កាលពីព្រឹកថ្ងៃទី ១៣ ខែ កុម្ភៈ ឆ្នាំ ២០២០ នេះផងដែរ នាវាទេសចរណ៍ខ្នាតយក្សរបស់អាមេរិក Westerdam បានចូលសំចតនៅកំពង់ផែក្រុងព្រះសីហនុដោយដឹកអ្នកដំណើរសរុបជាង ២,២០០ នាក់ ក្នុងនោះមានអ្នកដំណើរ ១៤៥៥ នាក់ និងបុគ្គលិក ៨០២ នាក់ ដែលចាកចេញពីទីក្រុងហុងកុង កាលពីថ្ងៃទី ០១ ខែ កុម្ភៈ ឆ្នាំ ២០២០។
នាវាទេសចរណ៍ Westerdam នេះត្រូវបានអាជ្ញាធរកោះតៃវ៉ាន់ ហ្វីលីពីន ជប៉ុន កូរ៉េខាងត្បូង កោះហ្គាំ និងប្រទេសថៃ បដិសេធមិនឲចូលចតឡើយ។
ឈានចូលដល់យប់ថ្ងៃទី ១៥ ខែ កុម្ភៈ ឆ្នាំ ២០២០ នេះគឺក្រសួងសុខាភិបាលម៉ាឡេស៊ី បានប្រកាសថា បានរកឃើញនូវវីរុស COVID-19 នៅលើខ្លួនអ្នកដំណើរភេទស្រីវ័យ ៨៣ ឆ្នាំម្នាក់ដែលជាអ្នកដំណើរលើនាវាទេសចរណ៍ Westerdam នេះ ដោយអ្នកដំណើររូបនេះហោះចេញពីប្រទេសកម្ពុជា ប៉ុន្តែស្វាមីរបស់គាត់គឺពុំបានរកឃើញថាបានឆ្លងវីរុស COVID-19 នោះទេ។
ក្នុងថ្ងៃទី ១៦ ខែ កុម្ភៈ ឆ្នាំ ២០២០ នេះផងដែរ ស្ថានទូតអាមេរិកប្រចាំប្រទេសកម្ពុជា បានប្រកាសតាមបណ្ដាញសង្គម Twitter ថាខ្លួននឹងសហការជាមួយអាជ្ញាធរកម្ពុជា ក៏ដូចជាស្ថានទូតក្នុងតំបន់ និងក្រុមការងារនាវានឹងយកចិត្តទុកដាក់និងធានាលើបញ្ហាមួយនេះ៕