ថ្មីៗនេះនាវាទេសចរណ៍មួយគ្រឿងមានឈ្មោះថា MS Westerdam ជារបស់ក្រុមហ៊ុន Holland America Line មានផ្ទុកអ្នកដំណើរសរុប ២ ២៥៧នាក់ ដោយមានភ្ញៀវ ១ ៤៥៥នាក់ និងបុគ្គលិកនាវា ៨០២នាក់ ត្រូវបានប្រទេសចំនួន៥ បដិសេធមិនឱ្យធ្វើការចុះចតសោះ ក្រោយពីមានករណីឆ្លងវីរុសកាចសាហាវមួយ ដោយក្នុង៥ប្រទេសនោះមានដូចជា ប្រទេសថៃ ជប៉ុន កោះតៃវ៉ាន់ កោះហ្គាំ និងប្រទេសហ្វីលីពីន រហូតនាវាមួយគ្រឿងនេះអាចប្រឈមមុខនឹងការដាច់ស្បៀងផងដែរ។
ទោះជាយ៉ាងណាក៏ដោយ ក្រុមហ៊ុននាវាបានបកស្រាយថា ក្រុមហ៊ុនបានធ្វើការឆែកសុខភាពមនុស្សនៅក្នុងនាវាហើយ គ្មានអ្នកណាមានបញ្ហានោះទេ ហើយក៏មិនយល់ដែរហេតុអ្វីប្រទេសទាំងនោះមិនឱ្យនាវានេះចុះចត។
តែអាចថាជារឿងគួរឱ្យភ្ញាក់ផ្អើល បើយោងតាមរយៈវែបសាយព័ត៌មាន Channel News Asis បានបញ្ជាក់ថា ពេលនេះនាវាទេសចរណ៍នេះត្រូវបានប្រទេសកម្ពុជាយល់ព្រមទទួលឱ្យចុះចត ពោលគឺថ្ងៃព្រហស្បតិ៍ ទី ១៣ ខែកុម្ភៈ ឆ្នាំ ២០២០ នេះហើយនៅកំពង់ផែខេត្តព្រះសីហនុ។
#ព័ត៌មានបន្ថែមពី Theguardian
គួរឱ្យដឹងផងដែរថាក្នុងចំណោមអ្នកដំណើរលើនាវាមួយនេះ មាន 650 នាក់ មកពីសហរដ្ឋអាមេរិច 271 នាក់ ពីកាណាដា 127នាក់ ពីអង់គ្លេស 91 នាក់ពីហូឡង់ និងមួយចំនួនទៀតមកពី អូស្ត្រាលី អាល្លឺម៉ង់ ចិន រួមទាំងប្រទេសដទៃទៀត។ ហើយសម្រាប់ការរស់នៅ និងកម្មវិធីកម្សាន្តលើនាវាមួយនេះនៅតែមានភាពរីករាយជាធម្មតាប្រក្រតី តែការដែលប្រទេសមួយចំនួនមិនបានអនុញ្ញាតិឱ្យនាវានេះចុះចត នាវានេះអាចប្រឈមមុខនឹងការដាច់ស្បៀងបានផងដែរ។
បន្ថែមពីនេះតាមការរៀបរាប់ឱ្យដឹង នាវានេះធ្លាប់បានចុះចតនៅកោះហុងកុងប្រមាណជាជិត ២សប្តាហ៍ផងដែរ ក្នុងអំឡុងពេលមានករណីផ្ទុះវីរុសថ្មីនេះ៕
ប្រភព៖ channelnewsasia