មិនរៀងចាល! ស្ពានមួយទៀតហើយ ធំជាងស្ពានមុនទៀតនៅជិតតំបន់អភិរក្សរបស់លោកបេនត្រូវបានដុត តែជាសំណាងល្អត្រូវបានជួយពន្លត់ទាន់ពេល
ដូចយើងបានដឹងហើយថា ជនបរទេសមួយរូប ឈ្មោះ Ben Davis ជាជនជាតិបរទេសដែលស្រលាញ់ស្រុកខ្មែរ និងតែងធ្វើកិច្ចការជួយអភិរក្សការពារព្រៃឈើក្នុងប្រទេសកម្ពុជាគួរឱ្យកោតសរសើរ។
តែថ្មីៗនេះស្ពានផ្លូវចេញចូលផ្ទះរបស់លោកត្រូវបានជនសង្ស័យ ដែលអាចជាក្រុមឈ្មួញជួញដូរឈើខុសច្បាប់បានដុតបំផ្លាញសល់តែផេះ ធ្វើឱ្យមហាជនមានការខឹងសម្បារជនអគតិ និងអាណិតអាសូរដល់លោក Ben ជាខ្លាំង ដោយក្នុងនោះមានប្រជាជនខ្មែរទាំងតូចទាំងធំបានចេញមុខជួយជាថវិកាសាងសង់ស្ពានថ្មី និងទឹកប្រាក់ជួយផ្គត់ផ្គង់ការងារលោក Ben បន្តការងាររបស់ខ្លួនតទៅទៀត។
អ្វីដែលមិននឹកស្មានដល់ ហាក់មិនញញើតបន្តិចសោះ ស្ពានមួយកន្លែងទៀតហើយជិតតំបន់អភិរក្សលោក Ben ត្រូវបានគេដុតទៀតហើយ តែជាសំណាងល្អត្រូវបានគេជួយពន្លត់ទាន់។
តាមរយៈប្រភពព័ត៌មានពីលោក តាន់ គីមសួរ បានឱ្យដឹងថា៖ « ស្ពានមួយទៀតហើយ ធំជាងស្ពានមុនទៀតនៅជិតតំបន់អភិរក្សរបស់លោកបេនត្រូវបានដុត តែជាសំណាងល្អត្រូវបានជួយពន្លត់ទាន់ពេល។ នេះប្រហែលជាសញ្ញាមួយចង់បង្ហាញចង្កោមឲ្យគ្រប់គ្នាដឹងថាជនល្មើសព្រៃឈើសាហាវប៉ុណ្ណា ពួកគាត់មិនខ្លាចអ្នកណាទាំងអស់។ ពួកយើងមានការព្រួយបារម្ភអំពីសុខសុវត្តិភាពរបស់លោកបេននិងបងៗកងកំលាំងការពារព្រៃឈើនៅតំបន់នោះជាខ្លាំង😔😔😔 សូមអាជ្ញាធរមូលដ្ឋានចូលរួមសហការផង🙏🙏🙏 »។
សង្ឃឹមថាអាជ្ញាធរ និងសមត្ថកិច្ចពាក់ព័ន្ធជួយដោះស្រាយ និងចាប់ជនល្មើសមកផ្តន្ទាទោសតាមច្បាប់ កុំឱ្យវាចេះតែផ្គើនសមត្ថកិច្ចតទៅទៀត៕
ព័ត៌មានថ្មីៗ
