វៀតណាម៖ ពិតជារឿងមួយដ៏ភ្ញាក់ផ្អើលនឹកស្មានមិនដល់ ដែលសូម្បីតែកូនស្រីអ្នកជំនួញជាសេដ្ឋីប្រទេសវៀតណាម ថែមទាំងជាអ្នកបង្ហាញម៉ូតល្បីមួយរូប ក៏ស្រាប់តែរកឃើញថាបានឆ្លងវីរុស Covid-19 នេះដែរ។
ស្រីស្អាតល្បីឈ្មោះ ត្រូវបានគេស្គាល់ថាជាកូនអ្នកជំនួញជនជាតិវៀតណាមម្ចាស់ក្រុមហ៊ុនដែកថែប ដែលមានទីតាំងនៅក្នុងប្រទេសវៀតណាម និងទីក្រុងឡុងដ៏ល្បីឈ្មោះ ត្រូវបានគេដឹងថាមានឈ្មោះ Nga Nguyen អាយុ២៧ឆ្នាំ បានរកឃើញតេស្ត Covid-19 វិជ្ជមានក្រោយពីបានចូលរួមការបង្ហាញម៉ូត Saint Laurent នៅទីក្រុងប៉ារីស និង Gucci នៅឯទីក្រុង Milan ប្រទេសអ៊ីតាលី។
កាលពីបង្ហាញម៉ូតនៅក្នុងកម្មវិធីធំខាងលើ Nga Nguyen ក៏បានបង្ហោះរាល់សកម្មភាព ដែលនាងបានចូលរួមផងដែរ នៅលើគណនី Instagram របស់នាង តែក្រោយពីបានរកឃើញថានាងផ្ទុកវីរុស Covid-19 រូបទាំងនោះក៏ត្រូវបានលុបចោលភ្លាមៗតែម្តង។
គួរឱ្យដឹងផងដែរថា គេនៅមិនទាន់ដឹងច្បាស់នៅឡើយនោះទេថា Nga Nguyen បានឆ្លងវីរុស Covid-19 នៅក្នុងកម្មវិធីដើរម៉ូត ឬយ៉ាងណានោះទេ ព្រោះពេលជាមួយគ្នានោះនាងក៏បានដើរកម្សាន្តនៅអឺរ៉ុបជាមួយប្អូនស្រីរបស់នាងឈ្មោះ Nguyen Hong Nhung អាយុ ២៦ ឆ្នាំដែរ ដែលប្អូននាងក៏រកឃើញថាមានតេស្តវិជ្ជមាន Covid-19 ដូចគ្នា៕
ប្រភព៖ South China Morning Post