គ្រប់គ្នាប្រាកដជាបានស្គាល់ហើយថា លោក Ben Davis គឺជាជនជាតិបរទេសមួយរូប ដែលមានចិត្តស្រលាញ់ និងការពារព្រៃឈើ ដោយលោកសុខចិត្តនាំទាំងគ្រួសារមករស់នៅក្នុងប្រទេសកម្ពុជា អស់រយៈពេលជិត ៣០ ឆ្នាំហើយ។
ហើយលោក Ben ក៏តែងតែផ្លាស់លំនៅដ្ឋានជាញឹកញាប់ នៅតាមបណ្តាខេត្ត និងតំបននានា ដេីម្បីជួយអភិរក្សទៅដល់សត្វព្រៃ និងការពារព្រៃឈើដែលកំពុងតែទទួលរងនូវការកាប់បំផ្លាញ ដោយពេលខ្លះលោកក៏បានសម្រក់ទឹកភ្នែកឈឺចាប់ ដែលលោកមិនអាចជួយព្រៃឈើកម្ពុជាបានច្រើនតាមលទ្ធភាពដែលលោកមាន ដោយបែបនេះហើយបានធ្វើឱ្យប្រជាជនកម្ពុជាមានការអាណិត និងកោតសរសើរលោកជាខ្លាំង។
អ្វីដែលនឹកស្មានមិនដល់ ពេលនេះតាមប្រភពព័ត៌មានច្បាស់ការណ៍បានឱ្យដឹងថា សកម្មជនស្រលាញ់ព្រៃឈើដែលជាជនជាតិបរទេសនេះ បានជួបទុក្ខធំជាថ្មីម្តងទៀតហើយ ដែលជាអំពើនឹកស្មានមិនដល់ពីជនអគតិមួយចំនួន បានលួចដុតស្ពានចូលច្រកផ្ទះរបស់លោកទាំង ២ផ្លូវតែម្តង ពោលគឺ ទាំងមកពីខាងសៀមរាប និងព្រះវិហារ។
មហាជនបានសម្តែងនូវការហួសចិត្ត និងអាណិតអាសូរដល់លោក Ben និងក្រុមគ្រួសារជាខ្លាំង មិននឹកស្មានថា នេះជាកាដូសម្រាប់អ្នកស្រលាញ់ការពារព្រៃឈើខ្មែរបែបនេះទេ។ ឯអ្នកខ្លះក៏បារម្ភពីសុវត្ថិភាពរបស់គ្រួសាររបស់លោក Ben ផងដែរ ព្រោះទង្វើទាំងនេះអាចជាទង្វើពួកឈ្នួញខុសច្បាប់ ដែលលោក Ben នេះហើយគឺជាជនដែលរារាំងមុខរបររកស៊ីរបស់ពួកគេ៕