រកឯណាបានគ្រូបែបនេះ? លេងទៅតាមកូនសិស្សដែលគេចសាលា ឱ្យត្រលប់មករៀនវិញដល់រោងកុនចឹងហ្មង
ថៃ៖ យុវភាពរបស់មនុស្សម្នាក់ៗ អ្នកណាដែលថាមិនធ្លាប់ខុស អ្នកណាដែលថាមិនធ្លាប់ដើរខុសផ្លូវ គ្រាន់តែតិច ឬច្រើន និងការចេះកែប្រែអតីតកាលឱ្យល្អឬក៏អត់តែប៉ុណ្ណោះ ជាពិសេសនៅក្នុងវ័យសិក្សាថ្នាក់វិទ្យាល័យ។
ជាការពិតណាស់ អ្នកណាក៏ដឹងដែរថា វ័យនេះជាវ័យភ្លើតភ្លើនតាមគ្នា និងវ័យចង់សប្បាយបំផុត ដោយការគេចវេះមិនចូលសាលា បបួលគ្នាដើរលេង ញ៉ាំអី ច្រៀងខារាអូខេ និងមើលកុនជាច្រើន ដែលការគេចសាលានេះធ្វើឱ្យយើងមិនចម្រើននោះទេ មានតែត្រូវអវត្តមាន ខកខានការសិក្សា និងអាចប្រឈមមុខនឹងការធ្លាក់ចំណាត់ថ្នាក់ រហូតឈានដល់រៀនត្រួតថ្នាក់ក៏ថាបាន។
ជាក់ស្តែងថ្មីៗនេះ រូបភាពអ្នកគ្រូបង្រៀនមួយរូបនៅក្នុងប្រទេស ថៃបានធ្វើឱ្យគ្រប់គ្នារំជើបរំជួលជាខ្លាំង មិននឹកស្មានថាដោយសារតែចង់ឱ្យសិស្សដើរមកផ្លូវត្រង់វិញ សុខចិត្តចំណាយពេលដែលកំពុងតែបង្រៀន មកតាមសិស្សខ្លួនឯងដែលគេចសាលាទៅដល់រោងកុនតែម្តង។
នៅក្នុងរូបភាពនោះ អ្នកគ្រូដ៏ស្រស់សោភាមានទឹកមុខមិនសូវរីករាយ បានដើរចុះឡើងរកកូនសិស្សរបស់ខ្លួន ហើយរូបផ្សេងទៀតគឺនៅពេលដែលរកកូនសិស្សឃើញ និងស្តីប្រដៅសិស្សឱ្យទៅរៀនវិញ មើលទៅសែនក្តុកក្តួលមែនទែន។
ដូច្នេះក្នុងនាមជាសិស្ស ក្នុងវ័យសិក្សា កុំតោងសប្បាយភ្លើតភ្លើនខ្លាំងពេក ដោយយកពេលសិក្សាមកគេចសាលាដើរលេងបែបនេះ ដោយពេលសប្បាយប្អូនៗអាចយកពេលថ្ងៃចុងសប្តាហ៍ ឬពេលសម្រាកពីការសិក្សាទៅដើរលេងក៏មិនមែនជាបញ្ហាដែរ។
សង្ឃឹមថាអត្ថបទ និងរូបភាពទាំងនេះធ្វើឱ្យប្អូនៗដែលកំពុងតែផ្លូវខុសភ្ញាក់ខ្លួនឡើងវិញ៕
ព័ត៌មានថ្មីៗ
