ថ្ងៃទី ១៤ ខែកុម្ភៈ ឆ្នាំ ២០២០ ត្រូវបានគេដឹងជាសកលថា ជាថ្ងៃនៃក្តីស្រលាញ់ ឬ Valentine's day ពោលជាថ្ងៃពិសេសសម្រាប់អ្នកដែលមានគូស្នេហ៍ និងចំណាយពេលជាមួយមនុស្សជាទីស្រលាញ់ដូចជាក្រុមគ្រួសារជាដើម។
តែសម្រាប់ក្មេងៗស្រុកខ្មែរ ជាពិសេសសិស្សសាលាបានយកថ្ងៃនេះ ជាថ្ងៃជ្រួលជ្រើមតាមគ្នា ដូចជាគេចសាលា គេចម៉ោងសិក្សា ដើរលេង ឬណាត់ជួបសង្សា ដែលពេលខ្លះថែមទាំងប្រព្រឹត្តអំពើផ្តេសផ្តាសខុសសីលធម៌ទៀតផង។
ដូច្នេះហើយ នៅព្រឹកថ្ងៃទី ១១ ខែកុម្ភៈ ឆ្នាំ ២០២០ ក្រសួងអប់រំយុវជន និងកីឡា បានចេញសេចក្ដីណែនាំ ស្ដីពី វិធានការទប់ស្កាត់សកម្មភាពមិនប្រក្រតីក្នុងទិវានៃក្ដីស្រឡាញ់នៅតាមគ្រឹះស្ថានសិក្សាសាធារណៈ និងឯកជន ដូចខាងក្រោមនេះ ៖
១. ត្រូវផ្សព្វផ្សាយដល់សិស្សានុសិស្ស តាមគ្រប់មធ្យោបាយ ដូចជាតាមរយៈការប្រជុំ នៅពេលគោរពទង់ជាតិ កុំឲ្យមានការយល់ខុស អំពីអត្ថន័យនៃទិវា នៃក្ដីស្រឡាញ់។
២. ត្រូវពង្រឹងការអនុវត្តវិន័យ ឲ្យបានម៉ឺងម៉ាត់ ជាពិសេសលើការគ្រប់គ្រងសីលធម៌ ដោយតាមដានអវត្តមានរបស់សិស្សានុសិស្សជាប្រចាំ។
៣. ត្រូវជំរុញដំណើរការ របស់ក្រុមប្រឹក្សាយុវជន ក្រុមប្រឹក្សាកុមារប្រចាំសាលា ដោយអនុវត្តសកម្មភាព «មិត្តអប់រំមិត្ដ»។
៤. ត្រូវធ្វើទំនាក់ទំនងជិតស្និទ្ធជាមួយមាតាបិតា អ្នកអាណាព្យាបាលសិស្ស និងសហគមន៍ដើម្បីផ្ដល់ និងទទួលព័ត៌មាននានា ពាក់ព័ន្ធនឹងសកម្មភាពមិនប្រក្រតី ដែលប្រព្រឹត្តដោយសិស្សានុសិស្ស ដើម្បីសហការទប់ស្កាត់ អប់រំណែនាំកែលម្អសិស្សានុសិស្ស បានទាន់ពេលវេលា៕