ចិន៖ ភោជនីយដ្ឋានមួយនៅក្នុងប្រទេសចិន មានទីតាំងស្ថិតនៅក្នុងទីក្រុង Shijiazhuang ខេត្ត Hebei បានធ្វើឱ្យគ្រប់គ្នាភ្ញាក់ផ្អើលញាក់សាច់ទ្រើកៗតែម្តង ចំពោះតម្លៃមីស៊ុបសាច់គោមានចាន ដែលមានតម្លៃកប់ពពកគឺមានចានដល់ទៅ ២០០០ដុល្លារ។
ភោជនីយដ្ឋានមួយនេះ ត្រូវបានគេដឹងថាមានលក់មី ឬគុយទាវស៊ុបសាច់គោ តម្លៃ ១៣,៨០០យ័ន ឬប្រហែល ២,០១៥ដុល្លារអាមេរិក ក្នុងមួយចាន ដែលជាតម្លៃមីស៊ុបគោមានតម្លៃថ្លៃជាងគេបង្អស់លើពិភពលោក។ តែម្ចាស់ហាងមីស៊ុបនេះ មិនបានបញ្ជាក់លម្អិតពីគ្រឿងផ្សំស្លរស៊ុបដ៏ថ្លៃមួយនេះឡើយ ដោយគ្រាន់តែបង្ហើបថា មីស៊ុបនេះធ្វើឡើងដោយយកតែសាច់គោល្អៗបំផុត និងមានផ្ទុកទៅដោយគ្រឿផ្សំសំខាន់ៗតែ ៤មុខតែប៉ុណ្ណោះ។
តែក្រៅពីមីស៊ុបសាច់គោ ដ៏ថ្លៃមួយនេះហើយ ហាងនេះក៏មានបម្រើមីស៊ុបធម្មតា ដែលមានតម្លៃ ៣៩៨យ័ន ឬប្រហែល ៥៨ដុល្លារអាមេរិក ដោយមានសាច់បង្កងអូស្រ្តាលី ជាមួយនឹងគ្រឿងផ្សំផ្សេងៗ មានផ្សិត និងឱសថចិនជាដើម។
ទោះជាយ៉ាងណាក្តីមានអ្នកលេងបណ្តាញសង្គមជាច្រើនមានការរិះគន់ជាខ្លាំងចំពោះតម្លៃលក់ដ៏ថ្លៃហួសស្មានមួយនេះ ដែលមើលតែរូបរាងពិតជាគ្មានអ្វីអស្ចារ្យគួរឱ្យចង់ទទួលទានឡើយ ដែលការដាក់តម្លៃនេះប្រហែលជាល្បិចនៃការទាក់ទាញអតិថិជនតែប៉ុណ្ណោះ៕