បណ្តាញទំនាក់ទំនងសង្គម Youtube ត្រូវបានគ្រប់គ្នាដឹងត្រឹមថា គឺជាកន្លែងដែលបណ្តុំរាល់វីដេអូជាច្រើនប្លែកៗចម្រុះគ្នា ដែលទទួលបានការពេញនិយមជាងគេលើបណ្តាញវែបសាយវីដេអូដទៃទៀត។
ក្រៅពីមានវីដេអូបម្រើការកម្សាន្តរបស់មនុស្សទូទាំងពិភពលោក Youtube ក៏បានបើកឱកាសឱ្យមនុស្សទាំងអស់អាចរកប្រាក់កម្រៃតាមរយៈការបង្ហោះវីដេអូរបស់ខ្លួនផងដែរ ដែលអ្នកធ្វើបែបនេះគេហៅថា Youtuber ឬ Vlog ។ អ្នកអាចនឹងគិតថាជារឿងធម្មតា តែមនុស្សមិនតិចអ្នកទេពាសពេញពិភពលោកខ្លះសុខចិត្តចោលការងាររបស់ខ្លួនដើម្បីធ្វើការនៅក្នុងបណ្តាញ Youtube មួយនេះ ព្រោះវាអាចរកប្រាក់ចំណូលបានយ៉ាងច្រើនតាមរយៈការចូល View និងការផ្សព្វផ្សាយពាណិជ្ជកម្មនៅលើវីដេអូនោះតែម្តង។
ជារឿងដ៏រីករាយនៅខ្មែរយើងក៏មានអ្នកលេង Youtube ជាច្រើនអ្នកដែរ ដែលកំពុងតែទទួលបានភាពជោគជ័យជាបន្តបន្ទាប់នៅក្នុងការរកប្រាក់កម្រៃតិច ឬច្រើន អាស្រ័យលើប្រភេទវីដេអូរបស់ខ្លួន តែក៏មានអ្នកខ្លះក៏កំពុងតែមានបានដោយសារតែការរកលុយតាម Youtube ដែរ។ តាមការរយៈគណនីហ្វេសប៊ុកឈ្មោះ James Kim បានសរសេររៀបរាបពីភាពជោគជ័យរបស់ខ្លួនថា៖ « នេះជាវីដេអូមួយអំពី ខាងក្រៅ និង ខាងក្នុងផ្ទះរបស់ខ្ញុំ។ មិនទាន់រួចរាល់ 100% ទេ។ ខ្ញុំសូមជូនពរបងប្អូនទាំងអស់គ្នាបានទទួលនូវភាពជោគជ័យគ្រប់ភារកិច្ច និង សូមកុំបោះបង់ទោះបីជាមានការលំបាកក៏ដោយ។ Cambodia Youtuber
Note: វីដេអូនេះមិនមែនសំរាប់អួតបងប្អូននោះទេ នេះគ្រាន់តែជាក្តីអំណររបស់ខ្ញុំ និង ជាភស្តតាងមួយថាកូនខ្មែរក៏អាចទទួលលទ្ធផលពីក្រុមហ៊ុន Youtube បានដែរ។ សូមព្រះប្រទានពរ! »។
ក្រោយពីបានដឹងរឿងបែបនេះ មានអ្នកលេងបណ្តាញសង្គមជាច្រើនភ្ញាក់ផ្អើល និងមិននឹកស្មានថាគ្រាន់តែលេង Youtube សោះអាចរកលុយបានច្រើនដល់ម្លឹង។ ដូច្នេះអ្នកដែលកំពុងតែប្រឹងប្រែងស្វែងរកលុយតាមរយៈ Youtube កុំទាន់អាលអស់សង្ឃឹម និងកុំទាន់បោះបង់ចោល ការព្យាយាមគឺគង់តែបានសម្រេចនៅថ្ងៃណាមួយ៕