ស្វាយរៀង៖ ជាការពិតណាស់ ការប្រលងបញ្ចប់ការសិក្សាថ្នាក់ទី ១២ ទុតិយភូមិ នៅក្នុងឆ្នាំនេះមិនខុសពីឆ្នាំមុនទេ ដោយការប្រលងសុទ្ធតែត្រួវរឹតបន្តឹង និងមានវិន័យច្បាស់លាស់ ដែលជាហេតុធ្វើឱ្យសិស្សគ្រប់គ្នាសង្វាតសិក្សាតាំងពីដើមឆ្នាំមកម្ល៉េះមិនហ៊ានប្រហែលនោះទេ ដោយការប្រលងឆ្នាំនេះប្រព្រឹត្តិនៅថ្ងៃទី ១៩ និង ២០ ខែសីហា ឆ្នាំ ២០១៩ ។
អ្វីដែលកាន់តែភ្ញាក់ផ្អើល និងកោតសរសើរជាខ្លាំងវត្តអារាមមួយកន្លែងនៅខេត្តស្វាយរៀង គឺវត្ត « ព្រៃឆ្លាក់» មិនត្រឹមតែជាទីគោរពសក្ការបូជាដ៏ថ្លៃថ្លានៃព្រះពុទ្ធសាសនាទេ តែទាំងព្រះសង្ឃ និងបរិស័ទចំណុះជើងវត្តបានមូលមតិគ្នារៀបចំការរៀបចំបាយទឹកសម្រាប់សិស្សដែលមកប្រលងនៅវត្តព្រៃឆ្លាក់ផងដែរ។
ដោយការផ្តល់ជូនអាហារនេះនឹងផ្តល់ជូន អាណាព្យាបាល និងបេក្ខជនដែលមកប្រឡងសញ្ញាបត្រមធ្យមសិក្សាទុតិយភូមិសម័យប្រឡងថ្ងៃទី១៩-២០ ខែសីហា ឆ្នាំ២០១៩ ដែលមានជីវភាពខ្វះខាត ហើយក៏អាចមកស្នាក់នៅវត្តព្រៃឆ្លាក់បានដែរ ចាប់ពីថ្ងៃទី១៨-២០ ខែសីហា ឆ្នាំ២០១៩ ដោយអាហារមានទាំង៣ពេល ពេលព្រឹកបបរ ហើយថ្ងៃត្រង់ និងល្ងាច គឺបាយសម្ល។
គួរឱ្យដឹងផងដែរថា ការរៀបចំបាយទឹកជូនសិស្សក្រីក្រដែលមកប្រលងយកសញ្ញាបត្រ ក្រៅពីផ្តួចផ្តើមដោយ វត្តព្រៃឆ្លាក់ នៅក្នុងនោះមានសប្បុរសជនជិតឆ្ងាយជាច្រើនបាននាំគ្នាចូលរួមទាំងលុយកាក់ ទឹកសុទ្ធ បន្លែ ត្រី សាច់តាមលទ្ធភាពដែលខ្លួនមាន ដែលកាន់តែពិសេសនោះ លោក តូច ប៉ូលីវ៉ា អនុប្រធាន សសយក ខេត្ត តំណាងលោក ឌី វិជ្ជា ប្រធាន សសយក ខេត្តស្វាយរៀង បាននាំយកសម្ភាររួមមានអង្ករ បន្លែត្រសក់ ត្រឡាច ស្ពៃក្តោប ស្ពៃបូកគោ ការ៉ុត ដំឡូងបារាំង ខ្ទឹមបារាំងយកទៅប្រគេនព្រះចៅអធិការវត្តព្រៃឆ្លាក់សម្រាប់ចូលរួមចំណែកជាមួយព្រះចៅអធិការ ដេីម្បីទុកធ្វេីអាហារទទួលអាណាព្យាបាល និងបេក្ខជនដែលមកប្រឡងសញ្ញាបត្រមធ្យមសិក្សាទុតិយភូមិទៀតផង៕