មិនគួរឱ្យជឿ! បុរសម្នាក់បានធ្វើតេស្តវិជ្ជមានកូវីដ ៧៨ លើកជាប់ៗគ្នាក្នុងរយៈពេល ១៤ ខែ
នេះពិតជារឿងនឹកស្មានមិនដល់ទាល់តែសោះ ដោយបុរសជនជាតិទួរគីម្នាក់ ឈ្មោះ Muzaffer Kayasan អាយុ ៥៦ ឆ្នាំដែលខ្លួនមានជំងឺមហារីកឈាម ស្រាប់តែបានធ្វើតេស្តវិជ្ជមានកូវីដ រហូតដល់ទៅ ៧៨លើកជាប់ៗគ្នា ក្នុងរយៈបេល ១៤ ខែ ដែលនេះគឺជាឯកទគ្គកម្មពិភពលោកមួយដែលឆ្លងយូរបំផុត។
បុរសខាងលើបានចំណាយពេល ៤៤១ ថ្ងៃនៅដាច់ដោយឡែកពីគ្រួសាររបស់គាត់ រួមទាំងចៅស្រីរបស់គាត់ឈ្មោះ Azra ផងដែរ ដែលពួកគេត្រូវស្នាក់នៅក្នុងសួនច្បារ ពេលទៅលេងផ្ទះរបស់គាត់នៅទីក្រុងអ៊ីស្តង់ប៊ុល។ ជាធម្មតា អ្នកដែលមានរោគសញ្ញាកូវីដ អាចធ្វើតេស្តិ៍អវិជ្ជមានបន្ទាប់ពីព្យាបាលរយៈពេលប្រហែល៥ថ្ងៃ ប៉ុន្តែសម្រាប់លោក Kayasan គាត់បានចំណាយពេល ១៤ ខែធ្វើតេស្តិ៍វិជ្ជមានជាប់គ្នារហូត។ វេជ្ជបណ្ឌិតមួយរូបជឿថាគាត់បានធ្វើតេស្តិ៍វិជ្ជមានវីរុសកូវីដជាបន្តបន្ទាប់ ដោយសារតែប្រព័ន្ធភាពស៊ាំរបស់គាត់ចុះខ្សោយ ដោយសារតែជំងឺមហារីក។
លោកបានចូលមន្ទីរពេទ្យតាំងពីខែវិច្ឆិកាឆ្នាំ ២០២០ មកម្ល៉េះ តែទោះជាយ៉ាងណាស្មារតីរបស់លោកនៅមានកម្រិតខ្ពស់ ហើយគាត់នៅតែបន្តប្រយុទ្ធប្រឆាំងនឹងការឆ្លងកូវីដស្របពេលកំពុងតស៊ូនឹងជំងឺមហារីកឈាមផងដែរ។ នៅពេលដែលគាត់បានដឹងថាការធ្វើតេស្ត PCR ចុងក្រោយរបស់គាត់វិជ្ជមានម្តងទៀត លោកបាននិយាយកំប្លែងលេងសើចថា “ខ្ញុំគិតថានេះគឺកូវីដស្រីបម្លែងថ្មីហើយមើលទៅ។ នាងច្បាស់ជាឈ្លក់វង្វេងនឹងខ្ញុំហើយ”។
លោក Kayasan ដែលរស់នៅតែម្នាក់ឯងក្នុងផ្ទះល្វែងរបស់គាត់អស់រយៈពេលជាច្រើនខែ ត្រូវបានក្រុមគ្រួសារមកសួរសុខទុក្ខជាប្រចាំ ដោយគាត់អាចនិយាយទៅកាន់ពួកគេបានតែតាមទ្វារកញ្ចក់របស់គាត់ប៉ុណ្ណោះ ហើយលោក Kayasan ទៀតសោតបានប្រាប់ចៅស្រីរបស់គាត់ឈ្មោះ Azra ថា “តានឹងលេងជាមួយចៅ នៅពេលដែលតាជាពីជំងឺនេះ”៕
ប្រភព៖ Daily Mail / ដោយ៖ មុន្នីសាគរ
ព័ត៌មានថ្មីៗ
