លោកយាយម្នាក់ស្ទើរតែគាំងបេះដូងទៅហើយ ក្រោយឃើញលុយដែលខ្លួនខំប្រឹងសន្សំទុកស្ទើរតែមួយជីវិតត្រូវបានអន្តរាយអស់ដោយសារ…

ចិន៖ លោកយាយវ័យចំណាស់ជនជាតិចិនម្នាក់ ត្រូវបានគេស្គាល់ឈ្មោះថា Liu រស់នៅក្នុងតំបន់ស្វយ័ត Gunagxi ប្រទេសចិន បានធ្វើឲ្យមហាជនជាច្រើនហាក់សម្តែងការសោកស្តាយ និងអាណិតដល់គាត់ជាពន់ពេក ក្រោយលុយសន្សំជាច្រើនឆ្នាំរបស់លោកយាយដែលបានទុកនៅក្នុងទូ (ទូឈើសម្រាប់ដាក់អីវ៉ាន់) ក្នុងផ្ទះត្រូវបានសត្វកណ្ដៀរចង្រៃស៊ីរហែកអស់មិនចេះតិច ខណៈរូបគាត់គិតថាការទុកដាក់លុយនៅកន្លែងនោះ គឺមានសុវត្ថិភាពបំផុត។

ប្រភពបានឱ្យដឹងថា ដំបូងឡើយ លោកយាយ Liu​​ បានបើកទ្វារទូនោះរើមើល និងបានឃើញថា លុយកាក់របស់គាត់ដែលបានទុកដាក់នោះ ហាក់មានសុវត្ថិភាពល្អ ប៉ុន្តែក៏មានសត្វកណ្ដៀរជាច្រើនក្បាលនៅពីលើ និងរញ៉េរញ៉ៃពេញក្នុងទូផងដែរ។ ក្រោយឃើញដូច្នេះ លោកយាយក៏បានរើយកលុយយកចេញមកមើល ស្រាប់ពេលភ្លាមនោះគាត់ស្ទើរតែចង់គាំងបេះដូងទៅហលយ ដោយសារតែលុយនោះភាគច្រើនត្រូវបានកណ្ដៀរកាត់ ឬស៊ីសឹងតែទាំងអស់តែម្តង។ លុយខ្លះបានខូចខាតតិចតួច រីឯលុយខ្លះទៀតក៏បានខូចខាតទាំងស្រុង។

Image_2022 02 08_09 52 56

យ៉ាងណាមិញ លុយរបស់លោកយាយ Liu ត្រូវបានគេប៉ាន់ប្រមាណបានថា មានប្រហែលជា ១០,០០០យ័ន (ឬប្រហែល ១,៤២១ដុល្លារអាមេរិក) នៅក្នុងទូឈើដាក់អីវ៉ាន់នោះ។ ក្រោយជួបរឿងស៊យធំបែបនេះ លោកយាយ Liu ក៏បានសម្រេចចិត្តទៅធនាគារដើម្បីសុំជំនួយ ដោយធ្វើការដូរលុយដែលបានខូចខាតទាំងនោះ យកលុយថ្មីវិញ។


ក្រោយពី ក្រុមបុគ្គលិកធនាគារបានធ្វើការពិនិត្យរួចរាល់ ពួកគេក៏បានប្រាប់លោកយាយវិញថា លុយរបស់គាត់ត្រឹមតែ ៦,៩០០យ័ន (ឬប្រហែល ៩៨០ដុល្លារអាមេរិក) ប៉ុណ្ណោះ ដែលហាក់នៅមានសភាពល្អត្រឹមត្រូវ ដែលនឹងអាចធ្វើការប្តូរយកលុយថ្មីវិញបាន។

Image_2022 02 08_09 53 12

គួរឲ្យដឹងផងដែរថា នេះមិនមែនទើបតែជាលើកទីមួយនោះទេ ដែលកើតមានករណីបែបនេះកើតឡើង ពោលគឺកាលពីពេលកន្លងទៅ បានមានបុរសវ័យចំណាស់ជនជាតិចិនម្នាក់ រស់នៅក្នុងខេត្ត Guangdong ក៏ធ្លាប់ត្រូវបានបាត់បង់លុយខ្ទង់ ៤០,០០០យ័ន (ឬប្រហែល ៥,៦០០០ដុល្លារអាមេរិក ដោយសាតែត្រូវសត្វកណ្ដៀរនេះផងដែរ។ ខណៈក៏មានលោកយាយម្នាក់ទៀត ក៏ធ្លាប់បានបាត់បង់លុយដែលខំប្រឹងសន្សំទុក ស្ទើរតែមួយជីវិតរបស់គាត់ ប្រមាណជា ៦០,០០០យ័ន (ឬប្រហែល ៨,៥០០ដុល្លារអាមេរិក) ត្រូវបានអន្តរាយដោយសារកណ្ដៀរកាត់ដូចគ្នានេះផងដែរ៕

អត្ថបទដោយ៖ ស្រីសោភ័ណ