ទីក្រុង Wuhan ប្រទេសចិន ត្រូវបានគេដឹងថាជាទីកន្លែងដំបូង ដែលនាំឱ្យផ្ទុះនូវវីរុសកាចសាហាវ Corona ដែលជាជំងឺរលាកផ្លូវដង្ហើមថ្មី ដែលបានធ្វើឱ្យប្រជាជន ប្រមាណ ១១លាននាក់ ត្រូវបានអាជា្ញធរធ្វើការហាមឃាត់ចាកចេញតាមច្រកចេញចូលគ្រប់ច្រក ដោយសារតែមេរោគមួយនេះបានរាតត្បាតយ៉ាងខ្លាំង និងធ្វើឱ្យមនុស្សប្រមាណ ១០៦នាក់បានស្លាប់បាត់បង់ជីវិត ហើយមនុស្សជាង៤ពាន់នាក់ទៀតបានឆ្លងមេរោគនេះ ហេតុនេះហើយទីក្រុងដែលធ្លាប់អ៊ូអរប្រែជាស្ងាត់ជ្រងុំដោយសារតែប្រជាជនទាំងអស់ពួនសំងំនៅក្នុងផ្ទះ មិនហ៊ានចេញទៅណា។
តែវីដេអូមួយ បានធ្វើឱ្យពិភពលោកស្រក់ទឹកភ្នែក មានចិត្តអាណិតប្រជាជន Wuhan ខ្លាំង ដោយសារតែពួកគេមិនអាចចេញទៅក្រៅបានក៏ពិតមែន តែពេលយប់ឡើង ពួកគេបែរជានាំគ្នាស្រែកច្រៀងចម្រៀងមានន័យថា «តស៊ូឡើង Wuhan » ឡើងទ្រហឹងពេញក្រុង ដើម្បីលើកទឹកចិត្តខ្លួនឯង និងបន់ស្រន់ឱ្យពួកគេគេចផុតពីជំងឺដ៏កាចសាហាវនេះឆាប់ៗទៀតផង។
ដោយនៅក្នុងវីដេអូនេះក៏បានបង្ហាញច្បាស់ ពីសំលេងស្រែកច្រៀង ចេញពីអាគារស្នាក់នៅខ្ពស់ៗ ស្របពេលដែលនៅតាមផ្លូវត្រូវបានបិទភ្លើងងងឹតឈឹង គ្មានមនុស្សដើរនោះឡើយសូម្បីតែម្នាក់ ពិតជាគួរឱ្យសង្វេកពិតមែន។
តែនៅក្នុងនោះបែរជាអាជ្ញាធរពួកគេបានព្យាយាមហាមឃាត់ពួកគេពីការច្រៀងទៅវិញ ដោយសម្អាងថាពួកគេអាចនឹងមានឱកាសខ្ពស់នៅក្នុងការឆ្លងវីរុស ដោយសារតែការបើកបង្អួចស្រូបខ្យល់អាកាសខាងក្រៅ និងការស្រែកច្រៀងជាដើម។ ដោយឡែកពូកគេមិនគិតដូច្នេះឡើយ ពួកគេថាការស្រែកច្រៀងបែបនេះជាការផ្តល់កម្លាំងចិត្តឱ្យគ្នាទៅវិញទៅមកនៅក្នុងការតស៊ូនឹងវីរុសមួយនេះ ម្យ៉ាងទៀតទោះបីជាពួកគេស្រែកច្រៀង ក៏ពួកគេបានពាក់ម៉ាស់ផងដែរ។
ដើម្បីឱ្យកាន់តែជ្រាបច្បាស់ សូមទស្សនាវីដេអូខាងក្រោមនេះ ៖