មេរៀនជោគជ័យដ៏អស្ចារ្យ ទាំង៧ចំណុច របស់ស្ថាបនិក KFC (មានវីដេអូ)
លោកវរសេនីយ៍ឯក Sanders ត្រូវបានបដិសេធចំនួន ១០០៩ដង មុនពេលដែលគាត់ទទួលបានជោគជ័យនៅក្នុងការលក់រូបមន្ដ មានបំពង Kentucky (KFC) របស់គាត់។ គាត់ធ្លាប់ជួបប្រទះបរាជ័យជាមួយនឹងការងារជាច្រើន នៅក្នុងជីវិតកាលពីវ័យកណ្ដាលរបស់គាត់ ដែលមានដូចជា ការធ្វើជាមេធាវី ភ្នាក់ងារលក់ និងមុខរបរផ្សេងទៀតជាច្រើន។
លោកវរសេនីយ៍បានរៀបអាពាហ៍ពិពាហ៍ជាមួយនឹងភរិយារបស់គាត់គឺលោកស្រី Josephine តាំងពីគាត់មានវ័យ ១៩ឆ្នាំ គាត់មានកូន ៣នាក់ ហើយតែងតែលួចលាក់មានស្រីខាងក្រៅជាច្រើន រហូតជីវិតអាពាហ៍ពិពាហ៍របស់គាត់ត្រូវបានបញ្ចប់ដោយការលែងលះ។
តាមរយៈជីវិតរបស់គាត់ យើងពិតជាអាចនិយាយបានថា គាត់គឺពិតជាមិនមានជីវិតដែលល្អប្រសើរមួយឡើយ នៅពេលដែលគាត់ធំធាត់ឡើង។ ហើយជាការពិត គាត់មិនអាចទទួលជោគជ័យនៅក្នុងការលក់ក្រុមហ៊ុនរបស់គាត់នោះទេ រហូតទាល់តែគាត់មានវ័យ ៧៥ឆ្នាំ!
វាគឺពិតជាគ្មានភាពសង្ស័យនោះទេ ដែលអ្វីៗគ្រប់បែបយ៉ាងគឺតែងតែប្រឆាំងនឹងរូបគាត់។ រឿងរ៉ាវជីវិតរបស់គាត់គឺពិតជារឿងដែលជម្រុញទឹកចិត្ត និងពោរពេញទៅដោយក្ដីសង្ឃឹមសំរាប់មនុស្សទាំងឡាយ ដែលតែងតែគិត និងធ្លាប់គិតថាអ្វីៗគឺហួសពេល។ រឿងដែលសំខាន់នោះគឺ វាគឺពិតជាគ្មានបញ្ហាអ្វីឡើយ ទោះជាអ្នកមានអាយុ ២០ឆ្នាំ ឬ ៧០ឆ្នាំ ក៏ដោយ អ្នកនៅតែអាចក្រោកឈរឡើងវិញ ហើយបន្តដំណើរទៅមុខបន្តទៀត។ អ្នកមិនអាចធ្វើអ្វីមួយបាន លើកលែងតែអ្នកឈប់ដកដង្ហើមប៉ុណ្ណោះ។
ខាងក្រោមនេះ ចំណេះ សូមលើកយកនូវមេរៀនជោគជ័យ ៧ ចំណុចដែលប្រិយមិត្តអាចទទួលបានពី បទពិសោធន៍ជីវិតដ៏លំបាករបស់គាត់៖
១) អ្នកត្រូវតែឆ្លងកាត់ការបរាជ័យ មុនពេលដែលអ្នកទទួលបាននូវភាពជោគជ័យ
នៅសេចក្ដីផ្ដើមពីខាងលើ ដូចអ្វីដែល ចំណេះ បានរ៉ាយរ៉ាប់ប្រាប់ដល់ប្រិយមិត្តនោះគឺថា លោកវរសេនីយ៍ឯក Sanders ត្រូវបានគេបដិសេធច្រើនជាង មួយពាន់ដង មុនពេលដែលគាត់ទទួលបានជោគជ័យនៅក្នុងការ ការលក់រូបមន្ដមានបំពងរបស់គាត់។
១០០០ដង!
មិនត្រឹមតែប៉ុណ្ណោះ ចំណេះ ក៏បានបញ្ជាក់ដែរថាគាត់បានទទួលបរាជ័យរាប់មិនអស់ ទៅលើការងារផ្សេងៗទៀត ដែលគាត់ព្យាយាមធ្វើ។ លោកតា បានព្យាយាមជាច្រើនដង និងបរាជ័យស្ទើរតែក្រោកមិនរួចចំពោះ ការងារមួយចំនួនដែល ចំណេះ នឹងរ៉ាយរ៉ាប់ខាងក្រោមនេះ តាំងពីគាត់មានអាយុ ១០ឆ្នាំ រហូតដល់ ៤០ឆ្នាំ ដែលមានដូចជា៖
- ការធ្វើស្រែចំការ
- អ្នកបើកបររថយន្ដលើផ្លូវដែក
- មេធាវី
- អ្នកលក់ធានារ៉ាប់រង និង
- អ្នកដុតធ្យូងរទេះភ្លើង
អ្វីទាំងអស់ខាងលើនេះពិតជាបានបង្ហាញដល់ប្រិយមិត្តថា ទោះបីជាអ្នកទទួលនូវភាពបរាជ័យដែលអ្នកទទួលនៅក្នុងជីវិត គឺមានចំនួនច្រើនប៉ុណ្ណាក៏ដោយ អ្នកគឺនៅតែមានលទ្ធភាពទទួលបាននូវភាពជោគជ័យ ក្នុងពេលណាមួយ។
ហើយសំរាប់ប្រិយមិត្តដែលបានអានអត្ថបទមួយនេះ ដែលធ្លាប់មានគំនិតថា អ្វីៗគឺយឺតពេលសំរាប់ខ្លួនឯងនោះ សូមចាប់ផ្ដើមគិត និងធ្វើវាម្ដងទៀត ពីព្រោះអ្វីៗគឺមិនយឺតពេលនោះទេ អោយតែអ្នកនៅតែមានដង្ហើម។
២) អ្នកគឺមិនដែលចាស់ពេក ក្នុងការទទួលបាននូវភាពជោគជ័យឡើយ
នៅពេលដែលលោកតា Sanders ទទួលបាននូវភាពជោគជ័យ ហើយអាចលក់រូបមន្តមាន់បំពងរបស់គាត់ ដែលមានតម្លៃរហូតដល់ ២លានដុល្លា បាននោះគឺគាត់មានវ័យរហូតដល់ ៧៥ឆ្នាំទៅហើយ។ ហើយចំនួនទឹកប្រាក់នោះគឺស្មើនឹង ១៥លានដុល្លានាពេលបច្ចុប្បន្ន។
ហើយគាត់នៅតែមានតួនាទីជាអ្នកនាំពាក្យរបស់ក្រុមហ៊ុនដដែល ទោះបីក្រោយពេលការដាក់លក់ជាផ្លូវការក៏ដោយ។
ប៉ុន្តែបើសិនជាវ័យ ៧៥ឆ្នាំ សំរាប់មនុស្សធម្មតាៗភាគច្រើនវិញ ប្រហែលជាពួកគាត់បោះបង់ចោលបាត់ទៅហើយ។ មនុស្សភាគច្រើនឈប់គិត និងលែងហ៊ានស្រមៃថាខ្លួនអាចមានលទ្ធភាពទទួលបានជោគជ័យ ទោះបីជាអ្នកខ្លះមានវ័យត្រឹម ៣០ឆ្នាំជាងក៏ដោយ!
ប៉ុន្តែសំរាប់លោកតា Sanders វិញគឺគាត់មិនគិតដូច្នេះទេ ហើយនៅទីបំផុត គាត់ពិតជាអាចទទួលបាននូវភាពជោគជ័យ ហើយនិងក្លាយទៅជានិមិត្តសញ្ញា និងអ្នកតំណាងអោយម៉ាកផលិតផលមួយដែលមានតម្លៃ រាប់ពាន់លានដុល្លា។
ដូច្នេះមុនពេលអ្នកចាប់ផ្ដើមគិតថា រូបអ្នកមិនអាចទៅដល់គោលដៅ ឬឈោងចាប់ក្ដីសុបិន្ដរបស់ខ្លួនឯងបាន ដោយសារតែអ្នកមានវ័យជាង ៣០ ៤០ ឬក៏ ៥០ឆ្នាំនោះ សូមបញ្ឈប់វាជាបន្ទាន់។ អ្នកត្រូវចងចាំថា អ្នកគឺពិតជាមិនចាស់ ក្នុងការទទួលបាននូវភាពជោគជ័យដែលខ្លួនចង់បាននោះទេ។
៣) រឿងរ៉ាវរបស់អ្នកពីអតីតកាលគឺពិតជាមិនអាចកំណត់ពីភាពជោគជ័យរបស់អ្នកបាននោះទេ
មេរៀនជោគជ័យដ៏អស្ចារ្យមួយ ដែលមនុស្សគ្រប់គ្នាគួរតែបានស្ដាប់នោះគឺ អ្វីដែលបានកើតឡើងចំពោះអ្នកពីអតីតកាល គឺពិតជាមិនពាក់ព័ន្ធ និងមិនអាចកំណត់ពីជោគជ័យរបស់អ្នកនាពេលអនាគតបាននោះទេ។
វាពិតជាគ្មានបញ្ហាឡើយទោះជាអ្នកធ្លាប់ដួលប៉ុន្មានដងក៏ដោយ។ ទីកន្លែងដែលអ្នកកើត ស្ថានភាពគ្រួសាររបស់អ្នក និងអ្វីដែលអ្នកបានជួបក្នុងជីវិតនាពេលអតីតកាល គឺពិតជាមិនអាចកំណត់ពីជោគជ័យរបស់អ្នកបានដូចគ្នា។
ចំណេះ សូមបញ្ជាក់ម្ដងទៀត មើលតែលោកតា Sanders ជាគម្រូទៅ។ គាត់បរាជ័យស្ទើរតែគ្រប់ការងារនៅក្នុងជីវិតរបស់គាត់! គាត់មានជីវិតអាពាហ៍ពិពាហ៍ដែលមិនរីករាយមួយ ជាមួយនឹងកូន ៣នាក់ តាំងពីគាត់មានវ័យក្មេង។
ហើយបើសំរាប់មនុស្សភាគច្រើនវិញ ប្រហែលជាបោះបង់ ហើយគ្មានវិធីសម្រាប់ស្វែងរកផ្លូវចេញបាននោះទេ។
៤) មានតែការបោះបង់មួយប៉ុណ្ណោះ ដែលអាចធ្វើអោយអ្នកបរាជ័យ
អ្នកអាចបរាជ័យបានចំពោះគ្រប់រឿងដែលអ្នកធ្វើក្នុងជីវិត ក៏ប៉ុន្តែរឿងរ៉ាវរបស់ក្រុមហ៊ុន KFC ពិតជាអាចបញ្ជាក់ថាមានតែការបោះបង់ចោលប៉ុណ្ណោះ ដែលអាចធ្វើអោយអ្នកបរាជ័យបានដោយពិតប្រាកដ។
ប៉ុន្តែប្រសិនបើអ្នកមានផ្នត់គំនិតដូចជាលោកតា Sanders ទោះបីជាអ្នកបរាជ័យប៉ុន្មានដងក៏ដោយ ក៏អ្នកនៅតែអាចស្វែងរកភាពជោគជ័យបាន។ ត្រូវចាំ៖ អ្នកមិនមែនជាមនុស្សបរាជ័យទេ រហូតទាល់តែអ្នកបញ្ឈប់ការព្យាយាម។
ដូច្នេះទោះជាមានរឿងអ្វីកើតឡើងក៏ដោយ សូមកុំធ្វើការបោះបង់។ ទោះបីជាពេលវេលាកន្លងទៅ ហើយអ្នកមានវ័យកាន់តែចាស់ នឹងទោះជាអ្នកមិនអាចមើលឃើញភាពជោគជ័យក៏ដោយ។ ភាពជោគជ័យគឺពិតជាអាចទទួលមកបាន។
៥) វាគឺពិតជាមិនយឺតពេលទេ ក្នុងការចាប់ផ្ដើមម្ដងទៀត
សំរាប់លោកវរសេនីយ៍គាត់បានដឹងខ្លួនថា ការចម្អិនម្ហូបគឺជាចំណង់ចំណូលចិត្តរបស់ខ្លួន ប៉ុន្តែគាត់មិនបានរកវាឃើញនោះទេ រហូតទាល់តែគាត់មានវ័យចំណាស់។ គាត់បានឆ្លងកាត់នូវការងារខុសៗគ្នាជាច្រើន ហើយគាត់តែងតែចាប់ផ្ដើមពីដំបូងទី ម្ដងហើយម្ដងទៀត។
នៅពេលដែលអ្នកព្យាយាមស្វែងរកភាពជោគជ័យ ពីកិច្ចការជាច្រើនក្នុងពេលតែមួយ អ្នកគឺពិតជាមានអារម្មណ៍ហត់នឿយ។ ហើយការចាប់ផ្ដើមតែងតែជាផ្នែក ដែលពិបាកបំផុតមួយ ហើយសម្រាប់មនុស្សភាគច្រើន ការចាប់ផ្ដើមម្ដងទៀត នៅអាយុ ចាប់ពី ៥០ ទៅ ៦០ឆ្នាំ គឺពិតជារឿងមួយដែលមិនអាចទៅរួច។
សូមចងចាំថា វាគឺពិតជាមិនយឺតពេលនោះទេ ហើយលោកតា Sanders ក៏បានបង្ហាញយើងអោយឃើញដែរ ដោយទទួលបាននូវភាគជោគជ័យក្នុងការធ្វើកិច្ចការ ដែលគាត់ស្រលាញ់ និងពេញចិត្ត នៅពេលដែលគាត់មានវ័យជាង ៧០ឆ្នាំទៅហើយក្ដី។
៦) ហ៊ានប្រឈមនឹងហានិភ័យ ចំពោះការធ្វើអ្វីដែលខ្លួនស្រលាញ់
វាគឺពិតជាមិនមែនជាអាថ៍កំបាំងនោះទេ ដែលថាការធ្វើអ្វីមួយដែលខ្លួនយើងចូលចិត្ត និងស្រលាញ់បំផុត គឺជាគន្លឹះមួយដើម្បីឈានទៅរកភាពជោគជ័យ។ ប្រិយមិត្តក៏ធ្លាប់បានដឹង ខ្ញុំផ្ទាល់ក៏ធ្លាប់បានដឹង ហើយនរណាៗក៏ធ្លាប់បានដឹងដែរ។
ប៉ុន្តែទោះបីជាបែបនេះក្ដី សំរាប់មនុស្សយើងភាគច្រើន នៅតែមិនព្រមសម្រេចចិត្តក្នុងការ ដើរតាមអ្វីដែលយើងចង់បាន មុនពេលដែលអាយុក្លាយទៅលេសថ្មីមករារាំងខ្លួនរបស់យើង។
ជាពិសេសយុវវ័យដែលមានវ័យត្រឹម ២០ឆ្នាំតិចតួច ឬក្រោម២០ឆ្នាំ ពួកគេមិនដែលមានគំនិតចាប់អារម្មណ៍នៅក្នុងការដើរតាមមហិច្ឆតា និង ការស្រលាញ់របស់ខ្លួនឡើយ ប៉ុន្តែពួកគេបែរជាចូលចិត្តធ្វើរឿងដែលមិនសូវមានប្រយោជន៍ច្រើនទៅវិញ។
ហើយសំរាប់មនុស្សភាគច្រើន ប្រហែលជាពួកគេត្រូវការពេលវេលាជាច្រើន មុនពេលដែលពួកគេបានយល់ថា ការធ្វើអ្វីទៅតាមចំណង់ចំណូលចិត្តគឺពិតជាមានសារៈសំខាន់ និងអាចជួយអោយរូបគេទទួលនូវភាពជោគជ័យបាន។
៧) កុំខ្លាចក្នុងការចាប់ផ្ដើមតូចតាច
លោកតា Sanders ចាប់ផ្ដើមលក់មាន់បំពងរបស់គាត់ នៅលើចិញ្ចើមផ្លូវធម្មតា ក្នុងទ្រង់ទ្រាយតូចមួយប៉ុណ្ណោះ។ ប៉ុន្តែបន្ទាប់ពីលក់នូវរូបមន្ដរបស់គាត់ ការលក់របស់គាត់បានកើនឡើង និងរីកដុះដាលយ៉ាងខ្លាំង ហើយ Franchise របស់គាត់បានចាប់ផ្ដើមបើកដំណើរការនៅទូទាំងពិភពលោក។
មេរៀនមួយនេះគឺ អ្នកមិនត្រូវខ្លាចក្នុងការចាប់ផ្ដើមតូចតាចនោះទេ។ អោយតែអ្នកបានចាប់ផ្ដើម ហើយលះបង់ដើម្បីវា នោះការវិវត្តនឹងរត់មករកអ្នកដូចគ្នាដែរ។ មានមនុស្សជាច្រើន បានបញ្ឈប់នូវគំនិតអាជីវកម្មរបស់ខ្លួនផ្សេងៗ ពីព្រោះពួកគេយល់ថា គំនិតរកស៊ីរបស់ខ្លួនគឺតូចតាចពេក និងមិនអាចដំណើរការបាន។ ត្រូវចាំថា អ្នកដាច់ខាតត្រូវតែចាប់ផ្ដើមជាមុនសិន។
មនុស្សយើងនរណាក៏ដោយតែងតែចូលចិត្តនូវការវិវត្ត ហើយនៅពេលដែលអ្នកចាប់ផ្ដើមបានហើយ អ្នកគឺពិតជាអាចមើលឃើញពីការវិវត្តបាន។ ប្រសិនបើអ្នកបញ្ឈប់គំនិតរបស់ខ្លួន ដោយសារអ្នកយល់ថាវាល្អមិនគ្រប់គ្រាន់ នោះអ្នកពិតជាមិនអាចឈានទៅមុខបានឡើយ៕
ព័ត៌មានថ្មីៗ
