វីរុសកូវីដ-១៩ នៅតែវាយលុកយ៉ាង ដោយចំនួនអ្នកឆ្លងជុំវិញសកលលោកនៅតែមានការកើនឡើង។ វីរុសនេះគឺធ្វើឲ្យប៉ះពាល់យ៉ាងខ្លាំងដល់ផ្លូវដង្ហើមដោយវានឹងធ្វើឲ្យយើងពិបាកក្នុងការដកដង្ហើមហើយប៉ះពាល់សួតថែមទៀតផង។ វិធីការពារគឺមានច្រើនរបៀបដោយមានការណែនាំពីអង្គការសុខភាពពិភពលោក (WHO) ក៏ដូចជា ក្រសួងសុខាភិបាលប្រចាំព្រះរាជាណាចក្រកម្ពុជាផងដែរ។
ក្នុងឪកាសនេះផងដែរ ឧកញ៉ាវេជ្ជបណ្ឌិត គួច ម៉េងលី ក៏បានណែនាំនូវវិធីសាស្រ្តមួយផងដែរដែលអាចជួយបង្ការរោគផ្លូវដង្ហើមដ៏ល្អបំផុតដែលយើងត្រូវខ្ពុរមាត់ជាមួយទឹកក្ដៅឧណ្ហៗលាយទឹកអំបិល។
ឧកញ៉ាវេជ្ជបណ្ឌិត គួច ម៉េងលី បានសរសេរណែនាំនេះតាមរយៈហ្វេសប៊ុកផេករបស់លោកដែលមានឈ្មោះថា MJQ University Press ដោយលោកបានសរសេរថា៖
"ក្រៅពីធ្វើឱ្យអញ្ចាញធ្មេញស្រស់ស្អាត និងមាត់ធ្មេញគ្មានក្លិនស្អុយ ការខ្ពុរមាត់និងបំពង់ក នឹងទឹកក្ដៅឧណ្ហៗលាយជាមួយទឹកអំបិលប្រៃឡែមៗ ឬដុសធ្មេញជាមួយនឹងទឹកអំបិល ក៏ជួយបង្ការរោគផ្លូវដង្ហើមដ៏មានប្រសិទ្ធភាពផងដែរ។ មិនតែប៉ុណ្ណោះ វាក៏អាចជួយកាត់បន្ថយជំងឺពងបែកក្នុងមាត់ រលាកបំពង់ក ដំបៅទងស៊ុល ផ្ដាសាយ ផ្ដាសាយធំ ជំងឺរើម ជ្រាំងអណ្ដាត និងរោគឆ្លងផ្សេងៗជាច្រើនទៀត។ មែនទែនទៅ ការខ្ពុរមាត់នឹងទឹកក្ដៅឧណ្ហៗលាយជាមួយទឹកអំបិល វាអាចជួយកាត់បន្ថយរោគឆ្លងបានរហូតដល់ ៥០% ឯណោះ ប្រសិនបើយើងខ្ពុរឱ្យបាន៤ទៅ៥ដងក្នុងមួយថ្ងៃ។ ប៉ុន្តែខ្ញុំសូមបញ្ជាក់ថា នៅពេលខ្ពុរមាត់និងបំពង់ករួចហើយ យើងត្រូវខ្ជាក់ទឹកខ្ពុរមាត់នោះចេញវិញ កុំលេបចូលទៅក្នុងពោះ។ ម្យ៉ាង បន្ទាប់ពីខ្ពុរមាត់ទឹកក្ដៅឧណ្ហៗលាយជាមួយទឹកអំបិលរួចហើយ យើងត្រូវពិសាទឹកមួយកែវធំដើម្បីបញ្ជូនមេរោគពីបំពង់កទៅក្រពះ ដើម្បីឱ្យអាស៊ីតនៅក្នុងក្រពះសម្លាប់មេរោគនោះ។ ហើយបើអាចទេ ក្នុងមួយថ្ងៃត្រូវពិសាទឹកឱ្យបានចន្លោះពី១លីត្រកន្លះទៅ២លីត្រ ព្រោះវាជួយកាត់បន្ថយជំងឺបានច្រើនមែនទែន។
រឿងមួយទៀតដែលយើងគួរធ្វើដែរនោះ គឺយើងត្រូវលាងដៃនឹងសាប៊ូឱ្យបានញឹកញាប់ គ្រប់ពេលមុនទទួលទានចំណីអាហារ និងក្រោយពេលចាប់កាន់ឬប៉ះពាល់របស់អ្វីមួយដែលយើងគិតថាគ្មានសុវត្ថិភាព។ មិនតែប៉ុណ្ណោះ សម្ភារៈប្រើប្រាស់មាន ចាន ឆ្នាំង ស្លាបព្រា ផ្តិលទឹក និងកែវផឹកទឹកជាដើម យើងត្រូវលាងសម្អាតនឹងសាប៊ូឱ្យស្អាតជាប្រចាំ រាល់ពេលប្រើប្រាស់។ ហើយគ្រប់ពេលចេញទៅក្រៅ និងរាល់ពេលសន្ទនាគ្នា ទោះមនុស្សជិតស្និតធ្លាប់ស្គាល់ប្រវត្តិគ្នា ឬមិនស្គាល់ប្រវត្តិគ្នាក៏ដោយ យើងត្រូវពាក់ម៉ាស់ការពារជានិច្ច។ មួយវិញទៀត នៅពេលជួបនិយាយសន្ទនាគ្នា យើងត្រូវរក្សារចម្ងាយឱ្យបានឃ្លាតឆ្ងាយពីគ្នាយ៉ាងតិច១ម៉ែត្រ ឬកាន់តែឆ្ងាយកាន់តែល្អ។ យើងគួរបញ្ឈប់ការចាប់ដៃគ្នា និងឱបកៀកកគ្នា ដោយគ្រាន់តែលើកដៃសំពះសួរសុខទុក្ខគ្នាតាមបែបប្រពៃណីខ្មែរ។
ខ្ញុំសូមបញ្ជាក់ម្ដងទៀតថា ដើម្បីមានសុខភាពល្អ និងបង្ការការឆ្លងជំងឺផ្សេងៗ ជាពិសេសជំងឺកូវីដ-១៩ យើងត្រូវខ្ពុរមាត់នឹងទឹកក្ដៅឧណ្ហៗដែលលាយទឹកអំបិលប្រៃឡែមៗឱ្យបានញឹកញាប់ និងត្រូវដុសសម្អាតធ្មេញឱ្យបាន៣ដងក្នុងមួយ គឺពេលព្រលឹមឡើង (ភ្ញាក់ពីគេង) ពេលថ្ងៃ (ញ៉ាំអាហាររួច) និងពេលយប់មុនចូលគេង (ក្រោយពេលញ៉ាំអាហាររួច)។ ជាពិសេស យើងត្រូវរស់នៅស្អាត ហូបស្អាត និងផឹកស្អាត៕"
ដូច្នេះហើយ សូមបងប្អូនប្រជាពលរដ្ឋទាំងអស់បង្កើនការប្រុងប្រយ័ត្ន ព្រមទាំងចូលរួមថែរក្សាអនាម័យទាំងអស់គ្នា ហើយបើមិនចាំបាច់នោះ សូមនៅផ្ទះទាំងអស់គ្នា កុំចេញទៅក្រៅឲ្យសោះ៕