បើនិយាយពីភាពយន្តបែបរន្ធត់ តក់ស្លុត អាចនិយាយបានថាគឺជាប្រភេទភាពយន្តមួយដែលទទួលបានការពេញនិយមជាខ្លាំងសម្រាប់ប្រជាជនខ្មែរ ជាពិសេសយុវវ័យតែម្តង សម្រាប់ការទស្សនាតាមបណ្តារោងភាពយន្តនានា។
សម្រាប់ថ្មីៗនេះផងដែរ The Invisible Man គឺជាសាច់រឿងថ្មីបែប រន្ធត់ តក់ស្លុត បង្កប់អាថ៌កំបាំង និងវិទ្យាសាស្រ្តបែបថ្មីទំនើបមួយទៀតហើយ ដែលបានលើកយកមកចាក់បញ្ជាំងនៅស្រុកខ្មែរយើងនេះ ដោយគ្រាន់តែមើលTrailer ខ្លីៗក៏ភ័យបុកពោះ គួរឱ្យចង់ទស្សនាផងដែរ។
The Invisible Man និយាយពីស្ត្រីម្នាក់ឈ្មោះ Cecilia Kass ដែលរស់នៅជាមួយស្វាមីដែលជាមហាសេដ្ឋី និងអ្នកវិទ្យាសាស្រ្តដ៏ពូកែម្នាក់ តែទំនាក់ទំនងជីវិតគ្រួសារបែរជាមានតែអំពើហិង្សា និងការឈ្លោះប្រកែកគ្នា រហូតនាងបានព្យាយាមរត់គេចពីផ្ទះ។
ក្រោយមរណភាពប្តីរបស់នាង Cecilia ដែលរស់នៅដោយភាពភ័យខ្លាចកន្លងមកពីការលាក់ពួនពីស្វាមីនាង បានត្រលប់មកប្រើជីវិតធម្មតាវិញ តែភាពភ័យខ្លាចដែលបានបន្សល់ទុកបានធ្វើឱ្យនាងមានអារម្មណ៍ប្លែកៗ និងតក់ស្លុត គ្រប់ពេលវេលា រហូតមានអារម្មណ៍ថាមានមនុស្សនៅជិតនាងរហូត ដែលទាំងនេះបានធ្វើឱ្យគ្រប់គ្នាយល់ថានាងមានសតិមិនល្អ។
គួរឱ្យដឹងផងដែរថា រឿង The Invisible Man គឺជាសាច់រឿងបែបថ្មី មាន Plot Twist គួរឱ្យជក់ចិត្តតាមដាន លើសពីភាពភ័យខ្លាចរន្ធត់ និងធ្វើឱ្យអ្នកទស្សនាស្រឡាំងកាំងភ្ញាក់ផ្អើលនូវឈុតចុងក្រោយ ដោយរឿងនេះដែរ បានធ្វើការចាក់បញ្ជាំងជាពិសេស Pre-Screening នៅរោងភាពយន្ត Prime Cineplex សាខាថ្មីទួលគោក (Samai Square) នៅល្ងាចថ្ងៃទី ២៥ ខែកុម្ភៈ នេះ ដោយទទួលបានការគាំទ្រ និងលាន់មាត់សរសើរថាល្អមើលគ្រប់គ្នា។
កុំភ្លេចណា ចង់ដឹងថាសាច់រឿងនេះមានភាពប្លែកថ្មីយ៉ាងណា សូមរង់ចាំទស្សនារឿង The Invisible Man ដែលនឹងមានចាក់បញ្ចាំងនៅគ្រប់បណ្តារោងភាពយន្តចាប់ពីថ្ងៃទី២៦ ខែកុម្ភៈ ឆ្នាំ ២០២០ នេះហើយ៕