ទម្លាប់ ៤ នៅខាងក្រោម គិតទៅវាសាមញ្ញ ប្រហែលមិនប៉ះពាល់ ហើយខ្លះអាចនាំផលល្អមកកាន់រាងកាយ តែយ៉ាងណាស៊ីជម្រៅទៅ វាធ្វើឲ្យយើងកាន់តែបាក់សម្រស់ ចាស់ជាងវ័យទៅវិញទេ។ តើអ្នកកំពុងមានទម្លាប់ទាំងអស់នោះដែរទេ? បើមាន គួរតែដល់ពេលបោះបង់វាចោលហើយ៖
៤) ងូតទឹកយូរពេក
មនុស្សជាច្រើនមានទម្លាប់ងូតទឹកក្តៅនៅពេលព្រឹក ដោយគិតថាវាស្រស់ស្រាយ តែយ៉ាងណាកុំងូតយូរពេក ព្រោះវាអាចបំផ្លាញស្រទាប់ស្បែកទៅវិញទេ។
ទឹកក្តៅបំផ្លាញរបាំងស្បែក ធ្វើឲ្យស្បែកបាត់បង់សំណើម ហើយការងូតកាន់តែយូរ នឹងអាចបំផ្លាញស្បែក ធ្វើឲ្យវាឡើងរីក ស្រអាប់ដោយមិនដឹងខ្លួន។ ដូច្នេះយកល្អ កុំងូតលើសពី ១០ ទៅ ១៥ នាទី ហើយបើអាចប្តូរមកទឹកត្រជាក់ធម្មតាខ្លះក៏ល្អដែរ។
៣) ផឹកកាហ្វេមុនគេបង្អស់នៅពេលព្រឹក
ការផឹកកាហ្វេមុនគេបង្អស់ រៀងរាល់ព្រឹក ក៏អាចធ្វើឲ្យប៉ះពាល់ដល់ស្បែករបស់អ្នកដូចគ្នា។ ក៏ដោយសារតែកាហ្វេ វាអាចធ្វើឲ្យរាងកាយខ្សោះជាតិទឹក ហើយបង្កការលំបាកក្នុងការបញ្ចេញជាតិពុលពី រាងកាយតាមរយៈស្បែក បណ្តាលឲ្យស្បែកឆាប់ចាស់រិចរិល។
២) លាបឡេការពារកម្តៅថ្ងៃ តែពេលនៅក្រោមពន្លឺថ្ងៃ
អ្នកខ្លះគិតថា ទាល់តែដើរទៅខាងក្រៅ ត្រូវថ្ងៃ ឬក្រោមពន្លឺថ្ងៃ ទើបពួកគេលាបឡេការពារកម្តៅថ្ងៃ។ វាជារឿងខុសឆ្គងទៅវិញទេ ព្រោះតាមពិតទៅ សូម្បីតែឧបករណ៍អេឡិចត្រូនិកនៅជុំវី្អ្នក ក៏អាចបង្កផលប៉ះពាល់នៃកាំរស្មី UVA មកលើស្បែកផងដែរ។
ជាពិសេសអ្នកធ្វើការក្នុងការិយាល័យ នៅមុខកុំព្យូទ័រច្រើនម៉ោង យកល្អគួរលាបឡេការពារកម្តៅថ្ងៃជាប្រចាំ។
១) ទម្លាប់ថែរក្សាសម្រស់ មិនតាមរដូវ
មានន័យថា អ្នកប្រកាន់ខ្ជាប់ប្រើប្រាស់តែផលិតផលមួយពេញមួយឆ្នាំ ដោយមិនគិតថា វាចូលរដូវរងា ក្តៅ ឬស្លឹកឈើជ្រុះនោះទេ។ អ្នកជំនាញណែនាំថា ស្បែកក៏មានបម្រែបម្រួលទៅតាមរដូវកាលនីមួយៗផងដែរ ដូច្នេះគួរផ្លាស់ប្តូរទៅតាមរដូវនីមួយៗ ព្រោះផលិតផលខ្លះមិនអាចជួយយើងគ្រប់ស្ថានភាពបានឡើយ ហើយវាអាចធ្វើឲ្យស្បែកប្រតិកម្ម បង្កជាឥទ្ធិពលអាក្រក់ទៅវិញ៕
ប្រភព៖ បរទេស | ប្រែសម្រួល៖ ក្នុងស្រុក