ការទទួលទានបាយ វាជារឿងសាមញ្ញ ជាទម្លាប់ដែលយើងមិនអាចរំលងជារៀងរាល់ថ្ងៃ តែយ៉ាងណាក៏មានបង្កប់នូវទម្លាប់មិនល្អ ៥ ដែលមនុស្សភាគច្រើនមើលរំលង ហើយវាអាចបង្កគ្រោះថ្នាក់ខ្លាំងដល់សុខភាពមនុស្ស៖
៥) ទទួលទានបាយក្តៅពេក
ការទទួលទានបាយក្តៅពេក បើទោះបីវាមានឱជារសឆ្ងាញ់ តែអាចជំរុញឲ្យយើងកើតជំងឺមហារីកដោយមិនដឹងខ្លួន។
ការស្រាវជ្រាវបង្ហាញថា អាហារដែលមានសីតុណ្ហភាពលើសពី ៦០ អង្សា អាចធ្វើឲ្យសរីរាង្គនៃស្រទាប់បំពង់អាហាររងការខូចខាត ហើយបើលើសដល់ ៧០ អង្សា នោះអាចធ្វើឲ្យរលាកក្រពះ។ យកល្អបាយក្រោយដាំពុះ គួរទុកត្រឹមចន្លោះ ៣៥ ទៅ ៤០ អង្សា ឬអាចថា ៤៥ អង្សាសេគឺល្អបំផុតហើយសម្រាប់ការទទួលទាន។
៤) និយាយឬមើលទូរទស្សន៍កំឡុងពេលទទួលទាន
ការជួបជុំគ្នាច្រើន ទទួលទានបណ្តើរនិយាយបណ្តើរ មើលទូរទស្សន៍បណ្តើរ នេះជាទម្លាប់មិនល្អទេ ព្រោះទម្លាប់នេះ វាធ្វើឲ្យឈាមមានលំហូរច្រើនទៅកាន់ខួរក្បាល បណ្តាលឲ្យប្រព័ន្ធរំលាយអាហារ ដំណើរការមិនល្អ ពោលអាចដាក់បន្ទុកលើក្រពះ ប៉ះពាល់ដល់ការស្រូបយកអាហារ។
គ្រូពេទ្យណែនាំឲ្យអ្នកទំពាអាហារឲ្យបានម៉ត់ល្អ ទទួលទានយឺតៗ កុំប្រញាប់និយាយ កុំប្រញាប់ផ្តោតអារម្មណ៍ទៅលើការទស្សនាអ្វីមួយ។ ជាពិសេសការទទួលទានបណ្តើរ ទស្សនាអ្វីមួយបណ្តើរ ក៏នាំឲ្យអ្នកទទួលទានច្រើនដោយមិនដឹងខ្លួន ហើយអាចឡើងទម្ងន់ប៉ះពាល់សុខភាពមួយផ្នែកផ្សេងថែមទៀត។
៣) ទទួលបាយច្រើនពេក
បាយជារបស់ខ្វះមិនបាន តែក៏មិនមានន័យថា ចាំបាច់ត្រូវតែទទួលទានច្រើនដែរ ព្រោះវាអាចបណ្តាលឲ្យមានជាតិស្ករក្នុងឈាមកើនឡើង។ ជាមូលហេតុបង្កឲ្យកើតជំងឺទឹកនោមផ្អែមដោយមិនដឹងខ្លួន ក៏អាចមានជំងឺបេះដូង លើសឈាម ដោយសារតែការទទួលទានបាយច្រើនពេកជាប្រចាំនេះផងដែរ។
២) ទទួលទានបាយសល់
បាយដែលសល់ទុកចោលមួយយប់ហើយ យកមកចម្អិនវិញ ឬយកមកឆាទទួលទានពេលបន្ទាប់ ក៏មិនល្អនោះដែរ។ ដោយវាខូចគុណភាព បាត់បង់អាហារូបត្ថម្ភ នាំឲ្យប៉ះពាល់សុខភាពទៅវិញ។ បើចង់រក្សាទុកបាយឲ្យមានគុណភាព គួររក្សាវាទុកឲ្យបានត្រឹមត្រូវក្នុងទូទឹកកក ហើយមិនអាចលើសពី ២៤ ម៉ោងនោះទេ។
១) ផឹកតែបន្ទាប់ពីទទួលទានបាយ
ទម្លាប់នៃការផឹកតែភ្លាមៗ បន្ទាប់ពីទទួលទានបាយ វាគ្រោះថ្នាក់ខ្លាំង ព្រោះវានាំឲ្យកាត់បន្ថយការស្រូបយកជាតិដែលរាងកាយត្រូវការ។ ហេតុផលនេះ ក៏ធ្វើឲ្យរំខានដល់ដំណើរការប្រព័ន្ធរំលាយអាហារផងដែរ៕
ប្រភព៖ បរទេស | ប្រែសម្រួល៖ ក្នុងស្រុក