សុនខ (ឆ្កែ) គឺជាសត្វដែលស្និទ្ធស្នាលនឹងមនុស្សជាងគេ ក្នុងចំណោមសត្វចិញ្ចឹមក្នុងផ្ទះជាច្រើន ដោយវាមិនត្រឹមតែការពារផ្ទះសម្បែង តែវាស្រលាញ់ និងតាមម្ចាស់ណាស់ រហូតម្ចាស់ខ្លះមិនដែលចាត់ទុកថាវាជាសត្វចិញ្ចឹមឡើយ ពោលគឺដូចជាសមាជិកគ្រួសារមួយរូបដែរ។
ថ្មីៗនេះផងដែរ សុនខមួយក្បាលដែលត្រូវចិញ្ចឹមដោយព្រះសង្ឃមួយព្រះអង្គ នៅទីវត្តអារាមមួយកន្លែង បានធ្វើឱ្យព្រះសង្ឃគង់នៅវត្តអារាម និងញាតិបរិសទដែលធ្លាប់ស្គាល់វា មានក្តីទុក្ខសោកសង្រែងជាខ្លាំង ព្រោះតែការបាត់បង់ជីវិតដោយជំងឺរោគចាស់ឈឺស្លាប់។
តាមរយៈគណនីហ្វេសប៊ុក ព្រះសង្ឃមួយអង្គព្រះនាម Tat Mahaty បានរៀបរាប់ថា៖ « កុសលអ្នកឯងបានរស់នៅ ក្នុងវត្តជាមួយនិងអាត្មា14 ឆ្នាំហើយ អាត្មាបានយកចិត្តទុកដាក់ថែទាំល្អហើយ បាននៅរងចាំផ្លូវអាត្មាត្រឡប់មកពីប្រទេសក្រៅវិញ ពេលនិមន្តមកដល់ភ្លាម កុសលដើរមករកហិតហើយបក់កន្ទុយ ក៏បានលះបង់ជីវិតហើយ ដោយឥរិយាបថសំពះក្រាប សូមកើតជាតិណាៗ សូមទៅកើតក្នុងទីខ្ពង់ខ្ពស់ចុះ នឹងបុណ្យអោយនៅថ្ងៃទី30.11.2019»។
គួរឱ្យដឹងផងដែរថា ការស្លាប់របស់សុនខមួយក្បាលនេះ ត្រូវបានព្រះសង្ឃដែលជាម្ចាស់ផ្ទាល់ រើបចំពិធីបុណ្យមិនខុសពីមនុស្សប៉ុន្មានឡើយ ដោយមានទាំងការចាក់ថ្នាំកុំឱ្យស្អុយរលួយ តុបតែង និងរៀបដាក់មឈូសធ្វើបុណ្យតាមប្រពៃណីខ្មែរផងដែរ៕