កាលពីមួយរយៈកន្លងមករឿងរ៉ាវជីវិតដ៏អភ័ព្វ ទុរគតរបស់លោកយាយមួយរូប បានធ្វើឱ្យគ្រប់គ្នានឹកអាណិតជាពន់ពេក ព្រោះតែលោកយាយចំណាស់នេះទៅហើយបែរជាមិនមានជីវិតរស់នៅស្រយលដូចគេឯងនោះទេ ដោយរាល់ថ្ងៃលោកយាយទីទ័លក្រណាស់ត្រូវចុះទឹករាវខ្ចៅខ្យងចិញ្ចឹមក្រពះខ្លួនឯងផង ត្រូវមើលថែចិញ្ចឹមកូនប្រុសដែលមានសតិមិនគ្រប់ផងដែរ។
ក្រោយពីបានដឹងរឿងរ៉ាវដ៏គួរឱ្យសង្វេកមួយនេះ អ្នកស្រី កូវ ច័ន្ទសុវណ្ណារិទ្ធ ដែលជាម្ចាស់សិប្បកម្ម និងអគ្គនាយិកាក្រុមហ៊ុន KCR Group បានចេញមកឈឺឆ្អាលជួយលោកយាយកម្សាត់យ៉ាងពេញដៃពេញជើង ដែលមិនត្រឹមតែសង់ផ្ទះថ្មីមួយខ្នងជូនលោកយាយ និងផ្តល់គ្រឿងបរិភោគប៉ុណ្ណោះទេ តែថែមទាំងធានាចិញ្ចឹមទំនុកបម្រុងលោកយាយអស់មួយជីវិតទៀតផង។
តាមរយៈគណនីហ្វេសប៊ុក Mona Bun បានសរសេររៀបរាប់ថា៖ « ថ្ងៃទី២៦ ខែតុលា ឆ្នាំ២០១៩ បងស្រី កូវ ច័ន្ទសុវណ្ណារិទ្ធ ហៅបងភាព អគ្គនាយិកាក្រុមហ៊ុន KCR Group បាននាំយកអំណោយមានគ្រឿងឧបភោគ បរិភោគ នឹងថវិកាមួយចំនួន មកប្រគល់ជូនទុរគតជន គឺលោកយាយលូន អាយុ៧៧ឆ្នាំ រស់នៅឃុំសំពៅពូន ស្រុកកោះធំ ខេត្តកណ្តាល ហើយបងស្រីភាពក៏បានចេញជាថវិកាសំរាប់ជួសជុលផ្ទះលោកយាយបន្ថែមទៀត។
លោកយាយលូនគឺជាទុរគតជនដែលខំរាវខ្ចៅ ខ្យង ក្នុងប្រឡាយយកទៅលក់ដើម្បីចិញ្ចឹមខ្លួនឯង នឹងកូនប្រុសដែលមានសតិមិនសូវគ្រប់ ដោយមើលពីការលំបាករបស់លោកយាយទើបបងស្រីភាពសំរេចផ្តល់អំណោយ នឹងជួសជុលផ្ទះជូនលោកយាយ ហើយបងស្រីនឹងជួយទំនុកបំរុងលោកយាយរហូតដល់លោកយាយអស់សង្ខារ។
លោកយាយសូមជូនពរបងស្រីភាព នឹងក្រុមគ្រួសារ ពិសេសម៉ារបស់បងស្រីគឺមហាឧបាសិកា ប៊ុន ស៊ាងលី សូមជួបតែពុទ្ធពរទាំង៥ប្រការ គឺអាយុ វណ្ណះ សុខៈ ពលៈ នឹងបដិភានៈកុំបីឃ្លាងឃ្លាតឡើយ❤️❤️❤️ អំពើល្អមិនសាបសូន្យ»។
គួរឱ្យដឹងផងដែរថា អ្នកស្រី កូវ ច័ន្ទសុវណ្ណារិទ្ធ មិនត្រឹមតែជាស្ត្រីដែលមានភាពជោគជ័យក្នុងមុខជំនួញដែលសាងពីដៃរបស់ខ្លួនឯងផ្ទាល់នោះទេ តែអ្នកស្រីក៏ត្រូវបានគេដឹងថាជាក្មួយស្រីសម្តេចអគ្គមហាសេនាតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាយើងផងដែរ៕