ថ្មីៗនេះមានការភ្ញាក់ផ្អើលខ្លាំង ក្រោយពីរូបភាព និងវីដេអូសត្វភេមួយគូ ហែលនៅក្នុងកស្សិណទឹកអង្គរធំ ត្រូវបានគេចែកចាយពេញបណ្តាញសង្គម មិននឹកស្មានថាសត្វកម្រមួយនេះតាំងលំនៅក្នុងទឹកដីអង្គរយើងឡើយ។
តែស្រាប់តែពេលនេះ ក្រុមអាជ្ញាធរ បានចេញមកបកស្រាយយ៉ាងលម្អិតថា សត្វមួយគូនេះមិនមែនជាសត្វធម្មជាតិ ដែលរស់នៅទីនេះទេ តែរដ្ឋបាលព្រៃឈើ និងអាជ្ញាធរយកមកផ្សាំង និងព្រលែងនៅទីនេះប៉ុណ្ណោះ។
តាមរយៈគណនីហ្វេសប៊ុកផេក អ្នកថែអង្គរ - Angkor Guardians បកស្រាយយ៉ាងសម្អិតថា៖
« ស្រាយចម្ងល់រឿងសត្វភេ ចំនួន០២ ដែលគេប្រទះឃេីញនៅបរិវេណអង្គរធំ (មានរូបភាពខាងក្រោម) ៖
កន្លងមកអាជ្ញាធរជាតិអប្សរា បានសហការជាមួយ Wildlife Alliance និងរដ្ឋបាលព្រៃឈើ បាននាំយកសត្វព្រៃមួយចំនួនមកផ្សាំង ហេីយដោះលែងនៅក្នុងតំបន់អង្គរជាបន្តបន្ទាប់។
មកដល់បច្ចុប្បន្ន មានសត្វទោចម្កុជ ១០ក្បាល ឈ្លូស ០៤ក្បាល សំពោច ០៤ក្បាល ស្វាព្រាម ១២ក្បាល និងសត្វមួយចំនួនទៀតត្រូវបានដោះលែង។
ដោយឡែក សត្វភេប្រភេទ Smooth-Coated Otter ចំនួន ០៥ ក្បាល (ឈ្មោល០១ ញី០៤) ដែលទេីបប្រទះឃេីញ០២ក្បាល ត្រូវបានដឹកពីភ្នំតាម៉ៅ មកផ្សាំងនៅក្នុងទ្រុងបរិវេណអង្គរធំ តាំងពីថ្ងៃទី០៣ ខែកក្កដា ឆ្នាំ២០១៩ មកម្លេះ។ ទេីបតែកាលពីពេលថ្មីៗនេះ នៅចុងខែវិច្ឆិកា ទេីបត្រូវបានដោះលែងក្នុងព្រៃអង្គរធំដែលជាកន្លែងសុវត្ថិភាព !
#សូមស្រលាញ់អង្គរ ស្រលាញ់ព្រៃឈើ ស្រលាញ់សត្វព្រៃ ដូចស្រលាញ់ជីវិតខ្លួនយើងផងដែរ! 🐅 🐒 🦁 💞🙏💞 » ។