ភ្នំពេញ៖ គូស្នេហមួយគូដែលធ្លាប់ត្រូវបានគេស្គាល់ថាជាគូស្នេហ៍ដែរលឧស្សាហ៍ថតឃ្លីបសំណើច និងលក់ផលិតផលអនឡាញ មានឈ្មោះ បងវែងអូនតឿ បានធ្វើឱ្យអ្នកលេងបណ្តាញសង្គមកាន់តែមានការចាប់អារម្មណ៍ខ្លាំង ក្រោយពីទម្លាយប្រវត្តិស្នេហាគ្មានការរៀបការអស់ដល់ទៅរយៈពេល ៤ឆ្នាំ ថែមទាំងមានកូន២ទៀត ទម្រាំដាច់ចិត្តដឹកដៃគ្នាចូលរោងការ។
យោងទៅតាមគណនីហ្វេសប៊ុក អូនតឿ បងវែង បានរៀបរាប់ថា៖
«ទើបតែរៀបការ? #កូន2ហើយបានការ? ពិតជាឆ្ងល់មែនទេ? ខ្ញុំចង់និយាយប្រាប់អ្នកទាំងអស់គ្នាថា ខ្ញុំរស់នៅជាមួយគ្នាក្នុងនាមជាប្តីប្រពន្ធ ស្របតាមច្បាប់(ចុះអេតាស៊ីវិល) អស់រយ:ពេល4ឆ្នាំហើយដោយមានតែការសែនព្រេនតិចតួចបំផុត ជំនួសការរៀបការ កុំអោយមេប៉ាខឹង។ ពួកយើងស្គាល់គ្នាតាមfbតែ7ថ្ងៃក៏ធ្វើជាសង្សារ។បាន15ថ្ងៃក៏មកជួបមុខគ្នា ដោយមានចាស់ទុំដឹងលឺ ភ្ជាប់ពាក្យ ដោយគ្រាន់តែពាក់ចញ្ជៀនអោយគ្នា។ គ្មានបណ្តាការ អ្វីទាំងអស់។ ពួកខ្ញុំទាំង2សំរេចចិត្តសុំច្បាប់ចុះលិខិតអាពាហ៍ពិពាហ៍ ដើម្បីអោយបានក្លាយជាប្តីប្រពន្ធដោយស្របច្បាប់សិន។ដោយសារក្រីក្រ ពួកខ្ញុំបាននិយាយគ្នាថានឹងរៀបការនៅពេលមានលិទ្ធភាពគ្រប់គ្រាន់។ រយៈពេល4ឆ្នាំ ក្រោយការខិតខំ ពួកយើងមាន ផ្ទះថ្មី មានផលិតផលជាប្រេន បងវែងអូនតឿ និងចាកចេញពីភាពក្រីក្រ។សូមជូនសារនេះដល់បងប្អូនទាំងអស់ដែមានរឿងស្រដៀងខ្ញុំ។ សូមកុំស្តាប់ពាក្យអ្នកដទៃនិយាយមកលើអ្នក។ អោយតែច្បាស់ថាខ្លួនអ្នកមិនបានធ្វើខុសចំពោះច្បាប់បានហើយ។ មនុស្សខ្លះជេរដៀលយើងថាយើងមិនរៀបការ នាំអោយខូចប្រពៃណី។ តែសុំសួរវិញថា បើគ្មានលុយ ការបែបណា? ទោះបីសែនក៏អស់គួរសមដែរ។ អ្នកអត់ពិតជាអត់មែន។ តើការរៀបការ និងការចុះអេតាស៊ីវិលមួយណាសំខាន់ជាង?
ចំលើយរបស់ខ្ញុំ គឺមិនសំខាន់ទាំង2។អ្វីដែលសំខាន់គឺដៃគូរ យល់ចិត្តនិងស្រលាញ់គ្នា ទោះរៀបការ ក៏អាចបែកគ្នា មានលិខិតបញ្ជាក់អាពាហ៍ពិពាហ៍ ក៏នៅតែអាចលែងគ្នាដល់តុលាការ។ ទាំង2នេះគ្រាន់តែជាអណះអំណាងមួយដែល កុំអោយគេនិយាយដើម និងការពារហេតុការណាមួយពេលមានការបែកបាក់ចំពោះព្រទ្យរួម។ កុំចុះចាញ់កុំខ្មាស់ គ្មានអ្នកណាមិនចង់ល្អទេ គ្រាន់តែមុននិងក្រោយ អោយតែមានលុយ និងមានសេចក្តីថ្លៃថ្នូរក្នុងខ្លួន។ អ្នកដែលពេបជ្រាយ រកឡេះមើលងាយយើងគ្រាន់តែជាសត្វមនុស្សតែប៉ណ្ណោះ។ បើជាមនុស្សគេពិតជាចេះគិតនិងស្វែងយល់ហើយ។»
ក្រោយពីស្តាប់រឿងរ៉ាវរបស់អ្នកទាំង២ ធ្វើឱ្យអ្នកលេងបណ្តាញសង្គមជាច្រើនមានក្តីរំភើបមែនទែនចំពោះស្នេហាតស៊ូស្មោះស្ម័គ្ររបស់អ្នកទាំង២ ដោយមិនខ្លាចឧបសគ្គ ថែមទាំងទទួលបានជីវិតមួយដ៏ត្រចះត្រចង់ដូចពេលនេះផងដែរ៕