ចូលរួមសោកស្តាយផង! បុរសកម្ពស់ទាបជាងគេបំផុតរហូតជាប់កំណត់ត្រាឯកត្តកម្មពិភពលោក បានទទួលមរណភាពហើយ
នេប៉ាល់ ៖ ជារឿងដ៏គួរឱ្យសោកស្តាយបំផុត ដែលកាលពីប៉ុន្មានម៉ោងមុននេះ មានដំណឹងច្បាស់ការណ៍បានឱ្យដឹងថា បុរសដែលមានកម្ពស់ទាបជាងគេលើពិភពលោករហូតបានជាប់នៅក្នុងកំណត់ត្រាឯកត្តកម្មពិភពលោក (Guinness World Records ) បានទទួលមរណភាពហើយដោយជំងឺ។
បុរសដែលមានកម្ពស់ទាបជាងគេមួយរូបនេះមានឈ្មោះថា Khagendra Thapa Magar កើតនៅថ្ងៃទី ១៤ ខែតុលា ឆ្នាំ ១៩៩២ នៅស្រុក Baglung ប្រទេសនេប៉ាល់ ដែលជាកូនប្រុសច្បងរបស់លោក Roop Bahadur និងអ្នកស្រី Dhan Maya ។
នៅឆ្នាំ ២០១០ ក្នុងថ្ងៃគម្រប់ខួបអាយុ ១៨ឆ្នាំរបស់គាត់ គាត់ត្រូវបានគេដឹងថាមានកម្ពស់ត្រឹមតែ ៦៧,០៨ សង់ទីម៉ែត្រ (២ ហ្វីត ២,៤១ អ៊ីញ) តែប៉ុណ្ណោះ ហើយដើមឆ្នាំ ២០១០នេះ លោកក៏បានចូលរួមកម្មវិធីឯកត្តកម្មពិភពលោក (Guinness World Records ) រហូតទទួលបានជ័យលាភីក្លាយជាបុរសដែលមានកម្ពស់ទាបជាងគេបំផុតលើលោកដែលមានជីវិត និងអាចដើរបានដោយខ្លួនឯង។
តាមរយៈព័ត៌មានបានឱ្យដឹងថា កម្មវិធី Guinness World Records បានជួបជាមួយនឹង Khagendra ជាលើកចុងក្រោយនៅក្នុងឆ្នាំ ២០១៨ ដើម្បីថតវីដេអូខ្លីមួយស្តីពីការរស់នៅរបស់គាត់ ដោយកាលនោះលោកមានសុខភាពល្អអាចរត់លេងជិះម៉ូតូ លេងហ្គីតា និងចំណាយពេលនៅក្នុងហាងរបស់គ្រួសាររបស់លោកដោយសុខភាពល្អជាប្រក្រតី។
តែស្រាប់តែថ្មីៗនេះ យោងទៅតាមការរៀបរាប់របស់មិត្តភក្តិ Khagendra បានឱ្យដឹងថា គេបានរកឃើញថា Khagendra មានបញ្ហាទាក់ទងបេះដូង ជំងឺហឺត និងជំងឺរលាកសួតគួរឱ្យបារម្ភ និងដុនដាបយ៉ាងឆាប់រហ័ស។ រហូតដល់ថ្ងៃព្រហស្បតិ៍ ទី ១៦ ខែមករា ឆ្នាំ ២០២០ នេះ ជំងឺរបស់លោកស្រាប់តែធ្វើទុក្ខយ៉ាងខ្លាំងត្រូវបញ្ជូនទៅមន្ទីរពេទ្យ Manipal នៅប្រទេសនេប៉ាល់ ជាបន្ទាន់ ហើយជាអកុសល លោកក៏បានទទួលមរណភាពនៅម៉ោង ៣ រសៀល ថ្ងៃសុក្រ ទី ១៧ ខែមករា ឆ្នាំ ២០២០ នេះតែម្តង។
យើងខ្ញុំសូមធ្វើការចូលរួមរលែកទុក្ខដ៏ក្រៀមក្រំនេះផង!
ដោយ៖ Kalib9
ព័ត៌មានថ្មីៗ
