សូមក្រសួងពាក់ព័ន្ធជួយផង! និស្សិតខ្មែររៀននៅទីក្រុង Wuhan ប្រទេសចិន ដែលកំពុងតែផ្ទុះវីរុសថ្មី កំពុងតែស្វែងរកជំនួយជាបន្ទាន់
ជាការពិតណាស់ វីរុសថ្មីឈ្មោះថា Corona ដែលជាជំងឺឆ្លងតាមផ្លូវដង្ហើមថ្មីស្រដៀងនឹងជំងឺសារ បានធ្វើឱ្យគ្រប់គ្នាខ្លាចរអារខ្លាំង ដោយសារតែជំងឺនេះឆ្លងយ៉ាងលឿនតាមផ្លូវដង្ហើមអាចបណ្តាលឱ្យស្លាប់យ៉ាងឆាប់រហ័ស ជាពិសេសវីរុសនេះបាននឹងកំពុងតែរាលដាលពេញប្រទេសចិន និងប្រទេសនានា ដោយជំងឺនេះផ្ទុះឡើងដំបូងនៅក្នុងក្រុង Wuhan ប្រទេសចិន រហូតប្រជាជនជាង ១១លាននាក់នៅក្នុងក្រុង Wuhan នេះត្រូវបានគេហាមដាច់ខាតចេញពីទីក្រុងនេះ បង្ការការឆ្លងរាលដាលទៅបណ្តាខេត្ត និងប្រទេសដទៃ។
តែអ្វីកាន់តែរន្ធត់ចិត្តនោះ និស្សិតខ្មែរមួយរូបក៏ត្រូវបានគេដឹងថាកំពុងតែជាប់គាំងនៅក្នុងក្រុង Wuhan ប្រទេសចិនដែលកំពុងតែផ្ទុះជំងឺវីរុសកាចសាហាវនេះផងដែរ បើទោះបីជាមិនមានបញ្ហាទាក់ទងនឹងការឆ្លងជំងឺ តែនិស្សិតមួយរូបនេះបានប្រឈមមុខនឹងការរស់នៅគួរឱ្យបារម្ភនោះគឺការដាច់ស្បៀងតែម្តង។
តាមរយៈគណនីហ្វេសប៊ុក Oeun Leakhena ដែលជាសាច់ញាតិរបស់និស្សិតមួយរូបនោះបានរៀបរាប់ថា៖ « ខណ:ពេលដែលវីរុសកំពុងផ្ទុះនៅស្រុកចិន ប្អូនប្រុសដែលទៅស្នាក់នៅរៀនសូត្រនៅទីនោះកំពុងតែជាប់គាំង មកស្រុកខ្មែរវិញក៏មិនបាន ជាពិសេសជិតដាច់ស្បៀងទៀត ព្រោះថាបណ្តាផ្សារនានាត្រូបិទដំណេីរការទាំងអស់។
🙏សូមប្រមុខថ្នាក់ដឹកនាំជួយរកដំណោះស្រាយដល់ប្អូនប្រុស ចាន់ថន រស្មី Chanthorn Raksmey. ក៏ដូចជានិស្សិតផ្សេងៗទៀតផងដែរ🙏 អ្នកម្តាយយំឡេីងខ្សោះខ្លួនអស់ហេីយ»។
ដូច្នេះសូមក្រសួងពាក់ព័ន្ធ ឬខាងស្ថានទូតខ្មែរនៅក្នុងប្រទេសចិន ជួយដោះស្រាយបញ្ហា និងការលំបាករបស់និស្សិតខ្មែរយើងផង ព្រោះនៅទីនោះបើតាមព័ត៌មានបានឱ្យដឹងមាននិស្សិតខ្មែរយើងរស់នៅដល់ទៅ ២០នាក់ សុទ្ធតែកំពុងតែជួបបញ្ហាអាសន្នធំ ភ័យទាំងការឆ្លងវីរុសថ្មី ភ័យទាំងគ្មានស្បៀងអាហារចិញ្ចឹមជីវិត ដោយសារតែខេត្តនោះហាងទំនិញនានាបានបិទលែងលក់ទំនិញតទៅទៀតហើយ ពោលគឺប្រជាជនទាំងអស់នៅក្នុងផ្ទះមិនហ៊ានចេញក្រៅ ភ័យព្រួយខ្លាចឆ្លងវីរុស Corona ថ្មីនេះតែម្តង ៕
Recent News
