹងគេតែឯង គិតអីផ្តេសផ្តាស់តែឯង មិនទុកចិត្តលើខ្លួនឯងសោះ។បើខ្ញុំមិនឆាប់ប្តូរការគិតទេ អ្វីៗអាចទាញចូលមកការគិតមិនល្អនោះមិនខាន។ ខ្ញុំចាប់ផ្តើមបង្កើតទំនុកចិត្តលើខ្លួនឯង ថាខ្ញុំមិនអន់ទេ បើអ្នកមិនយកភ្នែកមកមើលខ្ញុំក៏ស្រេចចិត្ត ហឹស។ ខ្ញុំចាប់ផ្តើមរៀនស្ទុងពីចិត្តគាត់ តើគាត់ចូលចិត្តសម្លឹងមើលគេពេលណា? ហេតុអី?
បន្ទាប់មកខ្ញុំរកឃើញអ្វីមួយដែលធ្វើឱ្យខ្ញុំដូចជាទើបភ្ញាក់ពីគេងនោះគឺ គាត់ជាមនុស្សចង់ដឹងណាស់ គាត់មិនមែនមើលតែលើនារីទេ គាត់ក៏មើលទៅបុរសដែរ ប្រសិនគេជាមនុស្សមិនដែលស្គាល់ ចម្លែក មើលគេពីលើដល់ក្រោម ហើយបើមនុស្សស្រី នោះជាមនុស្សស្រីស្រស់ស្អាតខ្លាំង ឬចម្លែកខ្លាំងចំពោះម៉ូដសក់ ពណ៌សក់ និងការស្លៀកពាក់ជាដើម។ មនុស្សដែលគាត់មើលហើយ មួយភ្លេតគាត់អាចរៀបរាប់ពីបុគ្គលិកលក្ខណ:របស់គេ ប្រើផលិតម៉ាកនេះម៉ាកនោះ...ខុសពីខ្ញុំមិនខ្វល់អីសោះ លើកលែងតែបើម្នាក់ស្រីនោះស្អាត ខ្ញុំក៏ងាកទៅមើលដែរ មើលជាងគេបុរសផង ហើយសរសើរថាវ៉ាវ...ព្រោះពេលខ្លះខ្ញុំក៏មើលដើម្បីយកមកអភិវឌ្ឍន៍ស្ទាយ៍របស់ខ្ញុំបន្ថែម។
គិតមើលទៅឯងជាស្រីចេះមើលគេឡើងស្លុង ចុះទម្រាំគេមនុស្សប្រុស។ តាំងពីពេលនោះមកភាពប្រចណ្ឌក៏កាត់បន្ថយ ម្តងបន្តិចៗក៏អស់ តែមិនហ៊ានសន្យាថាថ្ងៃក្រោយនឹងមិនប្រចណ្ឌទៀតទេ ប្រសិនបើចាប់បានចំណុចណាមួយផ្សេង។ ហាសហា!!!
សំខាន់ដឹងតែថាពេលនេះអូនស្រលាញ់បង។ សរសេរដល់ត្រឹមនេះ ហៅគាត់មកជិត ហើយប្រាប់ថាចឹង គាត់ក៏តបមកវិញ បងក៏ស្រលាញ់អូនដែរ ហើយថើបជីពៗ។ អូខេបងអូនសរសររត.. ការប្រចណ្ឌមិនមែនជារឿងល្អសម្រាប់ដៃគូឡើយ ទាំងបុរស និងស្ត្រី នាំឱ្យទទួលអារម្មណ៍អន់ចិត្តហើយបង្ករជាបញ្ហាធំប្រសិនបើមិនលើកយកមកនិយាយគ្នា។ និយាយគ្នាប្រាប់ពីអ្វីដែលខ្លួនសង្ស័យមិនពេញចិត្តគឺជាដំណោះស្រាយ ហើយត្រូវពង្រឹងលើទំនុុកចិត្តខ្លួនឯងឡើងវិញ។
ផ្នែកមួយនៃជីវិតគូ ថារី »។
ចុះប្រិយមិត្តផ្សេងវិញយល់យ៉ាងណាដែរ?