ភ្នំពេញ៖ អស់រយៈពេលជាច្រើនឆ្នាំរួចមកហើយ ដែលលោក ជា វិបុល បានសាងចំណងអាពាហ៍ពិពាហ៍ ជាមួយនឹង អ្នកនាង គង់ សុជាតិ ហើយក៏ទទួលបានចំណងដៃកូនស្រីដ៏គួរឲ្យស្រលាញ់ម្នាក់ថែមទៀតផង។
ហើយបើទោះបី ជាគូស្នេហ៍មួយគូនេះ បានរៀបអាពាហ៍ពិពាហ៍ អស់ជាច្រើនឆ្នាំហើយក្ដី ប៉ុន្តែអ្នកទាំងពីរនៅតែរក្សាចំណងស្នេហ៍ដ៏ផ្អែមល្ហែម ចាក់ទឹកមិនលិច មិនចាញ់គូស្នេហ៍ថ្មីថ្មោងប៉ុន្មាននោះទេ ធ្វើឱ្យគូស្នេហ៍វ័យក្មេងល្មមៗច្រណែនមិនស្ទើរ។
ថ្មីៗនេះផងដែរ អ្នកទាំងពីរ បានរៀបចំថ្ងៃគម្រប់ខួបអាពាហ៍ពិពាហ៍របស់ខ្លួនយ៉ាងអធិកអធម ប្រកបដោយភាពសប្បាយរីករាយ និងសុភមង្គលមែនទែន។
បន្ថែមពីនេះ លោក ជា វិបុល បានបង្ហោះរូបភាពផ្អែមល្ហែមនៃថ្ងៃគម្រប់ខួបអាពាហ៍ពិពាហ៍ កាលពីថ្ងៃទី ៩ ខែវិច្ឆិកា ឆ្នាំ ២០១៩ ថែមទាំងបង្ហោះសារយ៉ាងមានអត្ថន័យផងដែរថា៖ « អរគុណដែលបានចូលមកក្នុងជីវិតបង អរគុណដែលបានចូលមកផ្ដល់រឿងរ៉ាវល្អៗឲ្យគ្នា សូមផ្ដល់ការចងចាំល្អៗ ឲ្យគ្នាបែបនេះរហូតណា៎ សូមអោយពួកយើងស្រលាញ់គ្នាបែបនេះរហូតទៅ ... រីករាយខួបអាពាហ៍ពិពាហ៍ប្រពន្ធសម្លាញ់»។
ក្រោយពីឃើញរូបភាព និងសារមានអត្ថន័យផ្អែមល្ហែមបែបនេះហើយ អ្នកគាំទ្រជាច្រើនសុទ្ធតែសម្តែងនូវការកោតសរសើរជាខ្លាំង ថែមទាំងចង់បានជីវិតស្នេហាបែបនេះដូចគ្នា៕