កាលពីថ្ងៃទី ១៣ ខែសីហា ឆ្នាំ២០១៩ វេលាម៉ោង១២និង៤៨នាទីយប់រំលងអាធ្រាត្រ មានការណីចោរលួចគាស់ផ្ទះមួយ នៅភូមិចំការចេក ស្រុកភ្នំស្រួច ខេត្តកំពង់ស្ពឺ តែត្រូវបាននារីរូបស្រស់ជើងខ្លាំងម្ចាស់ផ្ទះម្នាក់ បានបញ្ចេញថ្វីដៃចាប់ចោរប្រគល់ឱ្យសមត្ថកិច្ច។
ដោយដំបូងឡើយ ជនសង្ស័យគាស់ផ្ទះម្នាក់បានពាក់មួកក្រណាត់ធ្វើដូចនិនចា ត្រូវបាននារីម្ចាស់ផ្ទះឃើញមុន ក៏បានវាយ រួចហើយបានហៅក្រុមគ្រួសារចាប់ខ្លួនប្រគល់ឲ្យសមត្ថកិច្ចចាត់ការតាមច្បាប់។
នៅក្នុងនោះជនសង្ស័យមានឈ្មោះ ភួង ចាន់ថន ហៅចាន់ ភេទប្រុស អាយុ៣៩ឆ្នាំ នៅភូមិក្បាលអូរ ឃុំគ ស្រុកត្បូងឃ្មុំ ខេត្តត្បូងឃ្មុំ មានប្រវត្តិធ្លាប់ជាប់ពន្ធនាគារខេត្តត្បូងឃ្មុំ ចំនួន ០២លើកមកហើយ ”ពីបទលួច”។
ក្រោយពេលឃាត់ខ្លួនសមត្ថកិច្ចបានដកហូតវត្ថុតាង រួមមាន ទុនឺវីសដងវែងចំនួន០១ ទូរស័ព្ទអិនចុចពិលចំនួន០១ ស្រោមបិទមុខចំនួន០១ ។