ប្រទេសចិន៖ ពិធីបុណ្យចូលឆ្នាំចិនកាន់តែកៀកចូលមកដល់ហើយ តើអ្នកមានធ្លាប់ឆ្ងល់ទេថាមូលហេតុអ្វីបានជាឱ្យតែជិតដល់ពិធីបុណ្យចូលឆ្នាំចិនម្ដងៗ គេតែងនិយមតាំងលម្អផ្កាអង្គារសីល ឬដើមក្រូចដាក់នៅក្នុងផ្ទះ ឬនៅកន្លែងរកស៊ី? តើការដាក់តាំងផ្កាទាំងនេះ មានអត្ថន័យបែបណា?
ដូចធ្លាប់បកស្រាយនៅអត្ថបទមុនៗរួចហើយ ពីជំនឿជាច្រើនរបស់ជនជាតិចិន តែលើកនេះ Sadlife សូមលើកយកជំនឿនៃការតាំងលម្អដើមផ្កាអង្គារសីល និងដើមក្រូចដើម្បីដាក់តាំង។ ទាក់ទងនឹងជឿនឿនេះ ជនជាតិចិនតែងជឿថា គេនឹងទទួលបានលាភជ័យ សំណាងក្នុងឆ្នាំថ្មី ព្រោះផ្កាអង្គារសីល ពណ៌របស់វា ត្រូវបានតំណាងឱ្យពណ៌មាស ជាពណ៌ដែលនាំមកនូវទ្រព្យសម្បត្តិ ភាពរុងរឿង និងហេងៗ ក្នុងឱកាសឆ្នាំថ្មី។ រីឯដើមក្រូច ត្រូវតែមានផ្លែខ្ចីខ្លះ ទុំខ្លះ ហើយស្លឹកវិញត្រូវមានសភាពចំណាស់បន្តិច។ ផ្លែក្រូចត្រូវមានកញ្ចុំផ្លែថ្មី ដែលមានន័យថា លុយ និងសំណាង នឹងហូរចូលក្នុងគ្រួសារ ឬកន្លែងរកស៊ី ក្នុងឱកាស ចូលឆ្នាំថ្មី និងលាភសំណាងពេញមួយឆ្នាំ។ គេក៏និយមយកអាំងប៉ាវពណ៌ក្រហមមកចងព្យួរលើដើមផ្កាអង្គារសីលដែរ ព្រោះពណ៌ក្រហម ក៏ជាពណ៌ដែលប្រជាជនចិន ជឿជាក់ថាជាពណ៌នាំលាភសំណាងដូចគ្នា។
គួរបញ្ជាក់ថា ពិធីបុណ្យចូលឆ្នាំចិន នឹងប្រារព្វចាប់ពីថ្ងៃទី ៥-៦-៧ ខែកុម្ភៈ ឆ្នាំ ២០១៩ ហើយថ្ងៃសែនចូលឆ្នាំគឺនៅថ្ងៃទី ០៤ កុម្ភៈ។ តើអ្នកបានត្រៀមខ្លួនរួចហើយឬនៅ សម្រាប់ទទួលសំណាង និងលាភជ័យក្នុងឆ្នាំថ្មី? សូមជូនពរឱ្យឆ្នាំថ្មី ពោរពេញដោយសំណាងល្អ និងជោគជ័យគ្រប់ៗគ្នា៕
អានអត្ថបទពី៖ រឿងដែលហាមដាច់ខាត នៅថ្ងៃចូលឆ្នាំចិន (គួរតែអាន)