កុំចេះតែហ៊ាន! ធាត់ខ្លាំង ហើយកើតជំងឺទឹកនោមផ្អែមបែរជាលេបថ្នាំសម្រកទម្ងន់ផ្តេសផ្តាស ស្រាប់តែជួបរឿងអកុសល
កាលពីម៉ោងប្រមាណជា ៣និង៣០នាទីរសៀលថ្ងៃទី០៩ ខែមីនា ឆ្នាំ ២០២០ នេះ មានរឿងគួរឱ្យភ្ញាក់ផ្អើលស្ថិតនៅចំណុចផ្ទះលេខ B5 បុរី រុងរឿង ក្នុងភូមិកៀនឃ្លាំង សង្កាត់ព្រែកលៀប ខណ្ឌជ្រោយចង្វារ ដោយមានបុរសម្នាក់បានក្អួត ឈាម ស្លាប់មុខទ្វារយ៉ាងអាណោចអធម។
តាមប្រភពព័ត៌មានបានឱ្យដឹងថា បុរសរងគ្រោះមានឈ្មោះថា ម៉ុន សុធារិទ្ធិ អាយុ៣៨ឆ្នាំ ដោយមុនពេលកើតហេតុ ជនរងគ្រោះបាននៅផ្ទះតែម្នាក់ឯង ដោយម្តាយទៅពិសារបាយនៅក្រៅ ពេលនោះបុរសនោះមានអាការៈមិនស្រួលបានក្អួតនៅក្នុងបន្ទប់ទឹក និងបានដើរចេញមកមាត់ទ្វារក្អួតបន្តទៀត ហើយប្រកាច់រហូតដល់ស្លាប់បង្កឱ្យមានការឆោឡោតែម្តង។
មូលហេតុនៃការស្លាប់ ត្រូវបានក្រុមគ្រួសារបុរសនោះបាននិយាយថា ដោយសារតែបុរសរងគ្រោះមានមាឌធំ និងមានជំងឺទឹកនោមផ្អែម ផងនោះ ថ្មីៗនេះបុរសនេះបានរកទិញផលិតផលសម្រកទម្ងន់ ហើយការប្រើផលិតផលនោះ បុរសរូបនេះបានធ្វើទុក្ខ ហេវហត់ និងក្អួតធ្លាក់ឈាមបែបនេះ ។
តែយ៉ាងណាចំពោះមូលហេតុនៃការស្លាប់ពិតប្រាកដមិនទាន់ដឹងថាយ៉ាងណានោះទេ មានតែរង់ចាំក្រសួងមានសមត្ថកិច្ចមកត្រួតពិនិត្យសិនប៉ុណ្ណោះ៕
ព័ត៌មានថ្មីៗ
