នៅក្នុងឆ្នាំ ២០១៣ ខ្សែភាពយន្តរបស់ Disney រឿង Frozen ទទួលបានភាពជោគជ័យខ្លាំង ទាំងផ្នែក Graphic និងសាច់រឿង រហូតទទួលបានពានអូស្កាដល់ទៅ២ ដែលស្ទើរតែមិនគួរឱ្យជឿ។
សាច់រឿងមួយនេះត្រូវបានគេដឹងថាផ្តល់អត្ថន័យយ៉ាងធំធេងសម្រាប់ជីវិតមនុស្សបច្ចុប្បន្នដែលអ្នកប្រហែលជាមិននឹកស្មានដល់ដូចជា៖
១. ជាតួអង្គដែលមានលក្ខណៈពិសេស
នៅក្នុងសាច់រឿង Frozen មិនបានបង្ហាញពីលក្ខណៈឥតខ្ចោះនៃតួអង្គឡើយ វាបង្ហាញពីធាតុពិតនៃចរិតមនុស្ស ដែលគ្មាននរណាម្នាក់ដែលថាមិនចេះខុសនោះទេ ដោយចរិតតួអង្គទាំងអស់មានទាំងភាពក្លាហាន ភាពភ័យខ្លាច មហិច្ឆតា ការងើបតស៊ូជាដើម។
ទោះបីជាតុក្កតានៃមិនបានបង្ហាញនូវភាពល្អឥតខ្ចោះបែបនេះ តែវាបានផ្តល់មេរៀនជីវិតឱ្យយើងចេះងើបតស៊ូ ជម្នះឧបសគ្គ និងចេះផ្តល់កម្លាំងចិត្តដល់ខ្លួនឯង។
តួអង្គ Anna គឺជាតួអង្គដែលមានអត្តចរិតដូចក្មេងស្រីទូទៅភាគច្រើន មានទាំងភាពរីករាយ កំប្លុកកំប្លែង ដែលធ្វើឱ្យគ្រប់គ្នាចូលចិត្តនាង។ ម្យ៉ាងទៀតនាងជាមនុស្សស្មោះត្រង់ បើកចំហរចិត្ត ជាពិសេសនាងទុកចិត្ត និងជិតស្និទ្ធនឹងបងស្រីនាងជាងគេ។
Elsa ជួបនឹងរឿងពិបាក ស្មុគស្មាញដែលត្រូវឆ្លងកាត់ ហើយនាងត្រូវរស់នៅជាមួយជីវិតដែលកើតមកមានភាពខុសគេ ដែលធ្វើឱ្យនាងត្រូវនៅឆ្ងាយពីមនុស្សម្នា ជាពិសេសប្អូនស្រីជាទីស្រលាញ់ទាំងដែលនាងមិនចង់។
ភាពពិតនៃថាមពលពិសេសរបស់នាង ត្រូវបាននាងលាក់ទុក ដោយចាត់ទុកវាជាចំណុចខ្សោយដែលអាចបំផ្លាញនាងបាន ដោយវាត្រូវបានឆ្លុះបញ្ចាំងទៅនឹងសង្គមបច្ចុប្បន្នថា មនុស្សភាគច្រើនតែងតែទើសមុខ មិនពេញចិត្តនឹងមនុស្សដែលល្អពូកែជាងខ្លួន ដែលជាហេតុធ្វើឱ្យមនុស្សពូកែត្រូវលាក់ទុកសមត្ថភាពពិត ដើម្បីបង្ការការស្អប់ខ្ពើម និងច្រណែនឈ្នានីសពីមនុស្សទូទៅ។
តែចុងក្រោយនាងបានក្រោកឈរ ប្រឆាំង និងប្រើសមត្ថភាពខ្លួនឯងដើម្បីឆ្លងកាត់រឿងរ៉ាវអាក្រក់ៗទាំងឡាយ ជាពិសេសនៅទីបំផុតនាងក៏បានដឹងថា មានមនុស្សជាច្រើនទៀតក៏បានជួយ និងគាំទ្រនាងរហូតទទួលបានជោគជ័យផងដែរ។
២. ស្តែងពីធាតុពិតមនុស្សលាក់មុខមួយចំនួននៅក្នុងសង្គម
ព្រះអង្គម្ចាស់ Hans ត្រូវបានគេប្រៀបធៀបនឹងចរិតមនុស្សមួយចំនួនធំនៅក្នុងសង្គមបច្ចុប្បន្ន ព្រោះចំពោះ Anna ព្រះអង្គម្ចាស់មើលទៅជាមនុស្សកំប្លែង មានភាពរីករាយ និងស្មោះត្រង់ តែទីបំផុតទ្រង់ជាមនុស្សអាក្រក់ ពោលគឺទ្រង់ជាមនុស្សបោកប្រាស់ លាក់ពុតតាំងពីដើម គ្រាន់តែមានមនុស្សឆាប់ជឿទុកចិត្តគេប៉ុណ្ណោះ។
Hans មិនត្រឹមតែបោកប្រាស់តួអង្គក្នុងភាពយន្តប៉ុណ្ណោះទេ តែតួអង្គនេះបានធ្វើឱ្យអ្នកទស្សនាបាក់ចង្កេះមិននឹកស្មានដល់ចំពោះអំពើអាក្រក់របស់គេផងដែរ។
មានចំណុចជាច្រើនដែលអ្នកអាចនឹងកត់សម្គាល់ចរិតអាក្រក់របស់ Hans បាន នៅត្រង់វគ្គដែលទ្រង់ច្រៀងលួងលោម Anna នៅក្នុងបទចម្រៀង “I’ve Found My Place” ទ្រង់មិនបានផ្តោតសំខាន់ដោយដាក់អារម្មណ៍ស្នេហាទៅលើ Anna នោះទេ ដោយបទចម្រៀងដែលទ្រង់សំដៅនោះគឺ ប្រាសាទ Arendelle ពោលទ្រង់ធ្វើពុតជាស្រលាញ់ Anna ដោយចង់គ្រប់គ្រងប្រទេសនេះប៉ុណ្ណោះ។
នៅត្រង់ចំណុចមួយទៀតនៅពេលដែល Hans ព្យាយាមចង់ជួយដល់ Elsa នៅក្នុងប្រាសាទទឹកកករបស់នាងពេលទាហានរកបាញ់ Elsa មើលទៅដូចជាទ្រង់ចង់ជួយ Elsa តែការពិតការជួយនោះជាការមានបំណងចង់សម្លាប់ Elsa ទៅវិញទេ។
៣. បទចម្រៀង « Let's it Go » កែប្រែវាសនាតួអង្គ
តើអ្នកដឹងទេ តួអង្គ Elsa ដំបូងត្រូវបានគេតាក់តែងធ្វើជាតួអាក្រក់ តែក្រោយពីបានស្តាប់បទចម្រៀង « Let's it Go » និងជ្រួតជ្រៀតអត្ថន័យនៃបទនេះ អ្នកដឹកនាំបានកែប្រែតួអង្គ Elsa ដូចដែលអ្នកបានឃើញនៅពេលនេះ។
មិនត្រឹមតែចម្រៀងមួយនេះបានប្តូរតួអង្គឱ្យ Elsa ក្លាយជាតួអង្គល្អនោះទេ តែបទចម្រៀងនេះមានឥទ្ធិពលធ្វើឱ្យនាង Elsa ក្លាយទៅជាខ្លួនឯងពិតប្រាកដ។
តើអ្នកចាំទេ ពេលដែល Elsa រស់នៅក្នុងរាជវាំងនាងខំតែងខ្លួនស្លៀកពាក់ ទៅតាមប្រពៃណីទំនៀមទម្លាប់ប្រទេសដូចជាម្តាយរបស់នាង ជាពិសេសត្រូវពាក់ស្រោមដៃឃាត់ឃាំងវេទមន្ត ដែលទាំងនេះធ្វើឱ្យនាងមានអារម្មណ៍ថាធុញទ្រាន់ស្មុគស្មាញ មិនមែនជាខ្លួនឯងពីតប្រាកដ។
តែនៅពេលដែលនាងចេញពីវាំង ហើយច្រៀងបទ « Let's it Go » នាងបានដោះឈុតនាងចេញ ដោះស្រោមដៃ ហើយនាងបានទាញទម្លាក់ស្តាយ៍សក់ចាស់របស់នាង ពោលគឺនាងបានធ្វើអ្វីដែលខ្លួនឯងស្រលាញ់ពេញចិត្ត និងធ្វើអ្វីដែលជាធាតុពិតខ្លួនឯងដោយមិនបាច់លាក់បាំងនរណាទៀតនោះទេ។
អ្នកនឹងឃើញនាងជប់សំលៀកបំពាក់ឈុតទឹកកកថ្មី ថែមទាំងជប់ប្រាសាទទឹកកកសម្រាប់រស់នៅផងដែរ ដែលពេលនោះហើយជាថ្ងៃថ្មី ជីវិតថ្មីរបស់នាងបានចាប់ផ្តើម។
ថាមពលរបស់ Elsa ក៏ឆ្លុះបញ្ចាំងពីអារម្មណ៍របស់នាងដែរ។ នៅពេលដែលនាងមានទំនុកចិត្តលើខ្លួនឯង កម្លាំងថាមពលរបស់នាងពិតជាស្រស់ស្អាតខ្លាំង និងមានសមត្ថភាពអស្ចារ្យនៅក្នុងការជប់មនុស្សទឹកកក (Olaf) ប្រាសាទទឹកកក និងឈុតសំលៀកបំពាក់ទឹកកក ។
តែនៅពេលដែលនាងមានអារម្មណ៍ភ័យខ្លាច ថាមពលរបស់នាងបានចុះអន់ថយ ។ នៅពេលនាងមានអារម្មណ៍វិលវល់ និងអស់សង្ឃឹមមានព្យុះទឹកកក។ ហើយនៅចុងបញ្ចប់នៃខ្សែភាពយន្តនៅពេល Hans ប្រាប់ Elsa ថា Anna បានស្លាប់ ព្យុះភ្លៀងក៏បញ្ឈប់ភ្លាមៗព្រោះ Elsa បាត់បង់ការគ្រប់គ្រងខ្លួនឯង នាងលែងមានអារម្មណ៍អ្វីទាំងអស់ដូចស្លាប់ទាំងរស់។
៤. រឿង Frozen ផ្លាស់ប្តូរភាពល្អឥតខ្ចោះនៃតួអង្គ
រឿង Frozen បានបំបែកប្រវត្តិសាស្រ្ត របស់តួអង្គឯករបស់ Disney មុនៗ ដែលតែងតែមានភាពឥតខ្ចោះនៅក្នុងខ្លួនដូចជា
-ព្រះអង្គម្ចាស់ Hans ដែលមានរូបរាងសង្ហា ល្អឥតខ្ចោះសមជាតួឯក បានប្រែក្លាយទៅជាតួអង្គអាក្រក់បំផុតទៅវិញ
-តួអង្គមនុស្សស្រីដែលធ្លាប់តែមានភាពទន់ខ្សោយត្រូវការជំនួយរបស់តួឯកប្រុសរបស់បណ្តាតួអង្គព្រះនាង Disney តែស្រាប់រឿង Frozen តួស្រីបានប្រែក្លាយទៅជាតួអង្គដែលងើបឈរ មានភាពរឹងមាំ ថែមទាំងអាចបំបែកឧបសគ្គដោយខ្លួនឯង។
-តួអង្គ Anna ដែលជាព្រះនាងម្ចាស់ បែរជាមានចរិតលក្ខណៈដូចមនុស្សស្រីធម្មតា ដូចជា គេងក្នុងឥរិយាបថគួរឱ្យអស់សំណើច ឡិកឡក់ កំប្លែង ជាពិសេសមានភាពក្លាហានញ៉ែមនុស្សប្រុសមុនទៀតផង។
៥. ជាសាច់រឿងនិយាយពីទ្វារ និងស្រោមដៃជាជំណុចគោល
ទ្វារ គឺអត្ថន័យលាក់បង្កប់មួយដែលខ្សែភាពយន្តនេះព្យាយាមប្រៀបធៀបន័យបញ្ឆិតបញ្ឆៀង ដោយទ្វារមួយនេះតំណាងឱ្យភាពឯកោ ការបិទបាំងខ្លួនឯង និងការដែលមិនព្រមផ្តល់ឱកាស។ ជាញឹកញយសាច់រឿងមួយនេះ មានវគ្គនិយាយពីទ្វារនេះច្រើនបំផុត ដោយចំណុចដែលសំខាន់ជាងគេមានដូចជា៖
-ទីមួយទ្វារបន្ទប់របស់ Elsa ត្រូវបានបិទ ដោយទ្វារនេះទោះបីជាអាចបើកបានយ៉ាងណាក៏ដោយ តែ Elsa នាងបានសម្រេចចិត្តចាក់សោរឃុំខ្លួនឯងតែម្តង ដោយទ្វារមួយនេះធ្វើឱ្យនាងមានភាពឯកា ឆ្ងាយពីមនុស្សម្នា ជាពិសេសបាត់ភាពស្និទ្ធស្នាលជាមួយប្អូនស្រីជាទីស្រលាញ់។ ដោយមួយផ្នែកទៀត ទ្វាររបងរាជវាំង បានឃុំឃាំង Anna មិនឱ្យចេញពីក្រៅនោះទេ ពោលគឺនាងមានសេរិភាពត្រឹមនៅក្នុងរបងរាជវាំងប៉ុណ្ណោះ។
-Elsa បានបិទទ្វារនៅចុងបញ្ចប់នៃបទចម្រៀង “ Let It Go” ដើម្បីជាការបញ្ជាក់ថា នាងមិនអនុញ្ញាតិឱ្យអ្នកណាមកធ្វើបាបនាង និងចូលដែនដីរបស់នាងឡើយ នាងនឹងធ្វើជាខ្លួនឯងពិតប្រាកដនៅទីនេះ។
-ក្លោងទ្វារប្រាសាទបានបិទមិនឱ្យ Kristoff ចូលទៅក្នុងឡើយ ពេលដែលគាត់បាននាំ Anna ត្រលប់មករាជវាំងវិញ
-ទ្វារបានបិទ នៅពេលដែលព្រះអង្គម្ចាស់ Hans បានចាកចេញចោល ទុកឱ្យ Anna នៅស្លាប់ម្នាក់ឯង។
អ្នកពិតជាឆ្ងល់ណាស់ហើយមែនទេ ហេតុអ្វីបានជា Anna លង់ស្រលាញ់ Hans លឿនម៉្លេះដោយគ្រាន់តែជួបគ្នាជាលើកដំបូង នោះក៏ដោយសារតែពេលនោះគឺជាទ្វារដំបូងដែលបានបើកសេរីភាពរបស់នាងឱ្យអាចចេញពីរាជវាំង ហើយក៏បានជួបនឹង Hans តែម្តងទៅ។
ដូច្នេះហើយបានជាបទចម្រៀងនោះមានចំណងជើងថា « Love Is an Open Door » ។
ន័យបង្កប់មួយទៀតនោះគឺ ស្រោមដៃ បានន័យថាជាការលាក់ទុករឿងសម្ងាត់ ហើយមនុស្សម្នាក់ៗសុទ្ធតែមានរឿងសម្ងាត់ផ្ទាល់ខ្លួន។
ត្រង់វគ្គមួយនោះ គឺជាពេលដែលឪពុករបស់ Elsa បានពាក់ស្រោមដៃជាលើកដំបូងឱ្យនាង ដើម្បីកុំឱ្យថាមពលពិសេសនាងប្រើការចេញក្រៅមកបាន ដោយឪពុកនាងបាននិយាយថា៖ « គ្រប់គ្រងវាកុំដោះចេញ កុំមានអារម្មណ៍អ្វីទាំងអស់ កុំបង្ហាញវាចេញមក »។ ដោយការពិតទៅថាមពលរបស់នាង គឺជាចំណុចពិសេសអស្ចារ្យរបស់នាង ហើយវាជាធាតុពិតរបស់នាង តែនាងបែរជាត្រូវទ្រាំលាក់ទុកវាទៅវិញ។
ស្រោមដៃមួយនេះដូចជារនាំងរារាំងអ្វីដែលជាខ្លួនឯង នាងត្រូវទ្រាំលាក់បាំងធ្វើជាមនុស្សស្រីធម្មតា ដោយសារតែស្រោមដៃមួយនេះ។ តែពេលដែលនាងចេញពីវាំង នាងបានដោះស្រោមដៃនេះចោល ថែមទាំងមានសេរីភាពអាចធ្វើជាខ្លួននាងបានវិញផងដែរ។
ជារឿងមួយដ៏គួរឱ្យភ្ញាក់ផ្អើល នៅក្នុងសាច់រឿងមួយនេះ មិនមែនមានតែ Elsa ទេដែលពាក់ស្រោមដៃ សូម្បីតែព្រះអង្គម្ចាស់ Hans ក៏ពាក់ស្រោមដៃនេះដែរ ពោលគេចង់បង្ហាញថា Hans បានព្យាយាមលាក់ទុកនូវចរិតអាក្រក់ និងចេតនាពិតរបស់គេផ្ទាល់។
ហើយនៅត្រង់ឈុតមួយ ពេលដែលគេបង្ហាញនូវធាតុពិតដ៏អាក្រក់របស់គេ គេបានដោះស្រោមដៃចេញ តែនៅពេលដែលទ្រង់ដើរចាកចេញពី Anna បណ្តោយឱ្យនាងស្លាប់ ទ្រង់ក៏បានទាញស្រោមដៃមកពាក់ម្តងទៀត ពោលគឺដើម្បីលាក់បាំងអំពើអាក្រក់របស់គេជាថ្មីជាមួយមនុស្សខាងក្រៅ។
៦. Olaf មានអ្វីពិសេសជាងអ្វីដែលអ្នកគិត
Anna និង Elsa បានធ្វើតុក្កតាព្រិលនេះជាមួយគ្នា កាលពីពួកគេនៅតូច ដែលវាបង្ហាញពីការស្រលាញ់រវាងបងប្អូនគេទាំង២ និងបង្ហាញពីចរិតក្មេងខ្ចីមិនទាន់ដឹងអីរបស់ពួកគេផងដែរ។ ដូច្នេះហើយបានជាតួអង្គតុក្កតាព្រិល Olaf មានអត្តចរិតដូចកូនក្មេង កំប្លែង និងស្រស់ស្រាយយ៉ាងនេះ។ តែនៅពេលមួយដែល Elsa បានជ្រុលដៃប្រើវេទមន្តប៉ះចំ Anna ធ្វើឱ្យនាងរបួស តុក្កតាព្រិលក៏បានបែកបាក់ដូចគ្នា។
ចំណែកនៅក្នុងវគ្គបទចម្រៀង “Do You Want to Build a Snowman?” ត្រូវបានបង្ហាញថា Anna ព្យាយាមគោះទ្វារហៅបងស្រីខ្លួន Elsa ឱ្យចេញមកក្រៅលេងជាមួយគ្នា ដោយនាំគ្នាសង់តុក្កតាព្រិលជាមួយគ្នាឡើងវិញ ដោយនេះចង់បង្ហាញថា Anna ចង់ផ្សះផ្សារភាពស្និទ្ធស្នាលជាមួយបងស្រីឡើងវិញ តែវាបែរជាមិនអាចទៅរួចទៅវិញ ដោយ Elsa មិនបានចេញមកក្រៅឡើយ។
មួយផ្នែកទៀត Elsa ពេលឮបទនេះ នាងពិតជាចង់ចេញមកក្រៅលេងជាមួយប្អូនទៀតណាស់ ហើយបំណងធំបំផុតរបស់នាងក៏ចង់សង់តុក្កតា Olaf នេះឡើងវិញដែរ តែនាងពិតជាមិនអាចចេញក្រៅបាននោះទេ។
ដូច្នេះហើយ បានជាពេលនាងចេញពីរាជវាំង រឿងមុនគេដែលនាងបានធ្វើនោះគឺ បង្កើត តុក្កតាព្រិល Olaf ឡើងវិញ និងជប់វាឱ្យមានជីវិត។
៧. ពណ៌នៅក្នុងភាពយន្ត បានលាក់បង្កប់សាច់រឿង
ពណ៌នៅក្នុងសាច់រឿង បានប្រាប់ពីស្ថានភាពនៃសាច់រឿង និងអត្តចរិតនៃតួអង្គ ដោយ Anna មានសក់ពណ៌ក្រហម ហើយតែងតែស្លៀតឈុតពណ៌បៃតង និងរាងស្រអាប់។ ចំណែក Elsa មានសក់ពណ៌ ស ហើយនាងតែងតែស្លៀកឈុតពណ៌ទឹកសមុទ្រ។
ដែលពិសេសនោះ ឈុតសំលៀកបំពាក់របស់បងប្អូនស្រីទាំង ២ នៅក្នុងថ្ងៃឡើងសោយរាជ្យ ត្រូវបានគេដឹងថា ជាពណ៌ដែលតំណាងឱ្យទង់ជាតិនៃទីក្រុងប្រទេសរបស់គេ គឺពណ៌បៃតង និងពណ៌ស្វាយ។
បន្ថែមលើសពីនេះ សូម្បីតែពណ៌ថាមពលទឹកកករបស់ Elsa ក៏តែងតែប្រែប្រួលទៅតាមអារម្មណ៍ផ្ទាល់ខ្លួនដែរ ដោយថាមពលនឹងបញ្ចេញពណ៌ទឹកសមុទ្រ នៅពេលដែលអារម្មណ៍នាងស្រស់ស្រាយ និងសប្បាយចិត្ត ឯពណ៌ក្រហមនៅពេលនាងភ័យខ្លាច និងពណ៌លឿងនៅពេលនាងខឹង។
៨. ពិសេសលើសពីពិសេសអំពីអត្ថន័យក្តីស្រលាញ់រវាងបងប្អូន
រឿង Frozen ផ្តោតអត្ថន័យសំខាន់មិនមែនជារឿងស្នេហាប្រុសស្រីឡើយ នោះគឺការបង្ហាញពីក្តីស្រលាញ់ជ្រាលជ្រៅរវាងបងប្អូន និងអត្ថន័យពិសេសលើសពីនេះទៅទៀតដូចជា៖
-Kristoff និង Anna បានបង្ហាញឱ្យឃើញថា ស្នេហាត្រូវការពេលវេលា និងការខិតខំឆ្លងឧបសគ្គរួមគ្នា ជាពិសេសគឺការស្និទ្ធស្នាល យល់ចិត្ត និងឆ្លងកាត់ពេលលំបាករួមគ្នាជាច្រើន។
-នៅក្នុងថ្ងៃគ្រងរាជ Elsa មានសភាពផ្លូវចិត្ត ដែលបង្ហាញតាមរយៈការញ័រដៃ អារម្មណ៍ភ័យខ្លាច ច្របូកច្របល់ ថប់អារម្មណ៍ និងការភ័យស្លន់ស្លោរ ។ ដំណោះស្រាយចុងក្រោយ និងខ្សែភាពយន្តនៅទីបញ្ចប់បានបង្ហាញថា ជំងឺផ្លូវចិត្តមិនអាចធ្វើឱ្យអ្នកឆ្កួតបានឡើយ ប្រសិនជាអ្នកព្យាយាមជម្នះ និងឆ្លងកាត់ឧបសគ្គទាំងនោះ។
-ជាចំណុចសំខាន់បំផុតនោះ ខ្សែភាពយន្តនេះ បានបង្ហាញឱ្យយើងរៀនធ្វើជាខ្លួនឯង ទទួលយកការពិត និងមិនត្រូវលាក់សមត្ថភាពដែលខ្លួនឯងមានឡើយ៕