ប៉ៃលិន៖ ជារឿងហួសចិត្ត ញាក់សាច់ ព្រឺឆ្អឹងខ្នងមិនស្ទើរនោះទេដោយកាលពី ថ្ងៃទី២៥ ខែមិថុនា ២០១៩នេះ មានករណីមួយគួរឱ្យភ្ញាក់ផ្អើល ក្រោយ ស្ត្រីម្នាក់បានទិញដីមួយឡាន យកមកចាក់បំពេញដីបរិវេណផ្ទះ ស្រាប់តែបានប្រទះឃើញគ្រាប់មីន រហូតរន្ធត់ចិត្តជាខ្លាំងហៅអង្គភាពស៊ីម៉ាក់មកពិនិត្យ និងដោះគ្រាប់មីនចេញ។
បើយោងតាមការបង្ហោះរបស់លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជា បានសរសេរយ៉ាងដូច្នេះថា៖ « នៅខេត្តប៉ៃលិន ថ្ងៃទី២៥ ខែមិថុនា ២០១៩នេះ! នាំគ្រាប់មីនដល់ផ្ទះ!
ស្ត្រី៖ ពូស៊ីម៉ាក់ខ្ញុំទិញតែដីទេ ខ្ញុំមិនទិញគ្រាប់មីនទេព្រោះខ្ញុំដឹងថាខុសច្បាប់!
មន្ត្រីស៊ីម៉ាក់៖ ទិញដីកន្លែងណា មានប្លង់ទេ ខ្ញុំឆែកមើលផែនទីសិនក្រែងប៉ះចំលើ ចំការមីន!
ស្ត្រី៖ មិនមែនអ៊ីចឹងទេពូស៊ីម៉ាក! ខ្ញុំទិញដីមួយឡានចាក់បំពេញដីក្នុងផ្ទះហ្នឹងណា តែមានគ្រាប់មីននៅពេលកាយដីឡាននោះមកចាក់ផ្ទះ! មកពូស៊ីម៉ាក់ឯង មកមើលគ្រាប់មីនជាក់ស្តែងហ្នមក ស្រួលយល់គ្នា!
មន្ត្រីស៊ីម៉ាក់៖ សំណាងមួយក្នុងតែ១ម៉ឺនគ្រោះថ្នាក់!
ស្ត្រី៖ ខ្ញុំសំណាងអ៊ឺចឹងកាយជិតត្រូវគ្រាប់មីន! ហើយថ្ងៃស្អែកនឹងនាំសមាជិកគ្រួសារទាំងអស់ទៅស្រោចទឹកឱយបាន៧វត្ត » ។
មិនជាជារឿងលេងសើចនោះទេ ស្តាប់មើលទៅដំបូងហាក់បីដូចជារឿងកំប្លែង តែបើកាយប៉ះវិញប្រាកដជាទុក្ខធំជាមិនខាន អាចនឹងប៉ះពាល់ដល់អាយុជីវិតទៀតផង។ តែសំណាងដែលម្ចាស់ផ្ទះមានរាសីខ្ពស់ ដូច្នេះហើយម្ចាស់ផ្ទះនឹងនាំសមាជិកគ្រួសារទាំងអស់ទៅស្រោចទឹកឱ្យបាន៧វត្ត ៕