កាណាដា៖ អាចថាជារឿងមួយចម្លែក ហើយក៏ជាការតស៊ូមួយដែលមិននឹកស្មានដល់ ដោយបុរសជនជាតិកាណាដាម្នាក់ ហ៊ានផ្សងសំណាងចាក់ឆ្នោតលេខដដែលៗអស់រយៈពេលដល់ទៅ ៣០ឆ្នាំ ទីបំផុតបែរជាទទួលបានរង្វាន់ធំពិតមែន។
បុរសអ្នកតស៊ូដ៏អស្ចារ្យមួយរួបនេះ មានឈ្មោះថា Bon Truong រស់នៅទីក្រុង Edmonton ប្រទេសកាណាដា ត្រូវបានគេដឹងថាបានឈ្នះឆ្នោតរង្វាន់ធំដល់ទៅ ៦០លានដុល្លា តាំងពីខែ តុលា ឆ្នាំ ២០១៨ មកម្ល៉េះ តែជំនួសឱ្យការទៅបើកប្រាក់រង្វាន់ភ្លាម លោក Bon Truong បែរជាទុកចោលដល់ទៅរយៈពេលជាង ១០ខែ ព្រោះតែលោកមានអារម្មណ៍ថារំភើបខ្លាំង និងភ្ញាក់ផ្អើលខ្លាំងពេក ជាពិសេសលោកត្រូវការពេលវេលាសម្រាប់ត្រៀមខ្លួនផងដែរ។
នៅក្នុងដើមហេតុដែលធ្វើឱ្យលោកព្យាយាមចាក់លេខដដែលៗរាប់ឆ្នាំនោះ លោក Bon Truong បានឱ្យដឹងថា លេខដែលលោកចាក់មានចំនួន , 3, 4, 8, 9, 20 និង 30 នោះ លេខទាំងនេះគឺសុទ្ធសឹងតែជាថ្ងៃសំខាន់ និងថ្ងៃកំណើតរបស់សមាជិកគ្រួសាររបស់លោកទាំងអស់។
ជាចុងក្រោយ លោក Bon Truong បានរៀបរាប់ថាចំពោះប្រាក់រង្វាន់ដ៏សន្ធឹកសន្ធាប់នេះ អាចផ្តល់អ្វីជាច្រើនដល់លោក ហើយលោកនឹងចាប់ផ្តើមទិញផ្ទះល្អមួយខ្នងសម្រាប់ក្រុមគ្រួសាររបស់លោក ឯប្រាក់ដែលនៅសល់លោកនឹងធ្វើការសន្សំវាទុកឱ្យបានល្អសម្រាប់ផែនការអនាគតដូចជាការធ្វើវិស្សមកាលកម្សាន្ត និងពេលចូលនិវត្ត៍ជាដើម៕
រក្សាសិទ្ធ៖ Kalib9