កាលពីប៉ុន្មានឆ្នាំមុនខ្សែភាពយន្តខ្នាតធំ កុមារី ២៥ ឆ្នាំទទួលបានការគាំទ្រ និងមានអ្នកទស្សនាភ្លូកទឹកភ្លូកដី ព្រោះតែខ្សែភាពយន្តនេះបានធ្វើឱ្យអ្នកទស្សនាសើចសប្បាយរីករាយ សូម្បីតែបទចម្រៀង Ost «លោកពូ» ក្នុងខ្សែភាពយន្តនេះ ក៏បង្កប់នូវភាពកំភ្លុកកំប្លែងដែរ ដែលត្រូវបានដឹងថាច្រៀងដោយកុមារា ម៉ុង ម៉ានុត (ច្រៀងធ្វើជាសម្លេងស្រី) ត្រូវជាចៅប្រុសបង្កើតរបស់ អ្នកស្រី ពាន់ ភួងបុប្ផា អ្នកដឹកនាំរឿង កុមារី ២៥ឆ្នាំនេះផ្ទាល់តែម្តង។
រយៈពេលប៉ុន្មានឆ្នាំកន្លងផុតទៅ ម៉ុង ម៉ានុត បានកាន់តែធំពេញរូបពេញរាង ហើយថ្មីៗនេះផងដែរ ប្អូនបានច្រៀង Cover បទចម្រៀងមួយបទមានចំណងជើងថា God Is A Woman ដែលជាសំនៀងដើមរបស់ Ariana Grande ស្តាប់ទៅពិតជាពិរោះ និងព្រឺសម្បុរជាខ្លាំងទៅតាមទឹកដមសំលេងរបស់ប្អូន រហូតទទួលបានការសរសើរជាខ្លាំងពីសំណាក់អ្នកលេងបណ្តាញទំនាក់ទំនងសង្គម។
គួរឱ្យដឹងផងដែរថា ម៉ុង ម៉ានុត គឺជាប្អូនបង្កើតរបស់ តារាចម្រៀងសំនៀងធ្ងន់ ម៉ុង ម៉ានិត អតីតតារាចម្រៀង Pleng Record និងជាកវីនិពន្ធសៀវភៅប្រលោមលោកល្បីៗផងដែរ ។ សមត្ថភាពច្រៀងមិនធម្មតារបស់ ម៉ានុត ត្រូវបានគ្រប់គ្នាសន្និដ្ឋានបានថា ប្អូននឹងដើរតាមគន្លងបងប្រុសបស់ខ្លួននាពេលអនាគត តែទោះជាយ៉ាងណាយើងនឹងរង់ចាំមើលទាំងអស់គ្នាថា តើប្អូនម៉ានុតនឹងហក់ចូលប្រឡូកវិថីសិល្បៈដូចបងប្រុសដែរឬអត់៕
សូមទស្សនាវីដេអូបទចម្រៀង កុមារី ២៥ឆ្នាំ និងបទ God Is A Woman ដែល Cover ដោយប្អូនម៉ានុតទាំងអស់គ្នា៖