អត់ចាំបាច់តែទឹកអប់ជាប់ខ្លួន នេះរបស់សាមញ្ញ ៤ ជួយឲ្យរាងកាយក្រអូបចេញពីខាងក្នុង
ប្រសិនអ្នកមានដំណើរកម្សាន្តទៅកន្លែងដែលត្រូវធ្វើដំណើរច្រើន មិនសូវបានងូតទឹកជាប់លាប់ ដូច្នេះក្លិនខ្លួនក៏ជារឿងគួរឲ្យបារម្ភមួយដែរ។ ខាងក្រោម Knongsrok ណែនាំពីវិធីធ្វើឲ្យក្លិនខ្លួននៅតែល្អ ដោយមិនចាំបាច់ស្ពាយទឹកអប់តាម ជាមួយការប្រើប្រាស់របស់សាមញ្ញទាំង ៤ ខាងក្រោម៖
៤) ក្រូចឆ្មារ
វាអាចសម្លាប់បាក់តេរីធម្មជាតិដែលមានក្នុងរាងកាយ ជួយឲ្យគ្រប់គ្រងក្លិនដង្ហើម និងក្លិនខ្លួនរបស់អ្នកឲ្យនៅល្អ។ វាសម្បូរទៅដោយជាតិអាស៊ីដ វីតាមីន C ហើយការដែលវាកាត់បន្ថយមេរោគ បាក់តេរី កម្ចាត់ជាតិពុល ទាំងនោះហើយជាកត្តាសំខាន់ក្នុងការកំណត់ក្លិនរាងកាយ។
ចូរទទួលទានទឹកក្រូចឆ្មារក្តៅមួយកែវ ឬប្រើប្រាស់ក្រូចឆ្មារមកជូតលើតំបន់ងាយបង្កក្លិនដូចជាជើង ក្លៀក នៅពេលព្រឹកព្រលឹម។ រង់ចាំរហូតដល់វាស្ងួត សឹមលាងទឹកសម្អាត ហើយធានាថាតំបន់នោះ នឹងមិនងាយបង្កក្លិនអាក្រក់មកឡើយ បើទោះបីអ្នកដើរបែកញើសខ្លាំងក៏ដោយ។
៣) ទទួលទានបន្លែច្រើន
ចង់បានរាងកាយមានក្លិនល្អ ក៏គួរជ្រើសរើសរបបអាហារឲ្យត្រឹមត្រូវផងដែរ។ វាសំខាន់ណាស់ក្នុងការទទួលទានបន្លែ ច្រើនជាងសាច់ ព្រោះវាមានសមត្ថភាពបន្សុទ្ធរាងកាយ បញ្ចេញក្លិនក្រអូបបែបធម្មជាតិពីខាងក្នុង។
តែយ៉ាងណាសម្រាប់បន្លែដូចជាខ្ទឹមស ខ្ទឹមបារាំង អាហារហឹរ គួរដាក់កំហិតវិញ ព្រោះវាអាចនាំឲ្យមានក្លិនមិនល្អ។ បន្លែ ផ្លែឈើ រុក្ខជាតិ ដែលល្អសម្រាប់លើកក្លិនរាងកាយដូចជាផ្លែក្រូច ក្រូចឆ្មារ តែបៃតង Cinamon ជាដើម។
២) ការត្រាំជើង
ក្លិនខ្លួន ពេលខ្លះភាយចេញពីផ្នែកនៃប្រអប់ជើង ក៏ពិបាកទទួលយកដែរ។ ត្រូវទម្លាប់កុំឲ្យជើងរបស់អ្នកសើម ហើយផ្អាប់វាចោល ដោយមិនបានលាងសម្អាតឲ្យស្ងួត។ ឧទាហរណ៍៖ ពេលដើរចេញពីបន្ទប់ទឹក ត្រូវជូតជើងឲ្យស្ងួត ហើយមុនពាក់ស្រោមជើងក៏ត្រូវសម្ងួតជើងសិនដែរ ព្រោះបើវាបង្កបាក់តេរីនោះនឹងមានក្លិនមិនល្អកើតឡើងមកហើយ។
លើសពីនេះ វិធីសាមញ្ញមួយ គឺលាយល្បាយនៃស្លឹកតែ ទៅក្នុងទឹកក្ដៅឧណ្ហ៍ៗ ហើយយកជើងទៅត្រាំក្នុងនោះ នៅពេលល្ងាច ឬពេលព្រឹក ដើម្បីអាចជួយកម្ចាត់ក្លិនបានយ៉ាងមានប្រសិទ្ធភាព ហើយក៏ធ្វើឲ្យអ្នកមានអារម្មណ៍ស្រស់ស្រាយពេញមួយថ្ងៃទៀតផង។
១) ផឹកទឹកឲ្យបានច្រើន
ទឹកជួយបន្សាបជាតិពុល និងបន្សុទ្ធរាងកាយរបស់អ្នក វាក៏ជួយកម្ចាត់សារធាតុដែលបណ្តាលឲ្យមានក្លិនមិនល្អនៅក្នុងខ្លួនរបស់អ្នក តាមរយៈការបញ្ចេញជាតិពុល។ អាស្រ័យលើទម្ងន់រាងកាយនៃមនុស្សម្នាក់ៗ ដូច្នេះបរិមាណនៃការទទួលទានទឹកក៏ខុសគ្នាទៅតាមនោះ តែយ៉ាងណាទឹកគឺចាំបាច់បំផុត សម្រាប់ការភាយក្លិនល្អចេញពីខាងក្នុងមក៕
ប្រភព៖ បរទេស | ប្រែសម្រួល៖ ក្នុងស្រុក
Recent News
