មកស្គាល់ម្ចាស់គំនូរ Meme ២នាក់ម៉ែកូនរត់ចុះរត់ឡើង ដែលកំពុងល្បីលើបណ្តាញសង្គមសព្វថ្ងៃ
យើងប្រាកដជាបានដឹងរួចមកហើយថា សព្វថ្ងៃរូបគំនូរ Meme មានភាពល្បីល្បាញខ្លាំងមែនទែននៅក្នុងបណ្តាញសង្គមហ្វេសប៊ុកនៅកម្ពុជា តែរូបគំនូរ Meme ដែលល្បីជាងគេបំផុតក្នុងពេលបច្ចុប្បន្ន នោះគឺរូបគំនូររត់ចុះរត់ឡើងរវាងម្តាយកូន ២នាក់ ដែលត្រូវបានគេ Edit ជាអក្សរខុសៗគ្នាដើម្បីជាការកម្សាន្តសប្បាយ តែយើងប្រាកដជាមិនបានដឹងឡើយ ថានរណាជាម្ចាស់គំនូរ Meme ដ៏ល្បីមួយនេះ?
ជាការពិតណាស់ ម្ចាស់គំនូរ Meme នេះ ត្រូវបានគេដឹងថាគឺជាវិចិត្រករជនជាតិអាមេរិចដើមដ៏ល្បីមួយរួបមានឈ្មោះថា Ricardo Caté មកពីរដ្ឋ New Mexico សហរដ្ឋអាមេរិក ដែលលោកត្រូវបានគេស្គាល់ច្បាស់តាមរយៈស្នាដៃ ត្លុកកំប្លែងមួយមានចំណងជើងថា « Without Reservations » ដែលចេញផ្សាយជារៀងរាល់ថ្ងៃនៅលើកាសែត Santa Fe New Mexican និង Taos News ដោយរាល់រូបភាពរបស់លោកគឺសុទ្ធតែបង្កប់នូវភាពរីករាយ កំប្លុកកំប្លែង ស្តែងពីជីវិតរស់នៅរបស់ជនជាតិអាមេរិចដើមបច្ចុប្បន្ន។
ជាក់ស្តែងក្រៅពីមានអាជីពជាវិចិត្រករ គូររូបត្លុក លោក Ricardo Caté ក៏មានអាជីពជាច្រើនផ្សេងទៀតផងដែរ ដូចជា សកម្មជន អ្នកនិយាយរឿងកំប្លែង អ្នកនិពន្ធ គ្រូបង្រៀន អតីតអត្តពលិក និងអ្នកផលិតភាពយន្តជាដើម ដោយលោកថែមទាំងមានអ្នកគាំទ្រជាតារាល្បីៗជាច្រើនផងដែរដូចជា Wes Studi, Jackie Chan, Winona LaDuke, Nick Nolte និង Dennis Banks ជាដើម។
នៅក្នុងនោះ ចំំណែកឯរូបភាព ម្ដាយកូន២នាក់ រត់ចុះរត់ឡើង ដែលកំពុងតែល្បីល្បាញមួយនេះ ត្រូវបានគេដឹងថាជារូបគំនូរមួយនៅក្នុងផ្នែក « Without Reservations » ដែរ តែមិនដឹងកាលបរិច្ឆេទនៃការចេញផ្សាយច្បាស់លាស់នោះទេ។ ដោយរូបភាពនេះត្រូវបានគេយកមកចែកចាយលើបណ្ដាញសង្គមដំបូងៗនៅអំឡុងចុងឆ្នាំ ២០១៨ ចំណែកឯប្រទេសកម្ពុជាយើងចាប់មានឈ្មោះល្បីល្បាញក្នុងអំឡុង ខែវិច្ឆិកាឆ្នាំ ២០១៩ នេះប៉ុណ្ណោះ តែរូបគំនូរនេះត្រូវបានគេកៃច្នៃខុសពីលំនាំដើម ៕
Recent News
