ជាការពិតណាស់ ការពិតប្រជាជនខ្មែរជាច្រើនតែងត្រូវបានគេសរសើរថា ជាជនជាតិដែលរួសរាយ ចិត្តល្អ និងមានភាពស្មោះត្រង់ ក្នុងចំណោមប្រទេសអាស៊ីជាច្រើន តាមរយៈអំពើដែលស្តែងកន្លងមក។
ជាក់ស្តែងថ្មីៗនេះប្រជាជនខ្មែរបានសាងកេរ្តិ៍ឈ្មោះជាថ្មីម្តងទៀតហើយ ដោយសារតែមានជនបរទេសម្នាក់បានជួបរឿងដ៏គួរឱ្យភ្ញាក់ផ្អើលមួយនៃភាពស្មោះត្រង់របស់បុគ្គលិកម្នាក់ដែលធ្វើការនៅផ្សារមីនីម៉ាតមួយកន្លែងកាលពីអាទិត្យមុន។
រឿងរ៉ាវបានកើតឡើងតាំងពីសប្តាហ៍មុន ដោយដំបូងឡើយជនជាតិបរទេសឈ្មោះ Leliana Setiono បានទៅមីនីម៉ាតមួយកន្លែងម្តុំផ្សារបឹងកេងកង១ ដើម្បីទិញទឹកដោះគោ និងនំប៉័ង តែពេលគិតលុយអ្នកគិតលុយបានប្រាប់លោកថាឱ្យចាំបន្តិច លោកក៏ស្រលាំងកាំងហើយគិតថាប្រហែលមានរឿងអ្វីកើតឡើង លោកក៏រង់ចាំប្រមាណជា ៥នាទី។
៥នាទីក្រោយអ្នកគីតលុយបានហុចទូរស័ព្ទឱ្យលោកមើល ហើយបង្ហាញរូបលោកលើអេក្រង់ទូរស័ព្ទក្នុងកាំមេរ៉ាមីនីម៉ាតនេះ រួចសួរថា៖ « នេះជារូបលោកឬ? អាទិត្យមុនពេលលោកមកគិតលុយ លោកបានឱ្យលុយលើស 5$ ដូច្នេះខ្ញុំសុំសងលុយ 5$ របស់លោកវិញ »។
ក្រោយពីជួបរឿងនេះ ជនបរទេសមួយរូបនេះមានការភ្ញាក់ផ្អើលជាខ្លាំង មិននឹកស្មានថាគ្រាន់តែលុយ 5$ បុគ្គលិកម្នាក់នេះបានរង់ចាំឱ្យលោកវិញបែបនេះសោះ។ លោកក៏បានកោតសរសើរថាប្រជាជនក្រុងភ្នំពេញមានចិត្តល្អ និងមានភាពស្មោះត្រង់ណាស់ បើទោះបីជាក្រុងនេះមានបញ្ហាមួយចំនួន តែសម្រាប់ប្រជាជនសព្វថ្ងៃនេះ តែងតែមានមនុស្សល្អចេះជួយគ្នា និងមានស្មោះត្រង់ជានិច្ចគួរឱ្យសរសើរ៕