ភ្នំពេញ៖ ផលិតកម្ម LD Picture ជាផលិតកម្មខ្មែរមួយ ដែលតែងផលិតរឿងជាច្រើនចាក់បញ្ចាំងក្នុងរោងកុន និងស្ថានីយទូរទស្សន៍ ប្រកបដោយគុណភាពគួរឱ្យកត់សម្គាល់។ គេតែងឃើញឈ្មោះផលិតកម្មនេះ លេចមុខជារៀងរាល់ឆ្នាំ ក្នុងរឿងខ្មែរ ដែលសុទ្ធតែទទួលបានការគាំទ្រយ៉ាងច្រើន ដូចជា អាបពាក់មួកសុវត្ថិភាព ថតកុន ចិញ្ចៀនខ្មោច និងរឿង អង្រឹងជាដើម។
ប៉ុន្មានខែមុនចាងហ្វាង និងអ្នកដឹកនាំរឿង នៃផលិតកម្ម LD Picture លោក លៀក លីដា បានប្រកាសក្នុងបណ្ដាញសង្គម Facebook របស់លោកអមដោយរូបភាពជាច្រើនសន្លឹកថា ក្រុមការងាររបស់លោកបានដំណើរការផលិតរឿង “The Clock : Spirit Awakening” ដែលជាប្រភេទរឿងរន្ធត់ នៅសម័យបុរាណ ដោយមានការចូលរួមសម្ដែងពី តារាសម្ដែងបរទេសផងដែរ ដែលសាច់រឿងថ្មីដែលគ្រោងចាក់បញ្ចាំងនោះ ផលិតករបានប្រកាសថា លោកបានដាក់ទន់ចំណាយច្រើនជាងមុនដល់ទៅ ១០ដង ដើម្បីចង់ឱ្យខ្សែភាពយន្តខ្មែរមួយនេះអាចទៅកាន់ទីផ្សារបរទេសបាន។
មុននេះបន្តិចគណនីហ្វេសបុករបស់លោក លៀក លីដា បានធ្វើការបង្ហោះរូបភាព មួយផ្ទាំងដែលជារូបភាព ផ្សព្វផ្សាយខ្សែភាពយន្តថ្មីរបស់លោក «The Clock : Spirit Awakening» ដែលមើលទៅគួរឱ្យចាប់អារម្មណ៍ និងគួរឱ្យខ្លាចមែនទែន។ គួរបញ្ជាក់ផងដែរថា រូបនេះលោកបានបញ្ជាក់ថាត្រឹមជា Unofficial Poster តែប៉ុណ្ណោះ ប៉ុន្តែគ្រាន់តែរូបភាពមិនផ្លូវការស្អាតប៉ុណ្ណឹងហើយ ចុះទម្រាំរូបភាពផ្លូវការ វិញបែបណា មានតែរង់ចាំទស្សនាទាំងអស់គ្នា។
គួរបញ្ជាក់ថា រឿងនេះបានដំណើរការថតនៅក្នុងខេត្តបាត់ដំបង ជាប្រភេទរឿងរន្ធត់ដែលដំណាលពីស្រ្តីជនជាតិបារាំងម្នាក់ដែលបានសម្លាប់ខ្លួនដោយសានាងមានជំងឺផ្លូវចិត្ត។ ការស្លាប់របស់នាងមានទាក់ទងទៅនិងបទ Gloomy Sunday ដែលជាបទគេសង្ស័យថាបានសម្លាប់មនុស្សជាច្រើននាក់ក្នុងអំឡុងឆ្នាំ ១៩៤០។ ពួកយើងនឹងរង់ចាំគាំទ្រស្នាដៃកូនខ្មែរមួយនេះនៅពេលលេចចេញជារូបរាងលើផ្ទាំងក្រណាត់ស ក្នុងពេលឆាប់ៗនេះ៕
រូបភាព និងអត្ថបទ៖ Facebook Lyda Pic Pro