អាចថាជារឿងមួយប្លែកខ្លាំងមែនទែន ដោយនៅក្នុងប្រទេសជប៉ុនមានច្បាប់ហាមស្រីៗដែលធ្វើការងារទូទៅទាំងអស់ បូករួមទាំងអ្នកទទួលភ្ញៀវ អ្នកលក់នៅហាងទំនិញ និងហាងកែសម្រស់ មិនឱ្យពាក់វ៉ែនតានៅកន្លែងធ្វើការតែម្តង ដោយគេយល់ថាការពាក់វ៉ែនតាធ្វើឱ្យស្រីៗលែងស្រស់ស្អាត និងបាត់បង់ភាពជាមនុស្សស្រី ជាពិសេសភ្ញៀវភាគច្រើនមិនសូវចូលចិត្តមនុស្សស្រីពាក់វែ់នតានោះទេ។
មានបុគ្គលិក និងអ្នកធ្វើការស្រីៗជាច្រើនបានរអ៊ូរទាំទៅនឹងការចេញច្បាប់នេះ ជាពិសេសអ្នកដែលមានបញ្ហាភ្នែក ដោយសារតែពេលខ្លះពួកគេត្រូវធ្វើការមុខកំព្យូរទ័រច្រើនម៉ោងហេតុនេះហើយការពាក់ Contact Len (កែវពាក់ភ្នែក) ធ្វើឱ្យភ្នែករបស់ពួកគេស្ងួត រោយ និងក្រហមក៏មានដែរ។
គួរឱ្យដឹងផងដែរថា ក្រៅពីច្បាប់ហាមប្រាមពាក់វ៉ែនតាជប៉ុនក៏មានច្បាប់ជាច្រើនដែលទាក់ទងនឹងស្តង់ដាសម្រស់របស់ស្ត្រីតែម្តង ដូចជាការ ហាម Make Up ជ្រុលហួសហេតុពេក លាបពណ៌ត្របកភ្នែកដិតខ្លាំង លាបក្រែមពណ៌ក្រម៉ៅ លាបម៉ាស្ការ៉ាជ្រុល រួមទាំងការតុបតែងមុខលើសខ្លាំងដទៃទៀត តែបើមិន Make up តែម្តងក៏មិនបានដែរ ហាមលាបពណ៌សក់ហួសហេតុ ស្រីៗដែលមានសក់វែងត្រូវតែបួងចងទៅលើឱ្យអស់ៗ ហាមពាក់ម៉ាសមុខ និងត្រូវពាក់ស្បែកជើងកែងខ្ពស់ៗកម្ពស់ចាប់ពី ២អ៊ីងឡើងលើជាដើម ដែលច្បាប់ទាំងនេះត្រូវបានគេដឹងថាដោយសារតែចង់ឱ្យមនុស្សស្រីកាន់តែស្អាតជាងមុនប៉ុណ្ណោះ៕