ថៃ៖ កាលពីថ្ងៃទី ១៩ ខែវិច្ឆិកា ឆ្នាំ២០១៩ នៅក្រុងផូផារ៉ាម ខេត្ត រ៉ាត់ចាក់បូរី ប្រទេសថៃ មានរឿងមួយគួរឱ្យភ្ញាក់ផ្អើល និងកោតសរសើរខ្លាំងបានកើតឡើង ដោយពិធីមង្គលការមួយកន្លែង បានធ្វើពិធីចែកអង្ករដល់ចាស់ជរាក្រីក្រដោយឥតគិតថ្លៃ ដើម្បីអបអរថ្ងៃពិសេសរបស់ខ្លួន។
ការរៀបចំពិធីចែកអង្ករដល់ចាស់ជរា មួយនេះត្រូវបានធ្វើឡើងតាំងពីព្រលឹមចាប់ពីម៉ោង ៨ និង ៣០នាទីព្រឹកតែម្តង ដោយការចែកអង្ករនេះ កូនកំលោះកូនក្រមុំជាអ្នកធ្វើការចែកអង្ករដោយផ្ទាល់ដៃតែម្តង ។ ហើយនៅក្នុងការចែកអង្ករមួយនេះ ក្នុងម្នាក់ទទួលបានអង្ករ១កញ្ចប់ មានទម្ងន់ ៥ គីឡូក្រោម ដោយការចែកនេះមានរៀបចំដល់ទៅចំនួន២០០០ កញ្ចប់ សម្រាប់មនុស្សចំនួន ២០០០នាក់ សរុបទាំងអស់អង្ករចំនួន ១០ តោន។
នៅក្នុងការរៀបចំពិធីដ៏ប្លែក ពិសេសបែបសប្បុរធម៌មួយនេះ ត្រូវបានគេដឹងថា គឺដើម្បីអបអរសាទរពិធីមង្គលការ ដោយមានកូនកម្លោះឈ្មោះ លោក ណាប៉ូផាភុនឡា និងកូនក្រមុំ កញ្ញា Pornthip Kamonphantip ដែលជាកូនស្រីរបស់លោក Chaithip Kamonphantip អតីតបេក្ខជនតំណាងរាស្ត្រមណ្ឌល។ ដោយឪពុកខាងស្រីបាននិយាយថាលោកជាអ្នកផ្តួចផ្តើមគំនិតចែកអង្ករនេះឡើង ដោយមានការយល់ស្របគាំទ្រពីកូនស្រី និងកូនប្រសាលោកផងដែរ ដោយសារតែថ្ងៃនេះជាថ្ងៃពិសេស មានសុភមង្គលរបស់កូនលោក ហើយលោកក៏ចង់ចែករំលែកភាពរីករាយដល់ជនអត់ឃ្លាន និងចាស់ជរាខ្វះខាតផងដែរ។
គួរឱ្យដឹងផងដែរថា មានអ្នកមកទទួលអង្ករ គ្រប់ចំនួន ២០០០ នាក់តែម្តង ដោយអ្នកដែលបានទទួលអង្ករសុទ្ធតែសម្តែងនូវក្តីរីករាយ ថែមទាំងបានធ្វើការជូនពរឱ្យគូស្នេហ៍ថ្មោងថ្មីមួយគូនេះ មានក្តីសុខ និងសុភមង្គលស្រលាញ់គ្នាដល់ចាស់កោងខ្នងផងដែរ។
នេះបានចំជាពិធីមង្គល និងការសម្តែងចិត្តបុណ្យប្រាកដមែន៕
រក្សាសិទ្ធអត្ថបទ៖ Kalib9