ការពេញនិយមបកស្បែកឲ្យសក្នុងស្រទាប់សង្គមខ្មែរ ជាពិសេសគឺស្រីៗក្មេងៗតែម្តង បានកំពុងរីកដុះដាលពីម្នាក់ទៅម្នាក់ជារៀងរាល់ថ្ងៃ ព្រោះតែចង់បង្ហាញពីសម្រស់ស្រស់ស្អាតរបស់ខ្លួន ដោយពុំបានគិតដល់បញ្ហាប៉ះពាល់ដល់សុខភាពនោះទេ។ យុវតីដែលកំពុងនិយមបក ឬចាក់ថ្នាំឲ្យស្បែកសនោះ បានប្រាប់ឲ្យដឹងថាការនិយមបក ឬចាក់ថ្នាំឲ្យស្បែកសនោះព្រោះតែពួកគេចង់ស្អាត និងមានសម្រស់ទាក់ទាញជាងមុន។
ការនិយមបកឬចាក់ថ្នាំឲ្យស្បែកសនោះ អាចបណ្តាលឲ្យកើតជំងឺសើស្បែក និងជំងឺមហារីកស្បែកផងដែរ។ បើពួកគេចាប់ផ្តើមធ្វើការបកស្បែក ហើយមិនបានថែរក្សាវាឲ្យបានត្រឹមត្រូវនោះ ស្បែករបស់ពួកគេងាយនឹងរងរលាកពីពន្លឺព្រះអាទិត្យ ព្រោះស្បែកនោះខ្សោយជាងស្បែកធម្មតា។ ណាមួយពន្លឺព្រះអាទិត្យមានកាំរស្មី UV ដែលនាំឲ្យកើតជំងឺមហារីកស្បែកបាន។ ម្យ៉ាងវិញទៀតការបកស្បែកនោះ មិនដឹងថាពួកគេធ្វើតាមបច្ចេកទេសមកពីណាដែរទេ? គឺចេះតែនឹកឃើញ និងធ្វើត្រាប់តៗគ្នា។
ចំពោះថ្នាំធ្វើឳ្យស្បែកសវិញ ថ្នាំធ្វើឲ្យស្បែកនោះមានច្រើនប្រភេទ ហេតុដូច្នេះធ្វើឲ្យពិបាកនឹងនិយាយណាស់។ មកដល់ឥឡូវនេះ មានថ្នាំបក ឬចាក់ថ្នាំឲ្យស្បែកសក្នុងរយៈពេលខ្លីនោះដែលបានដាក់លក់នៅតាមទីផ្សារភាគច្រើន ដែលមានលាយសារធាតុមួយចំនួនគេមិនបានប្រាប់យើងឲ្យដឹង ដែលក្នុងនោះអាចមានលាយសារធាតុ បារត អាសីុតខ្សោយ ថ្នាំប្រឆាំងការរលាក និងសារធាតុគីមីកាត់មួយចំនួនទៀតដែលនាំឲ្យកើតជំងឺសើស្បែក និងមហារីកស្បែក ព្រោះថាវាទាំងនោះបានធ្វើឲ្យស្បែកបាត់បង់ភាពការពារ។
សេចក្តីគ្រឿនរំលឹក៖ រាល់អ្នកដែលនិយមបក ឬចាក់ថ្នាំឲ្យស្បែកសអាចប្រឈមមុខជាមួយនឹងជំងឺសើស្បែក ជាពិសេសមហារីកស្បែក ច្រើនជាងអ្នកដែលអត់បកឬចាក់ថ្នាំឲ្យស្បែកស ៕