ភ្នំពេញ៖ គ្រាន់តែឈានចូលឆ្នាំ២០២០ មិនទាន់បានប៉ុន្មានផង តារាចម្រៀងពូកែរ៉េប កម្ពស់សង្ហាលោក ងួន ចាន់ដេវីដ (G-Devith) ហាក់មានយីអ៊ុនខ្ពស់ ខណៈលោកបានក្លាយជាអ្នកដំណាងផលិតផលពីរ ស្របគ្នា ហើយសុទ្ធតែជាផលិតផលដែលមកដល់ថ្មីដូចគ្នា។
ថ្មីៗនេះគេឃើញ ក្រុមហ៊ុនទូរស័ព្ទ Realme បានបង្ហោះរូបភាពរបស់លោក G-Devith អមជាមួយសារបញ្ជាក់ថា លោកបានក្លាយជាអ្នកដំណាងផលិតផលរបស់ Realme ហើយ ហើយក៏ទន្ទឹមគ្នានោះដែរ ក្រុមហ៊ុនភេសជ្ជៈ Sting ក៏បានបង្ហោះសារដែលបញ្ជាក់ពីអ្នកដំណាងរបស់ក្រុមហ៊ុននេះផងដែរ ខណៈដែលរូបថតពាក់វែនតាពណ៌ខ្មៅ អមជាមួយកំប៉ុង Sting រសជាតិថ្មី នៅក្នុងដៃលោក G-Devith នោះផងដែរ។
គួររំលឹកផងដែរថា លោក G-Devith ហាក់ទទួលបានប្រជាប្រិយភាពកាន់តែខ្លាំងក្រោយចាប់ដៃគូជាមួយគូស្នេហ៍របស់លោក កញ្ញា ទេព បូព្រឹក្ស ក្នុងបទចម្រៀងថ្មីៗនេះ ខណៈអ្នកគាំទ្រមិនតិចនាក់កំពុងរង់ចាំដំណឹងពីគូស្នេហ៍មួយគូនេះ ថាតើពួកគេសម្រេចកាន់ដៃគ្នាដើរចូលរោងការនៅថ្ងៃណា៕