ដុចដែលយើងបានដឹងរួចមកហើយថា គម្រោង “ផ្ទះ១ អំពូល១” ដើម្បីសុវត្ថិភាពភូមិឃុំគឺជាគំនិតដ៏ល្អពិសេសប្លែករបស់អភិបាលស្រុកបន្ទាយស្រី ដើម្បីបំភ្លឺផ្ទះសម្បែងប្រជាពលរដ្ឋក្នុងតំបន់ និងជាការការពារគ្រោះអាសន្ននានា បានទទួលការគាំទ្រយ៉ាងខ្លាំងពីសំណាក់អ្នកលងបណ្តាញសង្គមហ្វេសប៊ុក រហូតគម្រោងនេះបានលេចចេញជារូបរាងផ្លូវការផងដែរនៅពេលនេះ។
ការដាក់អំពូលសូឡាតាមផ្ទះប្រជាពលរដ្ឋ ដែលការជ្រើសសាកល្បងដំបូងនៅក្នុងភូមិព្រះដាក់ ខេត្តសៀមរាប ត្រូវបានដឹងថាកំពុងតែដំណើរការ ៦០% ក្រោមការគាំទ្រពីអភិបាលផង ថែមទាំងទទួលបានការគាំទ្រ និងជំនួយទាំងស្មារតី រួមទាំងថវិកាផ្ទាល់ពីប្រជាពលរដ្ឋគួរឱ្យសរសើរជាខ្លាំង។
តាមរយៈគណនីហ្វេសប៊ុកផេកជាផ្លូវការរបស់អភិបាលស្រុកបន្ទាយស្រី ឃឹម ហ្វីណង់ - Khim Finan បានរៀបរាប់ថា៖ « ការងារតម្លើងអំពូលសូឡាស្វ័យប្រវត្តិជូនតាមផ្ទះនីមួយៗនៅក្នុងភូមិព្រះដាក់សម្រេចបាន៦០%ហើយ!
ឆ្លៀតពេលចុងសប្តាហ៍ ខ្ញុំបានចុះតាមដានត្រួតពិនិត្យនិងវាយតម្លៃវឌ្ឍនភាពនៃយុទ្ធនាការ “ផ្ទះ១ អំពូល១” ដំណាក់កាលសាកល្បង ដែលមកដល់ពេលនេះក្រុមការងារកំពុងតែសស្រាក់សស្រាំរួសរាន់បញ្ចប់ការបំពាក់អំពូលសូឡាតាមផ្ទះជូនប្រជាពលរដ្ឋនៅក្នុងភូមិគំរូមួយនេះ អោយបានមុនដំណាច់ខែមករាតាមផែនការកំណត់។
មានរឿងដ៏គួរអោយភ្ញាក់ផ្អើលមួយ ដែលឆ្លុះបញ្ជាំងពីការចូលរួមនិងភាពជាម្ចាស់របស់បងប្អូនប្រជាពលរដ្ឋនៅក្នុងភូមិព្រះដាក់ នោះគឺការចូលរួមគាំទ្រពីសំណាក់អ្នកភូមិ តាមរយះការជួយជីករណ្តៅបង្គោលទម្រអំពូល កាប់មែកឈើដែលបាំងពន្លឺថ្ងៃ និងមានផ្ទះមួយចំនួនធំបានថែមទាំងចេញចំណាយថ្លៃសុីម៉ង់ត៍ ថ្មល្អិត និងខ្សាច់សម្រាប់ចាក់ការពារជើងអំពូលដោយខ្លួនឯងទៀតផង ។
បើទោះជាក្នុងដំណាក់សាកល្បងនេះ ពួកគាត់មិនត្រូវបានតម្រូវអោយចូលរួមអ្វីនោះឡើយ។ អរគុណដល់អ្នកភូមិព្រះដាក់ ចំពោះស្មារតីចូលរួម ស្រលាញ់ប្រយោជន៍រួម និងមានភាពស្រុះគ្នាជាសហគមន៍ »៕